Kundamenu Kwakwihi Nanzambi

Atushinakaji Akekala Cheñi Anyikwenzi

HINYI hakachi kwetu wakeñaña kushinakaja, kukonyata ikowa, kubula kumona chiwahi, kujika matu, nikukata nyendu? Munateli kwihula nenu, ‘Muloñadi Nzambi chatuleñeliyi nindi, twikaleña nañovu kuwansi nkumininaku hitukukabakana nakukala kwenzaña hamuloña wakushinakaja?’ Nsañu yayiwahi yidi yakwila nawu Nzambi hakeñeleña nindi tushinakajeñaku. Nawa wakana nindi wukafumishahu wushinakaji. Shinshikenu mazu amulejeluwu nkakulula Yoba, ekala haYoba 33:24, 25.

Talenu chadiñayi Yoba, muntu wakashinshi akeñeluwu kudi Yehova. Yoba wadiñi muwilaji hampinji yajinookeliyi Satana kashinshi kindi, nakuhosha nindi wamukalakeleleña Nzambi hamuloña wayuma yamwinkeliyi. Yehova wamukuhweleleli Yoba chikupu, muloña welukili nindi Wukweti ñovu yakufumishahu yuma yatama, wamwitejeli Satana kumweseka Yoba. Dichi Satana ‘wamukatishili Yoba namahuti akata nankashi kufumisha kumadachilu ndo-o nimwishina damutu.’ (Yoba 2:7) Yoba welili mavunyi mumujimba, nawa ikowa dindi dabalokeli, deyilili nikuwoka. (Yoba 7:5; 30:17, 30) Toñojokenu kukata kwatiyileñayi Yoba. Hela chochu, Yoba wadiña nakashinshi, wahosheli nindi: “Hinamba kafumisha kashinshi kamuku, nichinamba kafwa.”—Yoba 27:5.

Hela chochu, Yoba wakoñeli chiluwa cheneni. Chelukiliyi nindi keña yofwi, wakameneni nankashi, ‘nakudiyiñisha yomweni chakubula kuyiñisha Nzambi.’ (Yoba 32:2) Elihu wamwimeneneñaku Nzambi wamuzuwilili Yoba. Ilaña Elihu wamulejeli cheñi Yoba nsañu yayiwahi yafumini kudi Nzambi nindi: “Mupulwishenu [Yoba] abuli kuya mwikela [mwijamu], namona dehi yakumukuula nachu [ifutu danyiloña]. Mujimba windi wukwila se-ne-ne, chakubadika wamwana wanyanya; wukufunta cheñi muwukwenzi windi.” (Yoba 33:24, 25) Awa mazu atela amuleñeleleli Yoba kwikala nakuchiñeja. Hadi kutwalekahu nakukabakana kabakane-e kushika nikwifuku dakufwaku. Yoba wabalumukili mumuchima nawa Nzambi watiyili kuwaha kutambula ifutu damuloña dahaniniyi nikumukuula kuyihuñu yindi. *

Yoba watiyilili chamufumbiluwu nawa wabalumukili mumuchima. (Yoba 42:6) Chakadi nikujina Yehova wetejeli chuma chakukuula nachu chaheniyi Yoba, chakubuta nachu chiluwa chindi, hakwila nawu Nzambi yamukiswili cheñi. Yehova “hakumukoolekesha Yoba; kukooleka kwamukoolekesheliyi kwakukuminina kwabadikili kwakusambila.” (Yoba 42:12-17) Toñojokenu Yoba chatiyili kuwaha, chamukiswililuwu kuhitila mukumuuka mahuti akata nankashi nawa mujimba windi ‘wafuntili cheñi kuwukwenzi windi.’

Chuma chakukuula nachu hela ifutu danyiloña daheniyi Yoba kudi Nzambi dazatikili hakapinji kantesha hohu, muloña wachidiña mukwanshidi nkumininaku wafwili. Tukweti ifutu danyiloña dabadika kulema. Yehova waheni Mwanindi, Yesu kwikala ifutu danyiloña yetu. (Matewu 20:28; Yowanu 3:16) Ejima akuhwelela mwifutu danyiloña akweti kuchiñeja kwakushakama haya nyaka muparadisa hamaseki. Mwituña dadiha, Nzambi wakafuntisha antu akashinshi kuwukwenzi. Kwila mudiza nsañu yayivulu yinakuhosha hachimwatela kushakama hayina mpinji ‘yakafuntawu cheñi atushinakaji kuwukwenzi’ nehi?

[Tumazu twaheshina]