Komana Chalala Nzambi Wayakamenaña?

KO MANA mwatoñojokaña nenu ayikeña? Indi kwiji mpinji yikwawu mwatoñojokaña nenu kwosi muntu wayakamenaña? Mukanu kaayi munasweji kwilawu antu yuma yayivulu nawa mudi antu adikeña aweni, munateli kutoñojoka nenu mwashikilamu wanyi. Kwesekeja nachalumbulula Bayibolu mpinji itunakushakamamu, makonu antu amavulu mukaayi anekali akwakudikeña chakwila hiyashaña muchima kudi akwawuku.—2 Timotewu 3:1, 2.

Hichikweti muloña nayaaka yikwetiyi muntu, chisemwa, idimi, hela ikowaku, antu ejima akeñaña nankashi nawu ayikeñi nikukeña akwawu antu. Kwesekeja nayileji yikwawu, atuleña munjila yakukeña akwetu nikuyitiyila luwi. Yehova Nzambi watuleñeli, weluka chikupu nindi twakeñaña antu atukeñi nikutuhameka kubadika muntu wudi wejima. Mukutiya ñahi neyi yayileja nindi wayilemesha chikupu? Chakadi nikujina, mukwiluka nenu wayilemesha nankashi. Komana tuneluki chikupu netu Yehova wakeña antu abula kuwanina? Komana watwakamenaña hamuntu hamuntu? Neyi watwakamenaña, chumanyi chaleñelaña muntu kwikala walema kudi Nzambi?

Yehova Wakamenaña

Yaaka 3,000 yinahituhu, ñimbi yamasamu wamwakamineña Nzambi wahayamini chamweniyi lubanji lwatutumbwa muluzwizu nawufuku. Chakadi nikujina ñimbi yamasamu welukili nindi Muntu waleñeli tutumbwa twakachindewaña wukweti ñovu jabadika nankashi. Chatoñojokeliyi chikupu hañovu jaYehova jabadika nikushinshika antu chiyekalawu akehelamu, ñimbi yamasamu wahayamini hakukeña kwaYehova, wahosheli nindi: “Chinukushinshika mawulu eyi, himudimu wanyinu yeyi, nikakweji nitutumbwa tuwunashuku; Nami, Muntu hichumanyi, mwaka wumushi kumuchima? Hela mwana kamuntu, mwaka wumuhempuli?” (Masamu 8:3, 4) Tunateli kukunkulula netu Mukwakubadika wekala kwakulehi chikupu nanetu hela netu hakweti mpinji yakutala antu abula kuwaninaku. Ilaña, ñimbi yamasamu welukili nindi hela chakwila tudi antu akehelamu chikupu nawa wumi wetu wakapinji kantesha, muntu walema kumesu aNzambi.

Ñimbi yamasamu mukwawu wahosheli nindi: “Yehova watiyaña kuwaha nawantu amwakamaña, nawantu achiñejaña luwi  lwindi.” (Masamu 147:11) Awa mazu ahoshawu munawa masamu alema nankashi. Yehova mukwakubadika, bayi neyi weluka hohu nindi antu ekala kwokuku. Ilaña ‘wayakamenaña’ nawa ‘wayitiyaña kuwaha.’

Wuprofwetu wamuBayibolu washimunaña yuma yinakumwekana makonu walumbulula chikupu iwu wunsahu. Kuhitila mudi kaprofwetu Hagayi, Yehova wahosheli nindi nsañu yayiwahi yaWanta waNzambi akayishimwañena mwahita iseki dejima. Chumanyi chafuminumu? Talenu chuma chimu hayuma yinakufumamu: ‘Nakakankisha ninyunza yejima, niyuma yatiyaña nyunza yejima kuwaha yakenza, nakenzesha italidi nakulema.’—Hagayi 2:7.

Indi ‘yuma yayiwahi’ yinakupompeshawu munyunza yejima hiyumanyi? Iyi yuma bayi neyi himahetaku. (Hagayi 2:8) Bayi neyi siliva niwuru diyi yazañaleshaña muchima waYehovaku. Watiyaña kuwaha nawantu adifukulaña kudi yena muloña amukeña hela chakwila hiyawaninaku. (Yishimu 27:11) ‘Hiyuma yayiwahi’ yamulemeshaña Yehova nawa walemesha kudihana kwawu nimudimu wamukalakelañawu. Komana ninenu mwamulemeshaña Yehova?

Antu hiyanateli kwiteja nawu antu abula kuwanina anateli kwikala amawahi kumesu aNleñi Wabadika mukuleña kwejimaku. Dichi, iyi nsañu yalala yikutuleñela kwiteja mutambi wakukundama kwakwihi naNzambi.—Isaya 55:6; Yakoba 4:8.

“Eyi Wasweja Kukeñewa”

Henohu kaprofwetu Danyeli washinakaja dehi, wamweni chuma chekomwesha ifuku dimu namelela. Hampinji yalombeleñayi Danyeli, kwenjili mwenyi walema nankashi chakukasumwisha. Ijina dindi wadiña Gabireli. Wamwilukili nindi hikañelu kaYehova muloña wamumonahu dehi. Gabireli wamulejeli nsañu yendeleliyi chakukasumwisha nindi: “Eyi Danyeli, ami nediki dehi dinu, nenzi nakukwinka wukalawenu wakwiluka mwaya yuma . . . muloña eyi wasweja kukeñewa.”—Danyeli 9:21-23.

Mpinji yikwawu, kañelu kaYehova wamulejeli Danyeli nindi: “Eyi Danyeli, eyi muntu wasweja kukeñewa.” Kuhiñahu, hakwila nawu yamukoleshi Danyeli, kañelu wahosheli nindi: “Eyi muntu wasweja kukeñewa, bayi wutiya womaku; kuwunda kwikali naneyi.” (Danyeli 10:11, 19) Danyeli amutena kapampa kasatu nawu “wasweja kukeñewa.” Iyi nhoshelu yalumbulula cheñi nawu “wasweja kulemeshewa.”

Chakadi nikujina, Danyeli welukili nindi wadiña wakundama kudi Nzambi yindi nawa nindi Yehova wetejeli mudimu wamukalakeleñayi. Ilaña mazu amawahi ahosheli Nzambi kuhitila mudi añelu jindi atela amukolesheli hama. Dichaletesheli Danyeli  kwakula nindi: “Wunankoleshi dehi.”—Danyeli 10:19.

Nsañu yayiwahi yahoshaña haluwi lwaYehova lwatiyililiyi kaprofwetu kindi washinshika ayisoneka Mwizu daNzambi kulonda tuhetelumu. (Aroma 15:4) Neyi tushinshika chakutalilahu chaDanyeli tukwiluka chuma chaleñelaña muntu kwikala wamuwahi kumesu aTata yetu wamwiwulu.

Dizenuña Izu daNzambi Mafuku Ejima

Danyeli wadiña kadizi waNyikanda wadikita. Tweluka chumichi muloña wasonekeli nindi: “Ami . . . nashinshikili kunyikanda mwachindiluwu nyaka . . . yakuwanisha nachu mahembi akuYerusalema.” (Danyeli 9:2) Nyikanda yazatishileñayi hayina mpinji yabombelelumu nyikanda yonenawu yaMosi, Davidi, Solomoni, Isaya, Yeremiya, Ezekeli niyawatuprofwetu amakwawu. Tunateli kutoñojoka netu Danyeli wadiña nanyivuñilu yambokamboka, wayitañileña chikupu nawa wesekejeleña mazu awuprofwetu ahosheleña hakufuntisha cheñi kudifukula kwalala muYerusalema. Danyeli watoñojokeleña nankashi mwatalishili awa mazu mwitala dindi dahewulu. Chikuhwelelu chindi chakoleli muloña wadizileña chikupu nawa wakundamini kwakwihi naYehova.

Kudiza Izu daNzambi kwamukwashili Danyeli kwikala nayililu yayiwahi muchihandilu chindi chejima. Nshimbi yamuNsona yadiziliyi hadiñayi kansi yamukwashili kwovwahila Nshimbi yaNzambi yahosheleña hayakudya yayijilikiluwu hayina mpinji. (Danyeli 1:8) Nkumininaku, washimwinini nsañu yaNzambi kudi anyanta amuBabiloni chakadi woma. (Yishimu 29:25; Danyeli 4:19-25; 5:22-28) Danyeli amwilukili nawu wadiña muntu wadikita, washinshika, nawa wakadi makasu. (Danyeli 6:4) Sweje-e dinu, chatela yafumpi kashinshi kindi kulonda yadamwini, Danyeli wamukuhweleleli Yehova. (Yishimu 3:5, 6; Danyeli 6:23) Dihafumini yekali “wasweja kukeñewa” kumesu aNzambi!

Makonu kudiza Bayibolu kwatupelela kubadika hayina mpinji yadiñaku Danyeli. Makonu tukweti nyikanda yaswayi kutaña kubadika kutaña nyivuñilu yayivulu yadiñaku hayina mpinji. Tukweti Bayibolu yamukuma, ninsañu yikwawu yasonekawu yahoshaña hawuprofwetu waDanyeli chiwashikijeweli. Nawa tukweti nyikanda yayivulu yashindamena haBayibolu niyitwa yikwawu yatukwashaña hakusandujola. * Komana mwazatishaña chiwahi iyi yitwa? Komana mwatanjika mpinji yakutaña Bayibolu mpinji yejima nikutoñojokahu chikupu? Neyi mwila mwenimu mukwikala neyi Danyeli. Mukwikala nachikuhwelelu niwubwambu wakola naYehova. Izu daNzambi dikuyilombolaña muchihandilu chenu, nawa mukwiluka nenu Nzambi wayakamenaña.

Kakelenu Kulomba Chakadi Kuzeya

Danyeli walemesheli chikupu kulomba muchihandilu chindi. Wadiña nakumulomba Nzambi yuma yakeñeleñayi. Hadiñayi mukwenzi, Mwanta Nebukaneza wamuBabiloni wamutiyishili woma nindi neyi yakañanya kulumbulula chilota chindi wukumujaha. Chakadi nikukwata kumatahu, Danyeli wamulombeli Yehova nindi yamukwashi nikumukiña. (Danyeli 2:17, 18) Chimwahitili yaaka, iwu kaprofwetu washinshika washimwini nshidi jindi ninshidi jawantu nawa wamulombeli Yehova nindi yayanakeni muloña wadizozeli nakwiluka nindi hawaninaku. (Danyeli 9:3-6, 20) Chelili Danyeli yakañanyi kwiluka yuma yamweniyi muchimwenu, wamulombeli Nzambi nindi yamukwashi. Ifuku dimu, kañelu wamuhempwili cheñi Danyeli kulonda yamukwashi kwiluka yuma, wahosheli nindi: “Mazu eyi ayitiyili.”—Danyeli 10:12.

Hela chochu, bayi neyi Danyeli washinshika wadiña nakumulembelela Nzambi hohuku. Mukanda waDanyeli 6:10 wahosha nawu: “Hakufukamaña manuñu, ifuku dimu mapampa kasatu, ifuku dimu mapampa kasatu . . . hakusakililaña kumesu aNzambi yindi, neyi chelilañayi hakusambila.” Kudi yuma yayivulu yaleñeleli Danyeli kumusakilila nikumuhameka Yehova. Nawa wakoñeleña mwenimu mpinji yejima.  Eñañi, walemesheli kulomba mukudifukula kwindi, chakwila hakeñeli kulekaku hela chakwila wumi windi wadiña hakatoña. Chakadi nikujina, Yehova wamukeñeli muloña wadiña washinshika.

Kulomba hichawana chabadika kulema nankashi. Bayi muhitishamu ifuku chakadi kuhosha naTata yenu wamwiwuluku. Bayi mujimbala kumusakilila nikumuhameka hayuma yayiwahi yejima yayikoñelañayuku. Mulejenu yuma yejima yimunakwakamena. Toñojokenu chakwiliyi Nzambi kulomba kwenu nawa musakililenuña. Ikalenu nampinji yeneni yakulomba. Neyi tumuleja Yehova yuma yejima yidi kumuchima, tukwiluka netu watukeña. Chumichi chatukoleshaña chikupu ‘kukakela kulomba chakadi kuzeya.’—Aroma 12:12.

Lemeshenu Ijina daYehova

Kwosi wubwambu wunateli kutwalekahu neyi muntu wumu yodikeña yomweni. Niwubwambu wetu naYehova wukutwalekahu wanyi neyi tudikeña etwaweni. Danyeli welukili chumichi. Shinshikenu chashiliyi chikupu muchima hakulemesha ijina daYehova.

Chelili Nzambi yaakuli kulomba kwindi kuhitila mukumuleja chilota chaNebukaneza nikulumbulula muchatalishili, Danyeli wahosheli nindi: “Ijina daNzambi wamwiwulu datela adikiswili nkisu haya nyaka nanyaka. Muloña diyi wukweti nimaana niñovu.” Nawa cheñi, hampinji yamulejeliyi Nebukaneza chilota nikulumbulula muchatalishili, Danyeli wamulemesheleña Yehova, nakukonkomwena nindi Yena hohu diyi “Wamwekeshaña hatooka yuma yakujinda.” Chochimu, hampinji yalembeleliyi nindi amwanakeni nikumupulwisha, Danyeli walombeli nindi: “Eyi Nzambi yami, . . . ilaku yumiyi hamujimba weyeyi aweni, muloña mukala weyi niantu eyi ayitumba ijina deyi.”—Danyeli 2:20, 28; 9:19.

Anetu nawa tukweti kukooleka kweneni nankashi kwakumwimbujola Danyeli. Neyi hitukulomba, twatela kumwekesha netu twakamenaña netu ‘ijina daNzambi dijili.’ (Matewu 6:9, 10) Hitunakukeña yililu yetu yileti kasawutu hejina daYehova dajilaku. Dichi, twatela kulemesha ijina daYehova kuhitila mukuleja amakwawu nsañu yayiwahi yaWanta windi.

Hela chochu, antu mukanu kaayi hiyakeña hela kwakamena akwawuku. Ilaña, kwiluka netu Yehova wakamenaña akwakudifukula indi hamuntu hamuntu hichuma chatukundejaña. Ñimbi yamasamu wahosheli nindi: “Yehova watiyaña kuwaha nawantu indi; wakawahisha awunda nawamwinu akela alubanji.”—Masamu 149:4.

[Tumazu twaheshina]

[Mazu ekoku adi hefu 11]

Nzambi wamwekesheli nindi wamukeña Danyeli kuhitila mukutemesha kañelu Gabireli kulonda yamukoleshi

[Mazu ekoku adi hefu 13]

Danyeli washili muchima hakudiza nikulomba nawa yumiyi yamukwashili kwikala nayililu yayiwahi yaletesheli Nzambi yamukeñi