Yuma Yitwadizilaña Kudi Yesu

Yileñaleña YakuSpiritu Chiyatukwashaña

Yesu washakamineña mwiwulu naTata yindi henohu “mpata yamunu mwishina yichidi kanda.” (Yowanu 17:5) Diyi wunatweshi kwakula awa malwihu analondeluhu.

Komana añelu atwakamenaña?

▪ Yesu watudizisha nindi añelu akamenaña antu nankashi. Wahosheli nindi: ‘Añelu aNzambi azañalalaña hansañu yamukwanshidi wumu wunabalumuki mumuchima.’—Luka 15:10.

Yesu washimwini nindi añelu ayinka mudimu wakukwasha ambuña aNzambi kutwalekahu kukolesha wulunda wawu naNzambi. Dichi, hampinji Yesu yasoñamishiliyi atumbanji twindi abuleña kudimbwisha amakwawu, wahosheli nindi: “Babalenu mubuli kudiwula hela mwana wanyanya wumu wudi neyi iwu; muloña nukuyileja nami akweti añelu jawu atalaña mafuku ejima kumesu aTata yami wekala mwiwulu.” (Matewu 18:10) Hakuhosha mwenimu, Yesu hatalishili mukwila nindi kambanji wudi wejima wukweti kañelu wamukiñañaku. Ilaña Yesu washimwini nindi añelu azatilaña hamu naNzambi akamenaña chikupu antu amuchipompelu chawakwaKristu.

 Indi Diyabolu nateli kutuluwañesha ñahi?

▪ Yesu wayisoñamishili atumbanji twindi nindi, Satana wafwilaña kukañesha antu aleki kudiza nsañu yalala hadi Nzambi. Yesu wahosheli nindi: “Muntu wukwila chakutiyayi mazu awanta, yena kumulumbulukila nehi, watama hakwinza nakuhukula yanakuwuwu mumuchima windi.”—Matewu 13:19.

Yesu washimwini hatooka njila yazatishañayi Satana hakudimba antu hampinji yayilejeliyi antu chishimu chamuntu wakuwili mbutu yatidiku mwiha dindi. Muntu wakuwili mbutu wemenañaku Yesu, nawa tidiku yemenañaku akwaKristu alala akayuula naYesu mwiwulu. Hela chochu, Yesu wahosheli nindi mukwankunyi wenjili “nakukuwa mbutu yamatahu mukachi katidiku.” Matahu emenañaku akwaKristu akutwamba. “Mukwankunyi wayikuwili diyi Diyabolu.” (Matewu 13:25, 39) Neyi chochadifwanaña matahu natidiku hakubaluka nyitombu, antu aditenaña nawu hiyakwaKristu anateli kumwekana neyi hiyakwakudifukula alala. Nsakililu yatañishaña nsañu yakutwamba yinaheñuli antu kulonda abuleña kumwovwahila Nzambi. Satana nakuzatisha nsakililu yakutwamba kulonda antu abuleña kwikala nawulunda naYehova.

Tunateli kumutondolwela ñahi Satana kulonda yabuli kutuluwañesha?

▪ Yesu wamuteneni Satana nindi diyi ‘nyuuli wampata yamunu mwishina.’ (Yowanu 14:30) Hampinji yalombeliyi kudi Nzambi, Yesu washimwini chitwatela kudikiña kulonda Satana yabuli kutuluwañesha. Wayilombeleluku atumbanji twindi kudi Tata yindi wamwiwulu nindi: ‘Wuyihembi kudi watama. Wena hiyadi nawa ampata yamunu mwishinaku, neyi chineli nami hinidi wampata yamunu mwishinaku. Yijiliki munsañu yalala. Izu deyi hinsañu yalala.’ (Yowanu 17:15-17) Kwiluka Izu daNzambi kunateli kutukiña kulonda abuli kutuluwañesha kudi antu amukaayi kanakuyuulewa naSatana.

Indi añelu atukwashaña ñahi makonu?

▪ Yesu wahosheli nindi: “Hamba kakuma nyaka yinu; añelu amba kenza nakwambula atama kudi aloña.” (Matewu 13:49) Tunakushakama mumpinji ‘yakukuma kwanyaka yamakonu’ nawa antu amavulu anakwiteja nsañu yayiwahi yaWanta waNzambi.—Matewu 24:3, 14.

Ilaña bayi neyi antu ejima anakudiza Izu daNzambi atambwilaña wuselewa winduku. Añelu diwu alombolaña mudimu wawambuña aYehova, nawa antu amukeña Nzambi chikupu anakwaambuka kudi antu abulaña kukeña kulondela yuma yadizañawu. Hakulumbulula antu atambulaña wuselewa waNzambi, Yesu wahosheli nindi: ‘Wowu antu atiyaña izu namuchima wawu wawuwahi walumbuluka, hiyakudikwata nañovu, hiyakusoña nikutatakenamu chikupu.’—Luka 8:15.

Neyi munakukeña nsañu yayivulu talenu kapetulu 10 kaniwu mukanda, Chumanyi Chacheni Chatañishaña Bayibolu? wasonekawu kudi aYinsahu jaYehova.

[Mwevulu wudi hefu 16]

Añelu azataña mudimu wakupompesha antu ashinshika muchipompelu chawakwaKristu