Dizenu Nsañu Yidi Mwizu Danzambi

Komana Kudihu Kuchiñeja Kwawafu?

Hadaha mwadihulahu dehi malwihu adi munichi chibaaba nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova akutiya kuwaha kuhanjeka nenu hakwakula awa malwihu.

1. Kuchiñejanyi kutukweti kutalisha hadi afu?

Yesu chashikiliyi muBetani kwakwihi naYerusalema, mwahitila mafuku awana kufuma hafwiliyi ibwambu dindi Lazaru. Yesu wayili kumajamu nawahela kaLazaru, Mata niMariya. Hashimbwili wanyi, antu apompeli. Mata niMariya azañaleli nankashi chelili Yesu yamusañuli Lazaru.—Tañenu Yowanu 11:20-24, 38-44.

Mata wakuhweleli nindi afu akasañuka. Ambuña aYehova ashinshika eluka nawu kumbidi Nzambi wakasañula afu nawa akashakama cheñi hamaseki.—Tañenu Yoba 14:14, 15.

2. Indi afu ekala ñahi?

Hela chakwila muuya wawumi hela “spiritu,” yaleñelaña antu nianyama kwikala amomi, kwosi wumi watwalekañahu kuhanda neyi mujimba wunafwi. (Mukwakutaŋisha 3:19; Kutachika 7:21, 22) Tukweti nyijimba yawumbiluwu nalunkuñu. (Kutachika 2:7; 3:19) Neyi woñu wunafwi, yitoñojoka yetu yakisikaña. Dichi, chelili anamusañuli dehi, Lazaru washimwini wanyi yuma yamweniyi chafwiliyi muloña afu hiyeluka chumaku.—Tañenu Masamu 146:4; Mukwakutaŋisha 9:5, 10.

Mwamweni, afu akabakanaña wanyi. Dichi ntañishilu yakwila nawu Nzambi wakabishaña antu neyi anafwi yakutwamba. Iyi ntañishilu yamutwambilaña Nzambi. Nsañu yakukabisha antu mukesi yamuhilishaña Nzambi.—Tañenu Yeremiya 7:31.

  3. Komana tunateli kuhosha nawafu?

Afu ahoshaña wanyi. (Masamu 115:17) Ilaña neyi añelu atama anakuhosha nawantu, anateli kudimbana nakudifwikija neyi hispiritu yamuntu wafwa. (2 Petulu 2:4) Yehova wakaanisha kuhanjeka nawafu.—Tañenu Kuhituluka 18:10, 11.

4. Anyi akasañulawu?

Mwituña dadiha dinakwinza, antu amavulu adi mumajamu akasañuka. Hela antu akoñeleña yuma yatama hamuloña wakubula kumwiluka Yehova akayisañula.—Tañenu Luka 23:43; Yililu 24:15.

Antu akasañulawu akadiza chalala hadi Nzambi nikumukuhwelela Yesu kuhitila mukumwovwahila. (Chimwekeshu 20:11-13) Antu akasañulawu nawa akakoñaña yuma yayiwahi akadiluñisha wumi hamaseki haya nyaka. Hela chochu, antu amakwawu akasañuka akatwalekahu kukoña yuma yatama. Chineli antu wenawa akayisompesha kwesekeja nayuma yatama yakakoñañawu, “akasañukila kuyisompesha.”—Tañenu Yowanu 5:28, 29.

5. Indi kusañuka kwatulejaña chumanyi hadi Yehova?

Kusañuka kukekala kwoku muloña Nzambi watemesheli Mwanindi kulonda yatufwili. Dichi chumichi chamwekesha kukeña niluwi lwaYehova lwasweja.—Tañenu Yowanu 3:16; Aroma 6:23.

Neyi munakukeña nsañu yikwawu, talenu kapetulu 6 ni 7 kaniwu mukanda, wasonekawu kudi aYinsahu jaYehova.

CHUMANYI Chacheni CHATAÑISHAÑA BAYIBOLU?

[Mwevulu wudi hefu 26]

Adama amuleñeli nalunkuñu