Malwihu Ehulañawu Antañi . . .

Komana akwaKristu ejima ashinshika ayaña mwiwulu?

▪ Antu amavulu ataña awa mazu aYesu akukundeja akwila nawu: ‘Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.’ (Yowanu 3:16) Komana Yesu watalishili mukwila nindi antu ejima ashinshika adifukulaña kudi Tata yindi, Yehova Nzambi, akaya mwiwulu nakudiluñisha wumi wahaya nyaka?

Talenu mazu aYesu atuleñelaña kutoñojoka chikupu akwila nawu: “Hikudi muntu wakandamahu dehi mwiwuluku, chiña yowu wasulukili mwiwulu, diyi Mwana kamuntu wekala mwiwulu.” (Yowanu 3:13) Iyi nsañu yinakumwekesha nawu akwakudifukula ashinshika akunyima, adi neyi Nowa, Abarahama, Mosi niDavidi aya mwiwulu wanyi. (Yililu 2:34) Hanu dinu ayili kudihi? Mukwihihisha: Antu ashinshika akunyaka ekala mumajamu, afwa, kwosi chuma chelukawu ahembelelaña kusañuka.—Mukwakutaŋisha 9:5, 6; Yililu 24:15.

Yesu diyi wasambilili kushimuna nindi antu amakwawu akaya mwiwulu neyi anafwi. Wayilejeli apostolu indi nindi wakayiloñeshela iluña dakushakama mwiwulu. (Yowanu 14:2, 3) Ichi chadiña chuma chawenyi kudi antu jaNzambi. Kuhiñahu kapostolu Pawulu walumbulwili nindi hanyima yakufwa kwaYesu nichasañukiliyi nakuya mwiwulu ‘wabuzilili atumbanji twindi njila yayiha,’ kwosi muntu wayahu dehi muniyi njilaku.—Aheberu 10:19, 20.

Komana chaya mukwila nawu kufuma tuhu hayina mpinji antu ejima ashinshika ayaña mwiwulu? Inehi, muloña antu amakwawu asañukilaña kuwumi wamwiwulu ayinka mudimu wakuzata. Hawufuku wakukumishaku kwikala hamu nawapostolu indi, Yesu wayilejeli nindi ‘akashakama hamatanda awanta nakusompesha’ muWanta windi wamwiwulu. Dichi mudimu wukekala wakuyuula hamu naYesu mwiwulu.—Luka 22:28-30.

Bayi neyi apostolu hohu diwu atambwilili iwu mudimu wawuwahuku. Kapostolu Yowanu wamumweni Yesu muchimwenu hamu nezaza dawantu asañwiluwu kwikala nawumi wamwiwulu atenawu nawu ‘wanta niatupristu akayuula hamaseki.’ (Chimwekeshu 3:21; 5:10) Adiña añahi? Neyi chochekala munfulumendi yejima, antu antesha hohu diwu ayuulaña. Dichekala niWanta wamwiwulu. Yesu Mwana kaMukoku waNzambi, wayuulaña hamu nawakwawu anyuuli a 144,000 ‘akuulawu mukachi kawantu.’—Chimwekeshu 14:1, 4, 5.

Eñañi, a 144,000 hiyantu antesha neyi tuyesekeja nakuvula kwawantu ejima ashinshika, akunyaka niamakonu. Chinateli kwikala muniyi njila muloña a 144,000 ayisañwilaña kuwumi wamwiwulu kulonda akakalakali mudimu wajila. Neyi munakukeña kutuña itala komana munateli kuzatisha antu ejima eluka kutuña mwiluña denu? Inehi. Munateli kuzatisha hohu antu anakukeñeka kuzata mudimu. Chochimu, bayi neyi Nzambi watonda antu ejima ashinshika kwikala nakukooleka kwakuyuula naKristu mwiwuluku.

Iyi nfulumendi yamwiwulu yikazata mwafuukwiliyi Nzambi hatachi kutalisha hadi antu. Yesu hamu nawakwawu anyuuli a 144,000 akalombola mudimu wakubalumuna iseki dejima kwikala paradisa, kulonda antu amavulu nankashi ashinshika akashakami haya nyaka namuzañalu. (Isaya 45:18; Chimwekeshu 21:3, 4) Kushilahu niantu anukañayi Nzambi akasañulawu.—Yowanu 5:28, 29.

Akwakudifukula aYehova ejima ashinshika akunyaka niamakonu anateli kutambwila ichi chawaana chasweja kulema chawumi wahaya nyaka. (Aroma 6:23) Antu antesha hohu diwu akatambwila wumi wamwiwulu kulonda akakalakali mudimu walema, ilaña amavulu akatambwila wumi heseki muparadisa.