Muloñadi Antu Amavulu Chadiseñelañawu?

“A Fwarisi hiyakwinza kudi yena [Yesu] nakumweseka nawu, Muntu kuseña iñodindi hansañu jejima chaloña, tahindi?”—Matewu 19:3.

ANTU amakwawu ashakamineña mumafuku aYesu ajinokeleña neyi antu atela kudiseña hela nehi. Yesu wayilejeli nindi: “Himunatañi nsañu yakwila nawu, wayileñeli hatachi, wayileñeli niiyala nimumbandaku, tahindi? nindi, Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu. Hiyadi cheñi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku.” * (Matewu 19:4-6) Chakadi nikujina, Nzambi wakeñeleña nindi antu adisumbula atwalekuhu kwikala hamu.

Mumatuña amavulu makonu, antu adisumbula akushika kumapasenti 40 hela kubadikahu ‘anakudambula,’ dikwila nawu anakudiseña. Komana kufumba kwaBayibolu kwahosha hamaluwi kwazatikaña wanyi? Komana antu adiseñaña muloña wakwila ntanjikilu yamaluwi yatama?

Talenu ichi chakutalilahu: Amayala ayedi niañodi jawu alanda nyotoka yadifwana. Adisumbula ayedi anakuhemba motoka wawu chachiwahi nikuwendesha chiwahi. Motoka wawu hiwafwañaku. Adisumbula amakwawu hiyekalaña nampanji yakuloñesha motoka wawuku nawa awendeshaña chatama. Motoka weniwu wufwa nikufwa nawa awunata nijonkolu. Munichi chakutalilahu chamuchiyedi motoka diwu wukweti kukala tahindi eni motoka diwu adi nakukala? Chakadi nikujina, eni motoka diwu akweti kukala.

Chochimu, antu amavulu chadiseñañawu hichaya mukwila nawu ntanjikilu yamaluwi yatamaku. Antu amavulu anakushakama chachiwahi mumaluwi amwekeshaña nawu ntanjikilu yamaluwi yayiwahi. Maluwi wenawa ekala amuzañalu nawa akoleshaña antu, yisaka, niantu amuchituñilu. Neyi chochimwatela kuhemba motoka chiwahi, maluwi niwena akeñekaña kuyihemba chiwahi nankashi hakwila nawu atwalekuhu.

Hela chakwila munadisumbuli katataka hela mwadisumbwili dehi, kufumba kwaBayibolu kwahosha hakuhemba maluwi chiwahi nikuyikolesha kwakwashaña hama. Talenu yakutalilahu yikwawu yidi hamafu analondeluhu.

[Tumazu twaheshina]