Dizenu Nsañu Yidi Mwizu Danzambi

Chumanyi Chafuukulayi Nzambi Kwiseki?

Hadaha mwadihulahu dehi malwihu adi munichi chibaaba nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova akutiya kuwaha kuhanjeka nenu hakwakula awa malwihu.

1. Chumanyi chafuukulayi Nzambi kwiseki?

Iseki dekala dakushakama antu. Hanyima yakuleña añelu ashakamaña mwiwulu, Nzambi waleñeli muntu kulonda yashakameña heseki. (Yoba 38:4, 7) Dichi, Yehova wamushili muntu watachi mwitempa dadiwahi datenañawu nawu Edeni kulonda akadiluñishi kushakama haya nyaka nawanyanindi.—Kutachika 2:15-17; tañenu Masamu 115:16.

Itempa daEdeni dadiña iluña danyanya hohu hanu hamaseki. Eyala namumbanda atachi, Adama niEvu ayilejeli kuvwala anyana. Antu chiyadi kusemununa nakuvula adi kuwahisha iseki kulonda dikali paradisa. (Kutachika 1:28) Iseki hiyamba kadikisañanaku.—Tañenu Masamu 104:5.

2. Muloñadi iseki chidabulila kwikala paradisa makonu?

Adama naEvu adikañili naNzambi, dichi ayihañili muEdeni. Paradisa yajimbeli nawa kwosi muntu watwesha kubalumuna iseki kwikala paradisa. Bayibolu yahosha nawu: “Iseki adinka dehi mumakasa awatama.”—Yoba 9:24; tañenu Kutachika 3:23, 24.

Hela chochu, Yehova havulamena chuma chafuukwiliyi hatachi kutalisha hadi antuku, nawa Nzambi hamba kakañanyaku. (Isaya 45:18) Antu akashakamaña cheñi neyi chochafuukwiliyi hatachi.—Tañenu Masamu 37:11.

3. Indi Nzambi wakaleta ñahi kuwunda hamaseki?

Hakwila nawu antu akashakami kumatelu awunda, Nzambi wakasambila kufumishahu antu atama. Hanjita yaAmagedoni, añelu jaNzambi akajilumuna antu ejima adikañaña naNzambi. Satana akamukasa hadi yaaka 1,000, ilaña antu amukeña Nzambi akapuluka kulonda akashakami mwituña dadiha hamaseki.—Tañenu Chimwekeshu 16:14, 16; 20:1-3; 21:3, 4.

  4. Indi makabi akamana mpinjinyi?

Yesu wakayuulilaña adinu iseki mwiwulu hadi yaaka 1,000 nawa iseki dikekala cheñi paradisa. Nawa wukanakena nshidi yawantu amukeña Nzambi. Eñañi, Yesu wakafumishahu yikatu, wushinakaji, nikufwa.—Tañenu Isaya 11:9; 25:8; 33:24; 35:1.

Mpinjinyi yamba kajilumunayi Nzambi antu atama hadinu heseki? Yesu waheni “chinjikijilu” chakwiluka nachu nawu kukuma kudi kwakwihi. Yuma yinakumwekana makonu yinakutiyisha antu woma muchihandilu nawa yinakumwekesha nawu tunakushakama mumafuku ‘akukuma kwanyaka yamakonu.’—Tañenu Matewu 24:3, 7-14, 21, 22; 2 Timotewu 3:1-5.

5. Anyi akashakama muParadisa yakumbidi?

Yesu wayilejeli atumbanji twindi kwilisha atumbanji nikuyitañisha yililu yaNzambi yakukeña. (Matewu 28:19, 20) Yehova nakudizisha antu amavulu nankashi mukaayi kejima chakushakama mwituña dadiha hanu heseki. (Zefwaniya 2:3) Hamatala aWanta awa aYinsahu jaYehova, antu adizaña chakwikala amayala niatata jawantu amawahi nichakwikala ambanda niamama jawantu amawahi. Anyana nianvwali adizilaña hamu yuma yayikwashaña kukuhwelela nawu akekala nachihandilu chachiwahi kumbidi.—Tañenu Mika 4:1-4.

Munateli kuwana antu amukeña Nzambi nawa adizaña chakumuzañalesha Hetala daWanta.—Tañenu Aheberu 10:24, 25.

Neyi munakukeña nsañu yikwawu, talenu kapetulu 3 kaniwu mukanda, wasonekawu kudi aYinsahu jaYehova.

CHUMANYI Chacheni CHATAÑISHAÑA BAYIBOLU?