Chakudizisha Anyana Nsañu yaNzambi Njilanyi Jazatikaña Chiwahi?

“Nimazu awa nukukuleja lelu akekalaña mumuchima weyi; wakalejañamu anyaneyi chakashinshi, diyi mpanji yiwakahanjikaña chiwakashakamaña mwitala deyi, nichiwakendaña munjila, nihakukama, nihakuhinduka.”—KUHITULUKA 6:6, 7.

MPINJI yikwawu anvwali anateli kutoñojoka nawu kudizisha anyanawu himudimu weneni chikupu. Hela chochu, neyi anakukeña wukwashu anateli kuluwankana nansañu yayivulu yashiyashana yikutiyawu hela yikutañawu. Antaña niamabwambu kakavulu anyakalaña kushimuna mwakwilila. Nyikanda, yibaaba yamumagazini ninsañu yahaIntaneti mpinji yikwawu yayilejaña anvwali kufumba kwakuvulu kwaditadikishaña.

Kwambukaku, Bayibolu yayilejaña anvwali yuma yatelela kutalisha hansañu yakutañisha anyanawu, cheñi nawa yahanaña wulomboli kutalisha hachatela kuyitañishawu. Neyi chinamwekeshi nsona yamuBayibolu yinatenuwu hewulu, anvwali atela kuwana njila jakuhanjekelamu nawanyanawu nsañu yaNzambi ifuku niifuku. Njila jidi heshina jiwana jashindamena haBayibolu jinakwashi anvwali amavulu nankashi kutañisha anyanawu nsañu yaNzambi.

1. Yidizishenu nsañu yahosha hayileñaleña. Kapostolu Pawulu wasonekeli nindi: ‘Kufumisha haleñeluwu mpata yamunu mwishina, yuma yaNzambi yakadi kumonewa, yinamonewi chalala, yinalumbuluki nayuma yaleñeliyi, joju ñovu jindi jahaya nyaka niwuNzambi windi.’ (Aroma 1:20) Anvwali anateli kwila yuma yayivulu hakukwasha anyanawu kwiluka nawu Nzambi wekala kwoku kuhitila mukuyileja kulonda eluki kulema kwayuma yaleñayi Nzambi nikuyikwasha kwiluka yililu yaNzambi yamwekenaña muyileñaleña.

Yesu wazatishili njila yeniyi hakutañisha atumbanji twindi. Chakutalilahu wahosheli nindi: “Talenu chachiwahi atujila ahaluzwizu, hiyakuwañaku, hiyamunañaku, hiyaloñaña munkalañaku, ayidiishaña kudi Tata yenu wekala mwiwulu. Enu himwayibadika nankashi kulemaku?” (Matewu 6:26) Yesu wakonkomweneni yililu yaYehova yakukeña niwushona. Ilaña wayilejeli yuma yayivulu. Wayikwashili atumbanji twindi kwiluka Nzambi chayimwekeshelañayi anyanindi iyi yililu.

Mwanta wamaana Solomoni wahosheli hamaana ayinkawu anzenkeneni kudi Nzambi nawa wazatishili iyi yileñaleña yanyanya hakukonkomwena hachuma chalema chitwadizilañaku. Wasonekeli nindi: ‘Eyi nkopi yaku kudi nzenkeneni wutali mwelañayi, wikali namaana. Kutoña wena hiyakweti hela mwanta, hela nlomboli, hela mukwakuyiyuulaku, adikeñelaña yakudya yawu hamwaka wanvula, apompeshaña  kudya kwawu hachilaaka chakwañula yakudya.’ (Yishimu 6:6-8) Twadizilañaku chuma chalema hama kutalisha hakutanjika yikonkwanyi yayiwahi nikuzatisha ñovu yatwinkayi Nzambi kulonda tushikiji yikonkwanyi yenoyu.

Anvwali anateli kwimbujola ntañishilu yayiwahi yaYesu niSolomoni kuhitila mukuzatisha iyi yuma yinalondeluhu: (1) Yihulenu anyana nyitondu niatunyama ayitiyishaña kuwaha. (2) Dizenu nsañu yayivulu kutalisha hanyitondu yenoyu niatunyama. (3) Dizilenuku yuma yahoshaña hadi Nzambi kuyileñaleña yamuchidiwu.

2. Imbujolenu yililu yaYesu kutalisha hadi antu atañishileñayi. Hakachi kawantu ejima, Yesu diyi wadiña nansañu yalema nankashi yakuhosha. Ilaña wazatishileña mpinji yeneni nakwihula malwihu. Washili maana chikupu kuyuma yatoñojokeleñawu antu atañishileñayi. (Matewu 17:24, 25; Maku 8:27-29) Chochimu, anvwali akweti yuma yayivulu yalema nankashi yakutañisha anyanawu. Hakwila nawu atañishi chiwahi atela kumwimbujola Yesu nikukolesha anyanawu kwikala akasunuka kushimuna yuma yinakutoñojokawu.

Chumanyi chatela kwilawu anvwali neyi anyana akweti yililu yatama hela hiyanakunyakala kudiza yuma yalemaku? Shinshikenu Yesu cheliliyi nawapostolu indi. Mpinji jikwawu aditadikishileña chikupu mukachi kawu nawa hiyanyakeli kudiza yuma yayiwahi yafumaña mukudizozaku. Ilaña, Yesu wadiwunjikili nawa wayilejeleña mapampa kakavulu nindi ekali adizoza. (Maku 9:33, 34; Luka 9:46-48; 22:24, 25) Anvwali embujolaña Yesu ekala adiwunjika hakufumba anyanawu nawa neyi chinakukeñeka akufuntila-funtila yuma yoyimu sampu anyana anatiyishishi yuma yalema. *

3. Tañishenu kuhitila mukuyimikila chakutalilahu. Anvwali atela kulondela kufumba kwakapostolu Pawulu kwafumbiliyi akwaKristu ashakamineña muRoma. Wayisonekeleli nindi: ‘Eyi watañishaña mukwenu, hiwaditañishaña eyi awenuku, tahindi? Eyi washimunaña neyi wukombi watama, eyi aweni weyaña, tahindi?’—Aroma 2:21.

Iku kufumba kwalema muloña anyana adizilaña chikupu kuyuma yelañawu anvwali jawu kubadika yahoshañawu. Chalala, anvwali elaña mwahoshañawu anateli kwikala nawanyana atiyililaña yuma yatañishañawu anvwali jawu.

4. Tachikenu kumudizisha mwana henohu wuchidi wanyanya. Mulunda wakapostolu Pawulu nawa kamishonali Timotewu watuñili ijina dadiwahi muchituñilu. (Yililu 16:1, 2) Chuma chaleñeleli kwikala nejina dadiwahi, amudizishili ‘nyikanda yajila kufumisha kuwansi.’ Mama yaTimotewu ninkaka yindi wamumbanda hiyamutañilileña hohu Nsonaku, ilaña amukwashileña cheñi kutoñojoka hansañu yalala yekala munyikanda.—2 Timotewu 1:5; 3:14, 15.

Nyikanda Yatela Kuyikwasha

A Yinsahu jaYehova asonekaña nyikanda yayivulu yakwashaña anvwali kutañisha anyanawu nsañu yalala yaNzambi. Yikwawu ayisoneka kulonda yikwashi anyana anyanya. Yikwawu yinateli kukwasha anvwali nianyanawu atumpululu niatunkaña kulonda ahanjekeña chachiwahi. *

Hela chochu, henohu kanda ayidizishi anyana nsañu yaNzambi, anvwali atela kwiluka ñakwilu yamalwihu akala anateli kwihulawu anyana. Chakutalilahu, munatela kwakula ñahi awa malwihu analondeluhu: Muloñadi Nzambi chetejelayi makabi? Chumanyi chafuukulayi Nzambi kwiseki? Afu adi kudihi? A Yinsahu jaYehova akutiya kuwaha kuyikwasha kuwana ñakwilu yanawa malwihu nimalwihu amakwawu hakwila nawu enu nichisaka chenu mukundami kwakwihi naNzambi.—Yakoba 4:8.

[Tumazu twaheshina]