Dizenu Nsañu Yidi Mwizu Danzambi

Yesu Kristu Hinyi?

Hadaha mwadihulahu dehi malwihu adi munichi chibaaba nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova akutiya kuwaha kuhanjeka nenu hakwakula awa malwihu.

1. Yesu Kristu hinyi?

Kwambukaku nawantu amakwawu, Yesu wadiña mwiwulu namujimba wakuspiritu henohu kanda yenzi hanu heseki. (Yowanu 8:23) Diyi wadiña watachi kuleña kudi Nzambi, nawa diyi wamukwashiluku kuleña yuma yikwawu yejima. Diyi hohu aleñeluwu kudi Yehova, dichi chamutenenañawu nawu mwana kaNzambi ‘wumu hohu.’ Yesu wadiña Mukwakumuhoshelaku Nzambi dichamutenañawu cheñi nawu “Izu.”—Yowanu 1:1-3, 14; tañenu Yishimu 8:22, 23, 30; Akolosi 1:15, 16.

2. Muloñadi Yesu chenjililiyi hamaseki?

Nzambi watemesheli Mwanindi hamaseki kufuma mwiwulu kuhitila mukutuntulula wumi windi nakuwisha mwivumu dakankaña kaYudeya wejina daMariya wabulahu dehi kuhumañana neyala. Dichi Yesu hadiña natata yindi wawuntuku. (Luka 1:30-35) Yesu wenjili hamaseki (1) kulonda yatañishi nsañu yalala yahosha hadi Nzambi, (2) kwimika chakutalilahu chakwila mwaya muchima waNzambi ni (3) kuhana wumi windi wawanina neyi ‘ifutu danyiloña.’—Tañenu Matewu 20:28; Yowanu 18:37.

3. Muloñadi wutwakeñelaña ifutu danyiloña?

Ifutu danyiloña hiwuseya wafutañawu hakukuula nachu muntu muwuduñu. Nzambi hafuukwili nindi antu ashinakajeña hela kufwaku. Tweluka ñahi chumichi? Nzambi wamulejeli muntu watachi, Adama nindi neyi yakoña chuma chatenañawu muBayibolu nawu nshidi wakafwa. Neyi chakwila Adama wavulumwini wanyi mutenowu hadi kufwaku. Hela chakwila Adama washakamini yaaka yayivulu, watachikili kufwa dodina ifuku dadikañiliyi naNzambi. (Kutachika 2:16, 17; 5:5) Adama wayisambwishili anyanindi nshidi nikufwa. Dichi kufwa ‘kweñilili’ mumpata yamunu mwishina kuhitila mudi Adama. Dimuloña wutwakeñelaña ifutu danyiloña.—Tañenu Aroma 5:12; 6:23.

  4. Muloñadi Yesu chafwililiyi?

Hinyi watela kufuta ifutu danyiloña kulonda atukuuli kukufwa? Wufwetu wutwafwetaña hamuloña wanshidi jetu hikufwa. Chineli twawanina wanyi hitunateli kufwetela muntu wudi wejima ifutu danyiloñaku.—Tañenu Masamu 49:7-9.

Chineli Yesu haswanini nshidi kufuma kudi tata yindi wawuntuku, bayi neyi wafwili muloña wanshidi jinduku, ilaña wafwilili nshidi jawantu. Nzambi watemesheli Mwanindi kwinza nakutufwila muloña wakukeña Kwindi kwasweja kwakeñayi antu. Yesu niyena wamwekesheli nindi watukeña kuhitila mukumwovwahila Tata yindi nikuhana wumi windi hanshidi jetwetu.—Tañenu Yowanu 3:16; Aroma 5:18, 19.

5. Indi Yesu nakwiladi makonu?

Yesu wamwekesheli yuma yikakoñelayi antu ejima ovwahila kuhitila mukuuka akata, kusañula afu nikuhana wumi windi wakukuula nachu antu kunshidi nikufwa. (Luka 18:35-42; Yowanu 5:28, 29) Yesu chafwiliyi, Nzambi wamusañwili namujimba waspiritu. (1 Petulu 3:18) Kufuma tuhu hayina mpinji, Yesu wadiña nakutalila kuchikasa chaNzambi chachidiilu kushika nimpinji yamwinkeluwu ñovu yakuyuula neyi Mwanta weseki dejima kudi Yehova. (Aheberu 10:12, 13) Makonu Yesu nakuyuula neyi Mwanta mwiwulu, nawa atumbanji twindi hanu heseki anakushimwina nsañu yayiwahi mukaayi kejima.—Tañenu Danyeli 7:13, 14; Matewu 24:14.

Yesu keña yazatishi ñovu jindi jaWanta kulonda yafumishuhu makabi niantu aletaña makabi. Antu amavulu amukuhwelela Yesu nawa amwovwahilaña akadiluñisha wumi muparadisa heseki.—Tañenu Masamu 37:9-11.

Neyi munakukeña nsañu yikwawu, talenu kapetulu 4 kaniwu mukanda waChumanyi Chacheni Chatañishaña Bayibolu? Wasonekawu Kudi AYinsahu JaYehova.

[Mwevulu wudi hefu 25]

Antu amavulu amukuhwelela Yesu nawa amwovwahilaña akadiluñisha wumi muparadisa heseki