Dizenu Nsañu Yidi Mwizu Danzambi

Muloñadi Nzambi Chetejelayi Kutama niMakabi?

Hadaha mwadihulahu dehi malwihu adi munichi chibaaba nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova akutiya kuwaha kuhanjeka nenu hakwakula awa malwihu.

1. Indi kutama kwatachikili ñahi?

Kutama kwatachikili hanu hamaseki kufuma hampinji yatwambiliyi Satana katachi. Satana hadiña watamaku hampinji yamuleñeluwu. Wadiña kañelu waloña ilaña ‘hemeni munsañu yalalaku.’ (Yowanu 8:44) Wakeñeleña nindi antu adifukuleña kudi yena chatela kufuukula kudi Nzambi hohu. Satana wamudimbili mumbanda watachi, Evu nawa wamushinjilili nindi yamwovwahili chatela kumwovwahila Nzambi. Adama neyena wadibombeli naEvu nakudikaña naNzambi. Chuma chafuukwiluhu Adama chaletesheli makabi nikufwa.—Tañenu Kutachika 3:1-6, 17-19.

Satana chamulejeliyi Evu nindi yadikañi naNzambi, wadikañeleña nawanta waNzambi. Antu amavulu anadibombi naSatana nakumukaana Nzambi kwikala Nyuuli yawu. Dichi Satana nekali ‘nyuuli wampata yamunu mwishina.’—Tañenu Yowanu 14:30; Chimwekeshu 12:9.

2. Komana yileñaleña yaNzambi yadiña nehuji?

Antu niañelu aleñeliyi Nzambi adiña awanina atelela kwovwahila nshimbi jaNzambi. (Kuhituluka 32:5) Nzambi watuleñeli nawuswa wakwikala akasunuka kutondahu kwila yayiwahi hela kwila yatama. Iwu wuswa watukwashaña kumwekesha kukeña kutwamukeña Nzambi.—Tañenu Yakoba 1:13-15; 1 Yowanu 5:3.

3. Muloñadi Nzambi chetejelayi makabi?

Kufuma tuhu hampinji yadikañiluwu antu muEdeni, Yehova weteja antu kudikaña nawanta windi. Muloñadi? Kulonda yamwekeshi nindi antu hiyanateli kudiyuula aweni chakadi yenaku. (Yeremiya 10:23) Mukuhita kwayaaka 6,000 yakuhanda kwawantu, chamwekana hatooka to-o nawu antu hiyatela kudiyuula awenuku. Anyuuli awantu akañanya kumanisha njita, wubanji, kutama, ninyisoñu.—Tañenu Mukwakutaŋisha 7:29; 8:9; Aroma 9:17.

Kwambukaku, antu amwiteja Nzambi kwikala Nyuuli yawu ahetelañamu chikupu. (Isaya 48:17, 18) Yehova keña yajilumuni nfulumendi jawantu jejima. Antu amutonda Nzambi kwikala nyuuli yawu hohu diwu akaswana ituña.—Isaya 2:3, 4; 11:9; tañenu Danyeli 2:44.

  4. Indi Nzambi watwinka kukoolekanyi hakwikala wadiwunjika?

Satana wahosheli nindi kwosi muntu wunateli kumwovwahila Yehova. Dichi kudiwunjika kwaNzambi kwatwinka wejima wetu kukooleka kwakutondahu kutuyuula kudi Nzambi hela kudi antu. Yuma yitwelaña mukuhanda kwetu yamwekeshaña chuma chitwatondahu.—Tañenu Yoba 1:8-11; Yishimu 27:11.

5. Tunateli kumutonda ñahi Nzambi kwikala nyuuli yetu?

Tunateli kumutonda Nzambi kwikala Nyuuli yetu neyi twikala mukudifukula kwalala kwashindamena Mwizu dindi Bayibolu. (Yowanu 4:23) Cheñi nawa hitwadiñijaña mujipolitiki nimunjitaku neyi Yesu.—Tañenu Yowanu 17:14.

Satana wazatishaña ñovu jindi kulonda yatandishi yililu yawuvumbi, niyuma yatama. Neyi tukaana yililu yamuchidiwu akwetu niantaña anateli kutusekesha hela kutudimbulula. (1 Petulu 4:3, 4) Twatela kutondahu. Komana tukudikundaña nawantu amukeña Nzambi? Komana tukwovwahila nshimbi jindi jalala nawa jajiwahi? Neyi twovwahila, tukumwekesha netu Satana watwambili hampinji yahosheliyi nindi kwosi muntu watela kumwovwahila Nzambi.—Tañenu 1 Akorinda 6:9, 10; 15:33.

Neyi munakukeña nsañu yikwawu, talenu kapetulu 11 kaniwu mukanda, wasonekawu kudi aYinsahu jaYehova.

CHUMANYI Chacheni CHATAÑISHAÑA BAYIBOLU?

[Mwevulu wudi hefu 16]

Adama wafuukwiluhu chuma chatama

[Mwevulu wudi hefu 17]

Yuma yitwafuukulaña yamwekeshaña nawu tunakukeña Nzambi kwikala nyuuli yetu hela nehi