Dizenu Nsañu Yidi Mwizu Danzambi

Indi Nzambi Hinyi?

Hadaha mwadihulahu dehi malwihu adi munichi chibaaba nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova akutiya kuwaha kuhanjeka nenu hakwakula awa malwihu.

1. Indi Nzambi hinyi?

Nzambi walala diyi Nleñi wayuma yejima. Bayibolu yamutenaña nawu “Mwanta wahaya nyaka,” chaya mukwila nawu hakweti ntachikiluku nawa hamba kekala nansaku. (Chimwekeshu 15:3) Chineli Nzambi diyi Nsulu yawumi, twatela kudifukula kudi yena hohu nkawindi.—Tañenu Chimwekeshu 4:11.

2. Indi Nzambi wekala ñahi?

Kwosi muntu wamumonahu dehi Nzambuku muloña hiSpiritu, chalumbuluka nawu wukweti wumi wabadika nyijimba yayileñaleña yekala hamaseki. (Yowanu 1:18; 4:24) Yililu yaNzambi yamwekenaña muyuma yaleñayi. Chakutalilahu, neyi tutoñojoka yuma yaleñayi ninyikabu yashiyashana kushilahu ninkenu, twamonaña kukeña kwaNzambi nimaanindi. Kutoha kwamawulu niiseki kwatulejaña ñovu yaNzambi.—Tañenu Aroma 1:20.

Tunateli kudiza yuma yayivulu hayililu yaNzambi muBayibolu. Chakutalilahu, Bayibolu yatulejaña yuma yakeñayi Nzambi niyahelayi, chayakamenañayi antu nichazatañayi hayuma yambokamboka.—Tañenu Masamu 103:7-10.

3. Komana Nzambi wukweti ijina?

Yesu wahosheli nindi: “Tata yetu wekala mwiwulu, ijina deyi dijili.” (Matewu 6:9) Hela chakwila Nzambi wekala nankumbu jajivulu, wukweti ijina dimu hohu. Ijina denidi aditenaña munjila yambokamboka mwidimi nidimi. MuLunda twaditenaña netu “Yehova.”—Tañenu Masamu 83:18.

Ijina daNzambi adifumisha mumaBayibolu amavulu nakuhiñishamu nkumbu yakwila nawu Mwanta hela Nzambi. Ilaña hampinji yasonekeluwu Bayibolu, ijina daNzambi damwekeneña kapampa 7,000. Yesu watiyakesheli ijina daNzambi kuhitila mukudizatisha hakulumbulula Izu daNzambi kudi antu. Wayikwashili antu kumwiluka Nzambi.—Tañenu Yowanu 17:26.

  4. Komana Yehova watwakamenaña?

Yehova watwakamenaña kuhitila mukutiyilila kulomba kwetu hamuntu hamuntu. (Masamu 65:2) Komana makabi chinaswejuwu chaya mukwila nawu Nzambi hatwakamenañaku? Antu amakwawu ahoshaña nawu Nzambi diyi watukabishaña kulonda yatweseki, ilaña iku hikutwamba. Bayibolu yahosha nawu: “Nzambi kwila chatama kwakulehi!”—Yoba 34:10; tañenu Yakoba 1:13.

Nzambi watulemesha hakutwinka wuswa wakudifuukwila. Twamusakililaña Nzambi chikupu muloña watwinka wuswa wakutondahu kumukalakela. (Yoshuwa 24:15) Makabi anasweji muloña antu amavulu akeñaña kuyila akwawu yuma yatama. Yehova watiyaña kutama hakumona yuma yatama.—Tañenu Kutachika 6:5, 6.

Yehova keña yamuzatishi Yesu kulonda yafumishuhu makabi niantu aletaña makabi. Chayinu mpinji, Yehova wukweti muloña wawuwahi hakwiteja makabi hakapinji kantesha. Chibaaba chikwawu chikalondelahu chikashimuna muloña wetejelayi Nzambi makabi.—Tañenu Isaya 11:4.

5. Indi Nzambi wakeñaña nindi twili yumanyi?

Yehova watuleñeli nawuswa wakukeña kumwiluka nikumukeña. Wakeñaña nindi tudizi nsañu yalala yahosha hadi yena. (1 Timotewu 2:4) Neyi tudiza Bayibolu, tunateli kumwiluka Nzambi neyi Ibwambu detu.—Tañenu Yishimu 2:4, 5.

Chineli Yehova watwinka wumi, twatela kumukeña kubadika chitwakeña muntu wudi wejima. Tunateli kumwekesha netu twamukeña Nzambi kuhitila mukulomba nikwila yuma yatulejañayi. (Yishimu 15:8) Yehova wakeñaña nindi tukeñi akwetu antu.—Tañenu Maku 12:29, 30; 1 Yowanu 5:3.

Neyi munakukeña nsañu yikwawu, talenu kapetulu 1 kaniwu mukanda, waChumanyi Chacheni Chatañishaña Bayibolu? Wasonekawu Kudi AYinsahu JaYehova.

[Mwevulu wudi hefu 17]

Komana kudi muloña wawuwahi wetejelayi Nzambi makabi hakapinji kantesha?