Chakumanisha Kukala Kwavula Kumwekana

BAYIBOLU yahosha nawu mumaluwi mwekalaña kukala mpinji yikwawu. Kapostolu Pawulu amoneneni kudi Nzambi kusoneka nindi antu adisumbula akomika ‘yihuñu.’ (1 Akorinda 7:28) Ilaña adisumbula anateli kuzata nañovu kulonda akehesheñaku yihuñu yamonañawu nikwikala azañalala. Shinshikenu kukala kutanu nakamu kwashimwinuwu amayala niambanda adisumbula kulonda mwiluki nenu kuzatisha yishina yamuBayibolu kunateli kuyikwasha.

1

KUKALA:

“Hitukweti wulunda wawuwahi namwini kwamuku.”

CHISHINA CHAMUBAYIBOLU:

‘Shinshikenu yuma yabadika kuwaha.’ —AFWILIPI 1:10.

Maluwi enu ekala hakachi kayuma yasweja kulema muchihandilu chenu. Mwatela kuyilemesha. Dichi, mwatela kushinshika chimwatanjika nyidimu yenu kulonda mumoni neyi diyuma yikwawu yinakuleta iku kukala. Bayi mwiteja nyidimu yimwelaña mafuku ejima yiyileñeli kwambokelamu namwinikwenuku. Hela chochu, nyidimu yakumujimba niyuma yikwawu yimwatela kubula kutondolwela yinateli kuyileñela kwambokelamu namwinikwenu hakapinji kantesha. Ilaña mwatela kukeheshaku mpinji yimwelaña yuma yikwawu yidi neyi mpinji yimwahanjekaña nawamabwambu jenu hela yuma yimwelaña hakumanisha wuudi.

 Hela chochu, antu amakwawu adisumbula anateli kuzata mudimu wukwawu hela kwila yuma yelañawu hakumanisha wuudi kulonda abuleña kwikala hamu namwinikwawu. Antu amuchidiwu ‘hiyambukaña’ namwinikwawuku. Ilaña achinaña kukala. Neyi enu hela mwinikwenu mukweti kukala kwamuchidiwu, mwatela kwiluka kunakufuma kukala nichimwatela kumanisha kukala kweniku. Neyi muhanjekaña namwinikwenu, mukudikunda chikupu nawa mukwikala “mujimba wumu.”—Kutachika 2:24.

Chazatishawu antu amakwawu iku kufumba: Andrew * niTanji akuAustralia anashakami mumaluwi hadi yaaka ikumi. Andrew wahosheli nindi: “Neluka nami kwikala nanyidimu yayivulu nikusweja kukeña yisela kwaletaña kukala mumaluwi. Twekalaña nampinji yakuhanjeka yuma yidi kumuchima nañodami.”

Dave niJane ashakamaña kuUnited States nawa anashakami mumaluwi hadi yaaka 22, ambulañaku mpinji yantesha nawufuku kulonda ahanjeki hayuma yayimwekena niyinakutoñojokawu. Jane wahosheli nindi: “Iyi mpinji twayilemesha nankashi nawa hitwakeñaña chuma chidi chejima chituluwañeshuku.”

2

KUKALA:

“Chayinu mpinji mwinikwami hanakunyinka yuma yinakeñañaku.”

CHISHINA CHAMUBAYIBOLU:

“Bayi muntu alonda yakudiwahisha nachu yomwenuku, chiña yakuwahisha nachu mukwawu.”—1 AKORINDA 10:24.

Muntu washaña maana hohu kuyuma yinakukeñayi mumaluwi hakazañalalaku, hela tuhu muntu yeniwu yekala sumbolenu hela sumbokenu. Antu ashakamaña chiwahi mumaluwi neyi wejima wawu akeñaña kuhana kubadika kutambwila hohu. Yesu washimwini nindi: “Chikweti kukooleka yowu kuhana, kutambula chakuminamu.”—Yililu 20:35.

Chazatishawu antu amakwawu iku kufumba: Maria niMartin akuMexico, anashakami  mumaluwi hadi yaaka 39. Bayi neyi adiña namuzañalu mumaluwi awu mpinji yejimaku. Anukaña kukala kwamwenuwu mpinji yimu. Maria wanukaña nindi: “Mpinji yimu yitwabobweli, namubeñeli Martin. Wahilili chikupu. Nesekeli kumulumbulwila nami hinakeñeli kuhosha muniyi njilaku, nawa nami nahilili hohu. Ilaña kwonti kwindi.” Martin wahosheli nindi: “Hampinji yitwadiña nakubobola, natoñojokeleña nami kwila tushakama cheñi hamu nehi, twatela hohu kudiseña.”

Martin wakeñeleña kumulemesha. Maria wakeñeleña kumutiyishisha. Yuma yakeñeleñawu wejima wawu hiyayimweneñaku.

Indi iku kukala akumanishili ñahi? Martin wahosheli nindi: “Nashakamini hamaseki nakuwundisha muchima mwivumu nawa wejima wetu twafuukwiluhu kuzatisha kufumba kwamuBayibolu kwahoshaña hakwikala nakalemesha niluwi. Hayaaka yinahituhu, tweluka netu hela chakwila tukumona kukala kwakuvulu, tunateli kukumanisha neyi tulomba netu Nzambi yatukwashi nikuzatisha kufumba kwamuBayibolu.”—Isaya 48:17, 18; Aefwesesa 4:31, 32.

3

KUKALA:

“Mwinikwami hazataña mudimu watela kuzatayuku.”

CHISHINA CHAMUBAYIBOLU:

“Wejima wetu twamba kalumbulula kudi Nzambi mutwelaña hamuntu hamuntu.”—AROMA 14:12.

Chakadi nikujina, antu hiyakwikala namuzañalu mumaluwuku neyi wumu hohu diyi wunakwila yuma yatela kuleta muzañalu. Kukala kukuswejelaku neyi wejima wawu abula kushaku maana nikudinka nyiloña.

Neyi musweja kutoñojoka hayuma yelañayi mwinikwenu, mwakendaña hohu chikasa munshiñu. Sweje-e dinu neyi muleka kuzata nyidimu yenu muloña mwinikwenu hanakuzata nyidimu yinduku. Ilaña neyi muzata nañovu kulonda mwikali iyala hela mumbanda wamuwahi, mukushakama chachiwahi mumaluwenu. (1 Petulu 3:1-3) Chuma chabadika kulema, mukumwekesha nenu mwalemesha ntanjikilu yaNzambi yamaluwi, nawa yuma yimukwilaña yikumuzañaleshaña nankashi.—1 Petulu 2:19.

Chazatishawu antu amakwawu iku kufumba: Kim ninfumwindi ashakamaña kuKorea, anashakami mumaluwi hadi yaaka 38. Kim wahosheli nindi: “Mpinji yikwawu nfumwami wanhililaña nawa walekaña kunhoshesha, hinelukaña chuma chaleñelañaku. Chumichi chanleñelaña kutoñojoka nami hankeña neyi chankeñeliyi hatachuku. Mpinji yikwawu natoñojokaña nami, ‘Muloñadi chakeñelañayi nindi nimutiyishishi henohu yena hakeñaña kuntiyishishaku?’”

Kim wateleli kusha maana hayiluwa yamwekeneña nihayuma yabulileña kwilayi nfumwindi. Hela chochu, wafuukwiluhu kwila chuma chacheñi. Kim wahosheli nindi, “Chatela nihileña, ichi neluki nami chachiwahi kutachikilahu kukeña njila yakudanakena. Chinela mwenimu, wejima wetu twawundishaña nyichima nawa twamanishaña kukala mumesu awunda.”—Yakoba 3:18.

 4

KUKALA:

“Iñondami wovwahila wanyi.”

CHISHINA CHAMUBAYIBOLU:

“Mutu weyala diyi Kristu.”—1 AKORINDA 11:3.

Iyala watoñojokaña nindi iñodindi wovwahila wanyi, watela kusambila kudishinshika kulonda yamoni neyi weteja kwovwahila Mutu windi, Yesu Kristu. Iyala nateli kumwekesha nindi wovwahila kuhitila mukulondela chakutalilahu chaYesu.

Kapostolu Pawulu wasonekeli nindi: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Aefwesesa 5:25) Yesu ‘hekalileña nawanta’ hadi atumbanji twinduku. (Maku 10:42-44) Walejeli atumbanji twindi nshimbi yatiyakana nikuyifumba neyi chinakukeñeka. Ilaña hadiña wazuwaku. Wayitiyilileña luwi nawa hakeñeleña eli yuma yayivulu kubadika yatela kwilawuku. (Matewu 11:29, 30; Maku 6:30, 31; 14:37, 38) Wadiña nakuyakamena chikupu.—Matewu 20:25-28.

Iyala watela kudihu ilu lwihu, ‘Komana namonaña wumutu wami niambanda kwesekeja natushidikilu twamwiluña detu tahindi nalemesha chikupu kufumba niyakutalilahu yamuBayibolu?’ Chakutalilahu, chumanyi chimwatela kutoñojoka hadi mumbanda wunakaani chikupu munafuukuliyi nfumwindi nawa nalumbululi munjila yakalemesha chinakaaniniyi? Bayibolu yashimuna nawu Sara iñoda Abarahama wemikili chakutalilahu chachiwahi chakwikala mumbanda wovwahila. (1 Petulu 3:1, 6) Hela chochu, washimwini yuma yatoñojokeleñayi, hampinji yelili Abarahama yakañanyi kwiluka kukala kwadiña muchisaka.—Kutachika 16:5; 21:9-12.

Chakadi nikujina, Abarahama hamutiyishileña Sara woma kulonda yakañanyi kuhoshaku. Hadiña nalukambuku. Chochimu, iyala watiyililaña kufumba kwamuBayibolu hatela kumutiyasha ñodindi woma nikumuleja nindi chiña tuhu yovwahili mwejima munakuhoshayuku. Iñodindi nateli kumulemesha neyi yazatishaña wumutu windi munjila yayiwahi.

Chazatishawu antu amakwawu iku kufumba: James washakamaña kuEngland nawa nashakami mumaluwi hadi yaaka yitanu nayisatu, wahosheli nindi: “Ichi hinafuukulaña yuma yalema chakubula kumwihula iñodamuku. Hinafwilaña kutoñojoka hohu hayuma yinakeñañaku. Ilaña nafwilaña kusha maana hayuma yakeñañayi iñodami.”

George washakamaña kuUnited States nawa nashakami yaaka 59 mumaluwi. Wahosheli nindi: “Nafwilaña kumumona iñodami bayi neyi muntu wamukunkulwayuku, ilaña namumonaña nami himumbanda wamaana nawa washinshika.”—Yishimu 31:10.

 5

KUKALA:

“Nfumwami halombolaña munyidimuku.”

CHISHINA CHAMUBAYIBOLU:

“Ambanda ejima akweti maana atuñishaña nyikala yawu, ilaña wasupa wawusandaña namakasindi yomweni.”—YISHIMU. 14:1.

Neyi nfumwenu washintajalaña kufuukulahu hela kulombola nyidimu yamuchisaka, mukweti njila jisatu jimwatela kutondahu. (1) Munateli kuhosha mpinji yejima hayuma yabulaña kwilayi hela (2) munateli kutambula chifulu chindi chawumutu wachisaka hela (3) munateli kumuhameka chakufuma hamuchima hanyidimu yejima yakalakalañayi. Neyi mutondahu njila jiyedi jakusambila, dikwila nawu mukusanda itala denu namakasenu enu aweni. Neyi mutonda njila yamuchisatu mukukolesha maluwenu.

Amayala amavulu akeñaña kuyilemesha kubadika chakeñañawu nawu ayikeñi. Dichi neyi nfumwenu yeluka nindi mwamulemesha, mwatela kuzata nañovu kulonda yeluki nindi walombolaña chiwahi muchisaka nawa mwasakililaña hanyidimu yindi, nawa chelukayi chumichi wukuzataña chiwahi mudimu windi. Mpinji yikwawu himunateli kuditeja nanfumwenu muyuma yikwawuku. Dichi wejima wenu mwatela kuhanjeka hayuma oyu. (Yishimu 18:13) Ilaña nhoshelu yenu ninjila yimukuhoshelamu yinateli kutuña hela kusanda maluwi enu. (Yishimu 21:9; 27:15) Hoshenuña munjila yakalemesha kulonda muwani yuma yimwakeñaña, nfumwenu hakushintajalaña kulombola nyidimu yamuchisakaku.

Chazatishawu antu amakwawu iku kufumba: Michele washakamaña kuUnited States nawa nashakami mumaluwi hadi yaaka 30, wahosheli nindi: “Ami nianyikijami ayedi awambanda atuleleli kudi mama chakadi iyala wakumukwasha, wadiña wakola nawa wadimena. Nafwilileña kwimbujola yililu yamama. Nazatileña nañovu mpinji yejima kulonda novwahileña. Chakutalilahu, ichi namwihulaña nfumwami chatela nifuukuluhu yuma nkawami.”

Rachel washakamaña kuAustralia nawa nashakami mumaluwi nanfumwindi Mark hadi yaaka 21, niyena welileña yuma kwesekeja nachamukulishiluwu. Wanukaña nindi: “Mama hadiña nakumwovwahila tataku. Adiña nachaaku chakubobola nikubula kudilemesha. Chinasumbukili nadiña nakumwimbujola mama. Ilaña hayaaka yinahituhu, namoni chawahila kuzatisha kufumba kwamuBayibolu kwahoshaña hakwikala nakalemesha. Chayinu mpinji, ami niMark tunakudiluñisha mumaluwi etu.”

6

KUKALA:

“Hinukutwesha kuumika yaaku yamwinikwami yanhilishañaku.”

CHISHINA CHAMUBAYIBOLU:

“Nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni.”—AKOLOSI 3:13.

Chakubula nikujina, hampinji yimwadilukileña mwashinshikileña hayililu yayiwahi yamwinikwenu chakwila himwashileña maana kuyiluwa  yinduku. Komana kwila mwila chuma chochimu niyinu mpinji nehi? Chakadi nikujina, kudi yuma yakoñañayi mwinikwenu yaletaña kukala. Hela chochu, dihulenu nenu: ‘Yililu yamuchidinyi yinateli kushinshika mudi mwinikwami, yayiwahi tahindi yatama?’

Yesu wazatishili chakutalilahu chachiwahi chikutukwasha kudiwula yiluwa yitwamonaña mudi akwetu. Wenhwili nindi: “Wukutaliladi kachibalu kadi mudisu damana kweyi, kwinza chipamba chidi mudisu deyeyi aweni hiwachimonañaku?” (Matewu 7:3) Kachibalu kanateli kwikala kachikunku kamutondu. Ilaña, chipamba himwalachi wawulehi wazatishañawu kulonda akoleshi nachu iwulu detala. Chikumanyi chalumbulwileñayi Yesu? “Sambilaku kufumisha chipamba chidi mudisu deyeyi aweni, mwaka wumoni chachiwahi kufumisha kachibalu kadi mudisu damana kweyi.”—Matewu 7:5.

Yesu wazatishili ichi chakutalilahu kulonda yasoñamishi nachu antu. Wahosheli nindi: “Bayi musompeshaña akwenuku, kulonda abuli kuyisompesha ninenu. Muloña kusompesha kumukusompesha akwenu diku kwakayisompeshawu nachu ninenu.” (Matewu 7:1, 2) Neyi munakukeña nenu Nzambi yadiwuli yiluwa yenu, chipamba chidi mudisu denu, chiña ninenu mudiwula yiluwa yakoñañayi mwinikwenu.—Matewu 6:14, 15.

Chazatishawu antu amakwawu iku kufumba: Jenny washakamaña kuEngland nashakami mumaluwi naSimon hadi yaaka yitanu nayiwana, wahosheli nindi: “Chuma chanhilishaña nankashi chelañayi nfumwami hichaaku chindi chakukeña kubula kufuukwila chadimu, wakeñaña hohu kwila yuma neyi mpinji yamana dehi. Chumichi chanhayamishaña, muloña hampinji yitwadilukileña natiyileña kuwaha chelileñayi yuma. Hela chochu, ichi neluki nami anami nawa nikweti yiluwa, nakeña nankashi kumuleja mwakwilila. Ami niSimon tunakudiza chakudiwula tuyiluwa twetu.”

Curt nfumwa Michele asombololawu dehi, wahosheli nindi: “Neyi wushaña maana hayaaku yamwinikweyi yakutiyishaña kutama, iyi yiluwa yikumwekanaña neyi yamaneni nankashi. Nashinshikaña hayililu yanleñeleli nimukeñi Michele.”

Yuma yikuyikwasha kushakama chachiwahi

Iyi yakutalilahu yantesha yinakumwekesha nawu kukala kwamwekanaña mumaluwi ilaña hikwasweja kuhambakanaku. Yumanyi yikuyikwasha kushakama chachiwahi? Mukeñenu Nzambi nawa fwilenu kuzatisha chikupu kufumba kwekala Mwizu dindi Bayibolu.

Alex niItohan akuNigeria nawa anashakami mumaluwi hadi yaaka kubadika ha 20, adiza yumiyi. Alex wahosheli nindi: “Ichi neluki nami kukala kwejima kwamwekanaña mumaluwi kunateli kumana neyi eyala namumbanda azatisha yishina yamuBayibolu.” Iñodindi wahosheli nindi: “Tuneluki kulema kwakulomba hamu mpinji yejima nikuzatisha kufumba kwamuBayibolu kwahoshaña hakudikeña chikupu nikwikala adiwunjika. Ichi kukala kunakehi kubadika hampinji yitwadisumbwili.”

Mukukeña kwilukilahu nsañu jikwawu kutalisha hakufumba kwakuwahi kwekala Mwizu daNzambi chikunateli kukwasha chisaka chenu? Neyi mukukeña, ihulenu aYinsahu jaYehova kulonda ahanjeki nenu kapetulu 14 kamukanda waChumanyi Chacheni Chatañishaña Bayibolu? *

[Tumazu twaheshina]

[Mwevulu wudi hefu 4]

Komana mwekalaña nampinji yakuhanjeka?

[Mwevulu wudi hefu 5]

Komana nafwilaña kuhana chikupu kubadika kutambwila?

[Mwevulu wudi hefu 6]

Komana natachikilañahu kumanisha kukala?

[Mwevulu wudi hefu 7]

Namwihulaña iñodami henohu kanda nifuukuluhu?

[Mwevulu wudi hefu 9]

Komana nashinshikaña hayililu yayiwahi yamwinikwami?