Yuma Yaletaña Muzañalu Muchisaka

Dizishenu Anyanenu Yililu Yayiwahi

Loida, * mama yawantu wakuMexico, wahosheli nindi: “Hashikola ahanaña makondomu, dichi atwansi atoñojokaña nawu kudikama hichuma chachiwahi, chakala anakuzatisha kondomu.”

Nobuko, mama yawantu wakuJapan wahosheli nindi: “Namwihwili mwanami chuma chatela kwilayi neyi adi nkawawu nebwambu dindi wamumbanda. Wakwili nindi, ‘Neluki wanyi.’”

HAMPINJI yachidiña kutamañila mwanenu weyala hela wamumbanda, komana mwadiña nakumukiña kuyuma yafwana? Hadaha mwajikileña hafuminaña kesi kawuneñu, kusweka yozelu yatwa, nikwila yuma yikwawu yatela kumukiña mwanenu kulonda yabula kudikatisha.

Ilaña kukiña mwanenu wakampululu hela kankaña hichuma chakala. Ichi dinu munakwakama chikupu yuma yidi neyi iyi: ‘Komana mwanami nakutala nyevulu yanzekesi?’ ‘Komana mwanami wamumbanda nakutemesha nsañu yawuvumbi ninyevulu yindi yanzekesi hanshiña?’ Nilwihu lwomisha mbaña lwakwila nawu, ‘Komana mwanami wakampululu hela kankaña watiyaña wuvumbi?’

Kutala Anyana Mpinji Yejima Hikwamanishaña Kukalaku

Anvwali amakwawu afwilaña kutala anyanawu mpinji yejima kuhitila mukwiluka yuma yejima yelañawu. Ilaña anvwali amavulu elukaña nawu kutala anyana muniyi njila kwaleñelaña anyana kusweka yuma yafwilaña anvwali jawu kuyilekesha.

Eñañi, kutala anyana mpinji yejima hikwamanishaña kukalaku. Yehova Nzambi hatalaña yileñaleña yindi mpinji yejima kulonda yimwovwahileñaku, dichi ninenu anvwali kanda mutalaña anyanenu mpinji yejimaku. (Kuhituluka 30:19) Hanu dinu munateli kukwasha ñahi anyanenu atumpululu niatunkaña kufuukulahu yuma yayiwahi?—Yishimu 27:11.

Chuma chinateli kukwashana hikutwalekahu kuhanjeka nawanyanenu nawa mwatela kutachika kuhanjeka nawu henohu achidi atwansi. * (Yishimu 22:6) Mwatela kutwalekahu kuhanjeka nawu nimuyaaka yawukampululu hela yawunkaña. Hakwikala nvwali, yenu mwatela kumuleja mwanenu wakampululu hela wakankaña nsañu yalala. Alicia kansi wamumbanda wakuBritain wahosheli  nindi, “Antu amavulu atoñojokaña nawu twatela kuhosha nsañu yakudikama nawamabwambu jetu, ilaña iyi nsañu yakutwamba. Twatiyaña kuwaha nankashi neyi anvwali jetu atuleja iyi nsañu. Twakuhwelela nsañu yatulejañawu.”

Anyana Atela Kwiluka Nawu Kwikala naYililu Yayiwahi Kwalema

Neyi anyana anakuli dehi, hiyatela kwiluka hohu yuma yayivulu hansañu yakudikamaku, ilaña akeñaña wunlomboli. Atelela cheñi ‘kufumba yitoñojoka yawu, enjilili kwambula yayiwahi nayatama.’ (Aheberu 5:14) Atela kukuhwelela chikupu nsañu yelukawu kutalisha hakudikama kwakaanishawu nikwetejewa nawa atela kukuhwelela yumiyi. Munateli kumudizisha ñahi mwanenu wakampululu hela wakankaña yililu yayiwahi?

Sambilenu kushinshika yililu yimukweti. Chakutalilahu, mwatela kukuhwelela chikupu nenu wuvumbi, kudikama kwawantu abula kudisumbula kwatama. (1 Atesalonika 4:3) Chakadi nikujina anyanenu eluka dehi chimwamonaña iyi nsañu nawa anateli kusombolola nsañu yamuBayibolu yahosha hansañu yimwakuhwelela. Neyi ayihula akushikena dakwakula nawu kudikama henohu kanda adisumbuli chatama.

Atela kwiluka nsañu yayivulu. Mukanda wumu wahosha nawu atwansi amakwawu anateli kuhosha nawu eteja nsañu yakuhwelelawu anvwali jawu hansañu yakudikama. Iwu mukanda wahosha nawu: “Atwansi eluka wanyi chakufuukulahu awenawu. Neyi amona kukala kwakuyikasumwisha, ‘hiyelukaña chuma chachiwahi nichatamaku,’ aluwankanaña.” Dichalemena kwiluka yililu yayiwahi. Munateli kumukwasha ñahi mwanenu wakampululu hela wakankaña kwikala nayililu yayiwahi?—Sex Smart.

Yilejenu Nshimbi Jenu Jajiwahi. Komana mwakuhwelela chikupu nenu adisumbula hohu diwu atela kudikama? Mulejenu mwanenu wakampululu hela wakankaña chakubula kuhita mumbadi nawa kapampa kakavulu. Kwesekeja namukanda wumu, nsañu yasandujolawu yamwekesha nawu “mumatala mwashimunañawu anvwali chikupu nawu anyana achidi atumpululu niatunkaña hiyatela kudikamaku, anyana wenawa hiyadiñijaña munsañu yeniyi swayi-swayuku.”—Beyond the Big Talk.

Kafwampi neyi chashimunawu dehi, kuyileja nshimbi jajiwahi hichaya mukwila nawu mwanenu weyala hela wamumbanda wukukakela kuniji nshimbuku. Hela chochu, neyi mushimuna hatooka nshimbi jajiwahi jimunakukeña nenu chisaka chenu chilondelaña, mukwala chikuku chakola chatela kukwasha anyanenu kudimena. Mukanda wumu washimuna nawu atwansi amavulu azatishaña kufumba kwawanvwali jawu hela chakwila hayaaka yawukampululu hela yawunkaña adiwili.

ESEKENU KUZATISHA IYI NJILA: Zatishenu nsañu yinamwekani kulonda mutachiki kuhanjeka nawa yilejenu nshimbi jimwalemesha. Chakutalilahu, neyi kutiyakana nyiloña yawuvumbi wakukanjikija, munateli kuhosha nenu, “Ami nahayamaña amayala amakwawu chakabishañawu ambanda. Wunatoñojoki neyi awa maana ayiwanaña kudihi?”

Yitañishenu nsañu yejima yahosha hakudikama. Kuyisoñamisha kwalema. (1 Akorinda 6:18; Yakoba 1:14, 15) Hela chochu, Bayibolu yahosha hansañu yakudikama neyi hichawaana chahanayi Nzambi, bayi neyi muhetu waSatanaku. (Yishimu 5:18, 19; Kamina 1:2) Neyi muyileja atumpululu hela atunkaña kutama kwekalamu hohu chikuyileñela kujinoka, hiyakwiluka chahosha nsona haniyi nsañuku. Kansi wamumbanda wejina daCorrina wakuFrance wahosheli nindi, “Anvwali jami anlejeleña chikupu hansañu yawuvumbi nawa chumichi chanleñeleli kwiluka nami kudikama hichuma chatama.”

Ilukenu chikupu nenu anyanenu aneluki nsañu yejima yahosha hakudikama. Mama yawantu wakuMexico wejina daNadia wahosheli nindi, “Nafwilaña kuleja chikupu anyanami nami kudikama hichuma chachiwahi chatwinkayi Yehova Nzambi nindi tudiluñisheña. Ilaña antu adisumbula hohu diwu atela kudiluñisha chumichi. Chumichi chinateli kutuletela muzañalu hela makabi kwesekeja nanjila yitukuchizatishila.”

ESEKENU KUZATISHA IYI NJILA: Ifuku dimwakahanjeka namwanenu hansañu yakudikama, mwatela kukunkulula munjila yayiwahi. Bayi mutiya kukala kumuleja nsañu yakudikama nenu hichawaana chachiwahi chatwinkayi  Nzambi chatela kudiluñishayi kumbidi neyi nasumbuli hela nasumbuki dehuku. Shimunenu chikupu nenu mwanenu watela kukakela kunshimbi jaNzambi sampu nasumbuli hela nasumbuki.

Mukwashenu mwanenu yeluki yuma yatama yafumañamu. Hakwila nawu afuukuluhu yuma yayiwahi muchihandilu, atwansi atela kwiluka chakuzata nayuma yinafuukuluwu nikushinshika yuma yatama hela yayiwahi yafumaña muyuma yidi yejima yafuukulañawu. Bayi mutoñojoka nenu chelukawu yuma yayiwahi niyatama dichuma chakeñekaña hohuku. Muhela mukwaKristu wejina daEmma wakuAustralia wahosheli nindi, “Neyi nitoñojoka hayiluwu yinakoñeli kuwansi, nateli kuhosha nami kwiluka hohu nshimbi jaNzambi hichaya mukwila nawu weteja chijahoshaku. Kwiluka kuwaha kwaniji nshimbi nikutama kwafumañamu neyi tubula kujovwahila hichuma chalema.”

Bayibolu yinateli kutukwasha muloña nshimbi jajivulu jekalamu jahosha chikupu hakutama kwafumaña mukwila yuma yatama. Chakutalilahu, Yishimu 5:8, 9 yakonkomwenaña atwansi kutemuka wuvumbi ‘kuchina kuhana kulema kwawu kudi antu acheñi.’ Neyi chinakumwekesha awa mavasi, chitwadikama henohu kanda tudisumbuli tukutamisha ijina detu, nyidimu yitwamukalakelaña Nzambi yikwikala yamukunkulwayi nawa antu akutulemeshaña wanyi. Nawa chumichi chikuleñela kubula kuyikeña kudi muntu wadihemba watela kuyisumbula hela kusumbuka nenu. Kutoñojoka hayikatu yafumañamu, chinleji chatama nikubula kwikala nawulunda wawuwahi naNzambi chikuyikwasha atwansi kukakela kunshimbi jaNzambi.

ESEKENU KUZATISHA IYI NJILA: Zatishenu chakutalilahu hakwila mukwashi mwanenu yeluki kuwaha kwekala mukwovwahila nshimbi jaNzambi. Chakutalilahu munateli kuhosha nenu, “Kesi kakutelekelahu kakawahi, ilaña kesi kwochaña isaña katama. Chambwinyi chiduhu haniyi yuma yiyedi, nawa ñakwilu yeyi yikumwekesha ñahi chiwamonaña nshimbi jahanayi Nzambi kutalisha hakudikama?” Zatishenu nsañu yekala haYishimu 5:3-14 kulonda mukwashi mwanenu yeluki kutama kwafumaña mukwila wuvumbi.

Takao, kansi weyala wayaaka 18 wakuJapan, wahosheli nindi, “Neluka nami nateli kwila chuma chaloña, ilaña natwalekañahu kulwisha nakufwila kwamujimba.” Atwansi atiyaña muniyi njila anateli kukundejewa hakwiluka nawu hiyekala nkawawuku. Nikapostolu Pawulu mukwaKristu washinshika wetejeli mwenimu nindi: “Neyi nakeñi kwila chachiwahi, komana kutama kudi kwoku.”—Aroma 7:21.

Atumpululu niatunkaña atela kwiluka nawu kulwisha kweniku kwatama wanyi. Kukuyileñela kutoñojoka hayililu yakeñañawu kwikala nayu. Kunateli kuyikwasha kutoñojoka chikupu hanawa malwihu: ‘Komana inakukeña kudiyuula muchihandilu chami kulonda añiluki nawu nikweti yililu yayiwahi nikashinshi? Tahindi inakukeña añiluki nawu nalondelaña yuma yelañawu amakwawu, muntu wakeñaña kufwila kwamujimba?’ Neyi muyitañisha anyanenu yililu yayiwahi chikuyikwasha kwakula awa malwihu chiwahi.

[Tumazu twaheshina]

DIHULENU NENU . . .

Yinjikijilwinyi yinelukilañaku nami mwanami wukweti yililu yayiwahi?

Neyi inakuhanjeka namwanami hansañu yakudikama, komana nashimunaña nami hichawaana chahanayi Nzambi tahindi himuhetu waSatana?

[Chikasha chidi hefu 20]

Bayibolu Yahanaña Wunlomboli Wawuwahi Mpinji Yejima

“Nshimbi jamuBayibolu jahosha hansañu yawuvumbi jahanaña wunlomboli wawuwahi mpinji yejima. Munanu mafuku munakusambulawu chikupu atumpululu niatunkaña nyisoñu yafumaña mukudikama namuntu wabula kudisumbulawu nindi, kwimita mavumu, AIDS ninyisoñu yikwawu yenzaña hamuloña wakwila wuvumbi, Nsona yatufumbaña kuhembelela sampu muntu nasumbuli hela nasumbuki . . . ichi chalema nankashi, diyi njila yayiwahi hohu yakuhumañana kweyala namumbanda.”—Parenting Teens With Love and Logic.