Muchihandilu Chami Nakeñeleña Kwenda Nakuhema Yisela

Washimwini Zoya Dimitrova

Hinadiña nayaaka 15 nadiluñishileña yuma yinafwilileña muchihandilu, kuhema yisela yakukiloka nikwenda. HaSeptember 4 mu 1970 kwamwekeni maposu. Nakilukili chiwahi hewulu. Kutwala muna naholokeli hamaseki.

NAVWALIKILI haDecember 16, 1952, nawa nashakamineña nawanvwali jami niyayami wamumbanda mumusumba waSofia, muBulgaria. Hayina mpinji, ituña daBulgaria dadiña muCommunism nawa nfulumendi yetejeli nsakililu ilaña antu ayikañesheleña chikupu kupompa. Antu amavulu hiyamukuhweleleli Nzambuku, nawa antu amukuhweleleli adiña nakusweka yuma yakuhweleleluwu. Hela chakwila chisaka chami chahosheleña nawu twekala muchipompelu chaOrthodox, nayileña muchipompelu wanyi nawa hinadiña nakutoñojoka hadi Nzambuku.

Hinachidiñi kansi nakeñeli chikupu yisela yakudishiyamu yidi yejima, sweje-e dinu yisela yakanfulamakondi. Chinadiña nayaaka 13 yakusemuka, hashikola yetu henjili iyala wumu wakeñeleña kansi wamumbanda wakudizisha kuhema chisela chakukiloka. Ntañishi yami wadiñi nakundizisha chisela chakanfulamakondi wanhamekeli. Natiyileña kuwaha kwendela mumotoka yamukulumpi, motoka yakuAmerica, hitwayileña nakuñihujola nikuñeseka kudi akwakundizisha. Natiyili kuwaha chantondeluwu. Diyi mpinji yinatachikili kuzata nañovu hakudiza nikulondela chikupu nshimbi yanlejeluwu kutalisha hayakudya yinateleleleña kudya nawa nadizili hadi yaaka yiyedi natukweji. Chinashikijili yaaka 15 namanishili kudiza nawa natachikili kuhema yisela yakukiloka yinakeñeleña muchihandilu nikwenda. Hakusambila nahitañeni muBulgaria mwejima nikumatuña adiña aSoviet Union, niAlgeria, Hungary, niituña dateneneñawu nawu Yugoslavia.

Nadiluñishili chikupu yuma yinakeñeleña muchihandilu chami hayaaka yisatu. Maposu alumbululawu hewulu, amwekeni hampinji yinadiña nakuhema chisela kwituña daTitov Veles Macedonia. Nadiña nakuhema chisela chakanfulamakondi hewulu. Mukwetu mutwahemeneneña wadiña nakunata hewulu chamuntu mwishina chanyendu mwiwulu, kufumahu wukumbakila hakufunta mwishina. Napusumukili mumakasindi nawa mwonji wami wakudikiña nachu waketukili, naholokeli jimita 6 kufuma hewulu nakushika hamaseki. Antemwishilili kuchipatela nawa anlejeli nawu chikasa, mbanvu jajivulu nimoñololu wunakotoki. Nakatili nankashi mafuku antesha nawa nelukili wanyi chuma chamwekeni. Chinatiyiluku chiwahi, nelukili nami mujimba welili kalepa kutachikila mumbunda nakushika kunyendu. Chineli nachidiña kansi, natoñojokeleña nami akañuka hela kunladika, nakatachika cheñi kwenda nawa nakafunta cheñi nakuhema yisela yakukiloka.

 Añukilili muyipatela yashiyashana hadi yaaka yiyedi nachikunku nawa natwalekeluhu kukuhwelela nami nikakola. Nkumininaku, nelukili nami hinamba kahema cheñi yiselaku. Ichi dinu nateleleli kuhimpa “chihandilu chinakeñeleña chakwenda nakuhema yisela” nachihandilu chakwendela hachitwamu chatufumbu.

Kutachika Chihandilu Chachiha

Chinelili nekali dehi chifwayi, natoñojokeli nami nikutwesha wanyi kutachika kwendela muchitwamu chatufumbu. Chineli nakuhweleli nami nakakola wanyi naneñeli nankashi. Muchaaka cha 1977 kwitala kwenjili mukwenzi weyala wejina daStoyan. Chineluki nami himana kwamukwetu mutwahemeneneña, namwiñijili mwitala. Hampinji yitwahanjekeleña, wañihwili neyi chakwila nakuhwelela nami nakakola cheñi. Muloña wakwila natiyili kutama chinahandileña namwakwili nami nakakola wanyi. Chanlejeliyi nindi Nzambi diyi watela kunkwasha hohu, namwakwili nakuhila nami, “Neyi chakwila kwekala Nzambi, muloñadi chinnakumwena kukala kwejimiku?”

Chinahosheli awa mazu, Stoyan wekalili chinsahu chaYehova hampinji yazatileñayi kuUnited States neyi mukwakuhema yisela yakukiloka, wanlumbulwilili yikaninu yayiwahi yamuBayibolu yakumbidi. Nazañaleli hakwiluka nami iseki keña dikali paradisa. Chikaninu chakwila nawu “hikwakekala nawa cheñi kufwaku; hikwakekala nawa cheñi hela kuneña hela kudila hela kukataku” chanshikili hamuchima. (Chimwekeshu 21:4) Natalilaña mpinji yinakakola cheñi. Netejeli kundizisha Bayibolu mpinji yejima chakubula kumba mpinji. Dichi natachikili chihandilu chachiha. Mwalala, nekalili nakuchiñeja kwalala.

Nakeñeleña nankashi kudiza Bayibolu mulungu nimulungu. Natachikili kudiza naStoyan, kuhiñahu naTotka Chinsahu wukweti luwi. Wankwashili kwiluka chikupu nsañu yalala yamuBayibolu swayi-swayi nawa nadihanini kudi Yehova Nzambi. Hayina mpinji, muSofia himwadiña muntu washikahu wateleleli kumpapatishaku, dichi nahembeleleli mana kwetu wakuMacedonia wenjili nakuhempula. HaSeptember 11, muchaaka cha 1978, ampapatishilili mwitala dami dakuwelela chimwahitili chaaka chimu kufuma hampinji yinatachikili kudiza Bayibolu. Chinapapatisheweli nakwikala Chinsahu chaYehova nazañaleli nawa nekalili nakuchiñeja kwalala muwumi wami.

Chalala chamuBayibolu chinadizili chadiña nakuñocha kumuchima neyi kesi. Nafwilileña chikupu kulejaku antu ejima enjileña kwitala dami yuma yayiha yinakuhweleleli. Chawushona, kwosi muntu washileñaku maana, hadaha atoñojokeleña nawu chineli nadiña mumaposu hinatoñojokeleña chiwahuku.

Nakoñeli Chiluwa Cheneni

Hayina mpinji, aYinsahu jaYehova muBulgaria ayilekesheli kupompa nikushimwina nawa mwadiña aYinsahu antesha hohu mwituña dejima. Himwadiña chipompelu chinatela  kupompelaku nawa hinavulileña kudikunda nawantu akuhweleleli yuma yinakuhwelelaku. Kubula kupompa kushilahu nikubula kwiluka wubanji wekala mukudikunda nawantu abulaña kwovwahila nshimbi jaBayibolu, kwakojejeli kukoña chiluwa cheneni.

Chinleji chami chamuchima chankabishileña mpinji yejima, nawa kumuchima kwankatileña hakwambuka kudi Yehova Nzambi. Nadiña nachikela nawa natiyili nsonyi, dichi nalombeli kudi Yehova nikumulembelela nami yañanakeni. Nkumininaku aeluda akwaKristu akweti kukeña ankwashili kwikala cheñi nawulunda naYehova nawa natachikili kumukalakela namuzañalu. Nalemesha chikupu kumukalakela Yehova nachinleji chamuchima chitooka nikudikunda nakuloñesha kwindi kwawunyonji.

Nazañalalaña Hela Chakwila Nekala Chifwayi

Maposu amwekeni yaaka 40 yinahitihu anleñeleleli kubula kuhema yisela yinakeñeleña muwumi wami nikwenda nawa nendelaña muchitwamu chatufumbu. Hela chochu, neyi nanuka naditoñeshaña wanyi nami nakañanya kushikija yuma yinakeñeleña muwumi wami. Nsañu yalala yamuBayibolu yankwasha kwiluka nami yuma yinakeñeleña kudiluñisha hakuhema yisela yakukiloka yadi kunletela muzañalu wakapinji kantesha. Nadimweni namesu kapu kukala kuyamonawu akwetu mutwahemeneneña atwalekeluhu kuhema iyi yisela yakukiloka. Kwambukaku, nawani maheta alema, wulunda naNleñi yami, Yehova Nzambi. Chumichi chanzañaleshaña nankashi kubadika muzañalu wunatiyileña hakuhema yisela yakukiloka.

Kubombelahu, nazañalalaña nankashi hakumona antu amavulu anakwiluka nsañu yalala yamuBayibolu nikudihana kudi Nzambi yetu wukweti kukeña, Yehova. Chinatachikili kudiza Bayibolu mu 1977, muBulgaria mwadiñi aYinsahu jaYehova antesha hohu. Hela tuhu mu 1991, chaaka chasonekesheluwu aYinsahu jaYehova katachi, chamanini chiyuulu chaCommunist, himwadiña aYinsahu akubadika nkulakaji mwituña dejimaku. Nazañalali hama hakumona naambala yawakwakushimwina aWanta anakuvulilaku, makonu akwakushimwina adi kwakwihi na 1,800.

MuBulgaria muchidi mudimu weneni. Antu amavulu anakukeña kwiluka Izu daNzambi. Kuvula kwawantu akushika ku 3,914 apompeli kuChanukishu  chakufwa kwaKristu mu 2010 kunakumwekesha chumichi. Neyi nitoñojoka hawunsahu wamwekeshaña nawu Yehova nakiswili izanvu dadiña danyanya muBulgaria, nazañalalaña nankashi. Neyi chochashimwineñawu dehi hamukanda waIsaya 60:22, nadimweni namesu nami “wanyanya” nekali ‘munza wañovu.’

Chuma chikwawu chanzañalesheli nankashi muwumi wami hikwidika kwaBayibolu yaNew World Translation of the Holy Scriptures mwidimi daBulgaria. Yedikili muAugust 2009 haKupompa kwaNkambi kwadiña namutu wakwila nawu “Tonenuña!” mumusumba waSofia. Chilota chami chashikijeweli hampinji yedikili iyi Bayibolu mwidimi detu. Chakadi nikujina iyi Bayibolu yikukwasha antu amavulu nankashi kwiluka nsañu yalala yamuBayibolu muBulgaria.

Hela chakwila wufwayi wankañeshaña kuzata nañovu mumudimu wakushimwina nsañu yayiwahi yaWanta waNzambi, nazañalalaña nankashi kushimwina nsañu yalala yamuBayibolu kudi antuñi nami niantu amakwawu enzaña kwitala dami. Mpinji yimu, nemeni mwikeki nakutambika ntuñi nami wahitileña. Wetejeli nawa nahanjekeli nindi nsañu yayivulu yakukolesha yekala muBayibolu, chakubula nikumba mpinji wetejeli kudiza Bayibolu. Nazañaleli nankashi chapapatisheweliyi nakwikala muhelami wakuspiritu. Nakwashi antu awana kudihana kudi Yehova.

Chuma chanzañaleshaña chikupu nawa chankoleshaña hikupompa kwawakwaKristu mpinji yejima nawamana kwami niahela akubadika nkulakaji, antu wenawa ekala neyi chisaka chami. Chineli nashakamaña mwituña mwabulañawu kuloñeshela ayifwayi hela atushinakaji ñendelu, chankalilaña kuya kuchipompelu. Ilaña namusakililaña chikupu mana kwami wakansi wañakamenaña chiwahi. Mpinji yejima wantwalaña Kwitala daWanta nakupompa namotoka yindi, wanfuntishaña cheñi neyi tunamanishi kupompa. Namusakililaña Yehova hama chankoolekeshayi hakwikala hakachi kachisaka chakuspiritu chikweti kukeña.

Neyi nanuka yuma yakunyima, namonaña nami yuma yahimpika nankashi muwumi wami kubadika chinatoñojokeleña kuwansi. Kumukalakela Yehova kwanzañaleshaña chikupu makonu nawa nikweti kuchiñeja kwakuwahi kwakumbidi. Nalemesha chikaninu chaNzambi chakwila nawu muparadisa yaheseki ‘mukwakubalakata wukakiluka neyi nkayi.’ (Isaya 35:6) Natalilaña chikupu ifuku dinakatachika kwenda nakushiya chitwamu chami chatufumbu nakwikala wakola.

[Mazu ekoku adi hefu 20]

“Chuma chanzañaleshaña chikupu nawa chankoleshaña hikupompa kwawakwaKristu mpinji yejima”

[Mazu ekoku adi hefu 21]

“Chuma chikwawu chanzañalesheli nankashi muwumi wami hikwidika kwaBayibolu yaNew World Translation of the Holy Scriptures mwidimi daBulgaria”

[Mwevulu wudi hefu 19]

Natachikili kuhema yisela henohu nindi nayaaka 15