Hinyi Watela Kudizisha Anyana Nsañu yaNzambi?

“Kambanji habadikaña nkuluñaña yinduku; muntu himuntu neyi nadizi dehi, wukwesekana kwanankuluñaña yindi hohu.”—LUKA 6:40.

ANVWALI amakwawu atoñojokaña nawu hiyakutwesha kudizisha anyanawu nsañu yaNzambuku. Anateli kutoñojoka nawu hiyataña chikupuku hela nawu eluka wanyi nsañu yayivulu yakundama kunsakililu hakwila ekali antañishi ashikahu. Chikufumamu anateli kumulekela ntaña yawu hela mukulumpi wansakililu iwu mudimu walema.

Hanu dinu, hinyi watelela kudizisha anyana nsañu yalala kutalisha hansakililu ninshimbi jajiwahi? Talenu Bayibolu chiyahosha haniyi nsañu nawa esekejenu awa mazu nansañu yawanawu akwakusandujola.

Indi Tata Yawantu Wukweti Mudimwinyi?

Chatañishaña Bayibolu: ‘Ninenu atata jawantu, bayi muvulokaña anyanenu azuwuku; yilelenuña nakuyibabesha nikuyikonkomwena mudi Mwanta.’—Aefwesesa 6:4.

Nsañu yawanawu akwakusandujola: Indi atata jawantu ahetelañamu ñahi neyi akolela nankashi kunsañu yansakililu? Chibaaba chasonekeluwu mu 2009 chahosheli nawu: “Kukuhwelela yuma yamunsakililu yimu, kwakwashaña antu kwikala atata jawantu amawahi. Nsakililu yaleñelaña antu kudikwasha nikutañisha yuma yayivulu  nawa yashimunaña wunlomboli kutalisha hachatela kushakamayi muntu.”—Fathers’ Religious Involvement and Early Childhood Behavior.

Bayibolu yakonkomwena chikupu hamudimu walema wukwetiyi tata yawantu hakulela anyana nikuyifumba. (Yishimu 4:1; Akolosi 3:21; Aheberu 12:9) Hanu dinu iku kufumba kuchidi kuzatika nimakonu? Muchaaka cha 2009 Shikola Yamuñoñi yakuFlorida yasonekeli chibaaba chahosheleña hadi atata jawantu chakwashiluwu anyanawu. Akwakusandujola awanini nawu anyana akweti atata jawu azataña nañovu hakwila ayileli chiwahi ekala nawushona nawa ekalaña nayililu yayiwahi. Atwansi awamayala aluwankanaña nankashi wanyi nawa anyana awambanda atoñojokaña chiwahi hama. Mwalala, kufumba kwamuBayibolu kwazatikaña nimakonu.

Indi Mudimu waMama Yawantu Walema Munjilanyi?

Chatañishaña Bayibolu: ‘Bayi wuleka nshimbi jamama yeyuku.’—Yishimu 1:8.

Nsañu yawanawu akwakusandujola: Muchaaka cha 2006, mukanda wumu wahosheli nawu: “Haavareji, amama jawantu azatishaña mapesenti akushika ku 65 na 80 kuhanjeka nawanyanawu nikuzatila hamu kubadika atata jawantu, nawa mapasenti wenawa esekana namapesenti amatuña amavulu.” (Handbook of Child Psychology) Muloña wakuhanjeka mpinji yeneni, yuma yahoshañayi mama yawantu, niyelañayi niyililu yindi yaleñelaña mwana kukula chiwahi.

Neyi mama yawantu nitata yawantu azatila hamu hakutañisha anyanawu nsañu yalala yaNzambi, dikwila nawu akuyinka yawaana yiyedi yalema nankashi. Chatachi, anyana ekalaña nakukooleka kwakwikala nawubwambu naTata yawu wamwiwulu, wubwambu watela kuyihetesha muchihandilu chawu chejima. Chamuchiyedi, anyana adizaña kuhitila mukumona namesu chatela iyala niñodindi kuzatila hamu hakwila nawu ashikiji yikonkwanyi yalema. (Akolosi 3:18-20) Hela chakwila amakwawu anateli kukwasha tata yawantu nimama yawantu, anvwali diwu akweti mudimu wakutañisha anyanawu nsañu yaNzambi niyuma yakeñañayi Nzambi nindi eleña muchisaka.

Indi anvwali anateli kudizisha ñahi anyanawu? Njilanyi jazatikaña chiwahi?