4 Yumanyi Yitwatela Kulomba?

KULOMBA kwaYesu kwakutalilahu, dikulomba kwaswejawu kufuntila funtilahu nawa kwilukawu nankashi akwaKristu ejima. Hela neyi iyi nsañu yalala indi kwiji yakutwamba, kulomba kwaYesu kwakutalilahu kwatenañawu mpinji yikwawu nawu Kulomba kwaMwanta hela nawu kulomba kwaTata Yetu, antu amavulu eluka wanyi mukwatalisha. Antu amavulu adizaña awa mazu kuhitila mukufuntila funtilahu mafuku ejima nawa avula kwila mwenimu mpinji yamwana. Ilaña Yesu hakeñeleña nindi tulombeña muniyi njilaku. Tuneluki ñahi mwenimu?

Henohu kanda yashimuni kulomba kwakutalilahu, Yesu wahosheli nindi: ‘Chimukulombaña, bayi muhituluka nakutenatena mwamukunkulwayiku.’ (Matewu 6:7) Komana Yesu wadiña nakuditadikisha yomweni hampinji yashimwiniyi mazu itwatela kuhembela kumutu nikuyifuntila funtilañahu mukulomba? Inehi. Ilaña, Yesu wadiñi nakutudizisha yuma yitwatela kulomba nawa watulejeli yuma yitwatela kusambila kwanuka hakulomba. Tushinshikenu chikupu hayuma yahosheliyi. Iku kulomba akwisoneka hamukanda waMatewu 6:9-13.

“Tata Yetu wekala mwiwulu, ijina deyi dijili.”

Dichi Yesu wayanukishili atumbanji twindi nindi atela kulomba kudi Tata yindi, Yehova. Komana mweluka muloña walemena ijina daNzambi nimuloña wuyatelela kudijilika?

Kufuma tuhu kukutachika kwachihandilu chawantu, ijina daNzambi dajila adisawula. Mukwankunyi naNzambi, Satana, wamuteneni Yehova nindi watwambaña, nawa hiNyuuli walwisu, hakweti ñovu yakuyuula yileñaleña Yindi chiwahuku. (Kutachika 3:1-6) Antu amavulu adibombaña naSatana, atañishaña nawu Nzambi hasha maana kudantuku wawukatu, wayandishaña antu nawa amukaanaña nawu hidiyi Nleñuku. Amakwawu akaana nijina dindi dadeni, afumisha ijina daYehova mumaBayibolu abalumunawu nikukaanisha antu kudizatisha.

Bayibolu yashimuna nawu Nzambi wukafumishahu kutama kwejimiku. (Ezekeli 39:7) Chakafumishahu kutama, wukayinka yuma yejima yimwakankilaña nawa wukamanisha kukala kwenu kwejima. Wakela ñahi mwenimu? Mazu analondeluhu ekala mukulomba kwaYesu akwakula ilu lwihu.

“Wanta weyi winzi.”

Makonu, antañishi amunsakililu akañanyaña kwiluka chekala Wanta waNzambi. Ilaña antiyilili jaYesu elukili nawu, atuprofwetu twaNzambi ashimwineñahu dehi nawu Mesiya, Nkuli atondawu kudi Nzambi, wakayuula Wanta wakafumishahu yuma yatama hamaseki. (Isaya 9:6, 7;  Danyeli 2:44) Wakajilika ijina daNzambi nakumumwekesha Satana nawu hisakutwamba nakumujilumwina hamu nanyidimu yindi yejima. Wanta waNzambi wakamanisha njita, yikatu, nzala nikufwa. (Masamu 46:9; 72:12-16; Isaya 25:8; 33:24) Neyi munakulomba nenu Wanta waNzambi winza, dikwila nawu munakulomba nenu yikaninu yejimiyi yishikijewi.

“Muchima weyi awili hamaseki neyi chawilañawu mwiwulu.”

Mazu aYesu amwekeshaña nawu Nzambi wamba kela mwaya muchima windi hamaseki neyi chawilañawu mwiwulu, mwashakamayi Nzambi. Kwosi wakañeshaña kwila mwaya muchima waNzambi mwiwulu; nawa Mwana kaNzambi wasili njita naSatana nialunda nindi, wayinatilili hamaseki. (Chimwekeshu 12:9-12) Kufwana nyikuku yamazu yiyedi yatachi, iwu mukuku wamazu wamuchisatu wakulomba kwakutalilahu, watukwashaña kushinshika chuma chalema chakwila mwaya muchima waNzambi, bayi yuma yitwafwilañaku. Mpinji yejima Nzambi wakeñaña kwilila yileñaleña yindi yejima yuma yayiwahi. Dihafumini Yesu muntu wawanina kuhosha naTata yindi nindi: “Ilaña bayi ela munakeñamuku, chiña muwunakeñeyi.”—Luka 22:42.

“Twinki kudya kwetu kutukukeña lelu.”

Yesu washimwini cheñi nindi twatela kulomba yuma yitwakankilaña. Chatama wanyi kulomba kudi Nzambi yuma yitwakeñaña mafuku ejima. Kafwampi kwila mwenimu kwatwanukishaña nawu Yehova diyi “wenkaña antu wumi nimuuya niyuma yejima.” (Yililu 17:25) Bayibolu yatulejaña nawu hinvwali wukweti kukeña watiyaña kuwaha kwinka anyanindi yuma yakankilañawu. Kufwana nvwali wamuwahi, wayinkaña yuma yayizañaleshaña.

“Twanakeni nyikudi yetu.”

Komana chalala mukweti mukudi kudi Nzambi? Mwakeñaña Nzambi yayanakeni? Antu amavulu makonu hiyeluka chekala nshiduku nawa eluka wanyi nawu nshidi yatama. Ilaña Bayibolu yatañishaña nawu nshidi diyaletaña kukala kutwamonaña, muloña diyakojejaña antu kufwa. Chineli twavwalikaña akwanshidi, twavulumunaña kakavulu, hakwila nawu twakatambuli wumi wahaya nyaka kumbidi chiña Nzambi yatwanakena. (Aroma 3:23; 5:12; 6:23) Twazañalala hakudiza nsañu yamuBayibolu yahosha nawu: ‘Eyi Yehova wumuwahi waanakenaña.’—Masamu 86:5.

‘Twamwini kudi watama.’

Komana mweluka nenu mwakeñaña Nzambi yanyakali kuyikiña? Antu amavulu akaanaña nawu Satana ‘watama,’ hekala kwokuku. Ilaña Yesu watañishili nindi Satana wekala kwoku, nawa wamuteneni nindi, ‘nyuuli wampata yamunu mwishina.’ (Yowanu 12:31; 16:11) Satana naluwañeshi kanu kaayi kayuulañayi, nawa wafwilaña kuyiluwañesha ninenu kulonda mubuli kwikala nawulunda chikupu naTata yenu Yehova. (1 Petulu 5:8) Hela chochu, Yehova wukweti ñovu kubadika Satana nawa wakeñaña kukiña antu amukeña Yena.

Iyi yikuma yamaneni yantesha yitunahanjekuhu, yekala mukulomba kwaYesu kwakutalilahu hiyashimuna yuma yejima yitwatela kulombaku. Anukenu nenu mukanda wa 1 Yowanu 5:14 watulejaña hadi Nzambi nawu: ‘Tukwiluka netu neyi tukulomba chuma chamwaya muchima windi, wukututiya.’ Bayi mutoñojoka nenu kukala kwenu kwanyanya dichi himwatela kulomba kudi Nzambuku.—1 Petulu 5:7.

Indi mpinji niluña? Komana twatela kulombela kwiluña kudi kwejima nawa mpinji yidi yejima?