Kundamenu Kwakwihi Nanzambi

Kukundeja Abaluka Nyichima

MUMBANDA wumu mukwaKristu wayandili nachineñi mukuhanda kwindi wahosheli nindi, ‘Yehova hamba kankeñaku.’ Wakuhweleleli chikupu nindi Yehova wudi kwakulehi nayena. Komana chalala Yehova wekala kwakulehi nawakwakudifukula indi aneña? Ñakwilu yakukundeja yekala mumazu onenawu añimbi yamasamu Davidi asonekawu haMasamu 34:18.

Davidi welukili kukala kwafumañamu neyi mukwakudifukula washinshika waYehova yasweja kuneña. Hachidiñayi kansi, Davidi washakamineña neyi itunduka amuhañileña chakadi kuleka kudi Sawulu, mwanta wadiña nechima wafwilileña kumujaha. Davidi wayili nakuswama kwiluña kwatoñojokeleñayi nindi Sawulu hatela kumuwanaku, mumusumba waGati wawayilumbu jindi mwituña dawaFwilistinu. Chelili amwiluki, Davidi wapulukili kuhitila mukutwamba neyi nazaluki. Davidi wamuhamekeli Nzambi hakumupulwisha nawa wasonekeli Masamu 34, kushindamena hayuma yamweniyi muchihandilu.

Komana Davidi wakuhweleli nindi Nzambi wekala kwakulehi nawantu adineñaña hela atoñojokaña nawu Nzambi hayisha kumuchimaku? Davidi wasonekeli nindi: “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.” (Vasi 18) Tushinshikenu awa mazu chiyatukundejaña nichiyatuleñelaña kwikala nakuchiñeja.

‘Yehova wudi kwakwihi.’ Mukanda wumu wahosha nawu iyi nhoshelu “yamwekeshaña nawu Mwanta washaku muchima hela wasoñama, wakeñaña kukwasha antu jindi mpinji yejima.” Kwiluka netu Yehova wakamenaña antu jindi kwatukundejaña hama. Wamonaña kukala kwejima kwamonañawu muyinu “nyaka yakala,” nawa weluka yitoñojoka yawu yakumuchima.—2 Timotewu 3:1; Yililu 17:27.

‘Nawantu abaluka nyichima yawu mwivumu.’ Muyisemwa yikwawu ‘kubaluka muchima’ hikukeña muntu wabulaña kukukeña. Ilaña kwesekeja nachahosheli muntu wumu wadiza chikupu, mazu añimbi yamasamu atalisha “kuchineñi chatiyañawu antu ejima.” Eñañi, akwakudifukula aNzambi ashinshika mpinji yikwawu amonaña kukala kwasweja kwabalulaña nyichima yawu.

‘Antu akweti spiritu yachikeka puchi.’ Antu aneña anateli kudimona neyi amukunkulwayi chakwila akutoñojokaña neyi yuma yejima yakawaha wanyi. Mukanda wazatishañawu akwakubalumuna Bayibolu wahosha nawu iyi nhoshelu atela kuyisoneka nawu “antu abula yuma yayiwahi yakuchiñeja.”

Indi Yehova welañadi nawantu “abaluka nyichima” nawa “akweti spiritu yachikeka”? Komana wekala kwakulehi nawena, nakuyimona neyi hiyantu amukunkulwayi nawa hatela kuyikeña nikuyisha kumuchimaku? Kwakulehi. Kufwana nvwali wukweti kukeña wakundejaña mwanindi neyi naneñi, Yehova wekala kwakwihi nawakwakudifukula indi amulembelelaña nawu yayikwashi. Wafwilaña kukundeja nikuwundisha nyichima yawu yabaluka nispiritu yachikeka. Nateli kuyinka maana niñovu yatela kuyikwasha kuumika kukala kudi kwejima kwatela kumonawu.—2 Akorinda 4:7; Yakoba 1:5.

Kwila mudiza chimwatela kukundama kwakwihi naYehova nehi? Iwu Nzambi wukweti luwi wakana nindi: “Ami nashakama . . . hamu namuntu wukweti muchima wachikeka, wadizoza, kulonda nihizumwishi nyichima yawantu adizoza, nihizumwishi nawa nyichima yawantu akweti nyichima yachikeka.”—Isaya 57:15.