Malwihu Ehulaña Antañi . . .

Komana Nzambi walemesha antu ekowa dimu kubadika amakwawu?

▪ Inehi, halemesha ikowa dimuku. Bayibolu yahosha nawu: ‘Nzambi haakaminaña antu kumesuku; hakwila munyunza yejima, muntu wamwakamaña yena, welaña mwaloña, amutiyaña kudi Nzambi kuwaha.’—Yililu 10:34, 35.

Yitoñojoka yaNzambi yekala yambukaku chikupu nayawantu abula kuwanina kutalisha haniyi nsañu. Antu amavulu akuhwelela nawu antu ekowa dimu (sweje-e ikowa dawu) abadika amakwawu. Chaambu chamuchidiwu chamwekeshaña chatoñojokeleñayi Charles Darwin wasonekeli nindi: “Kumbidi, . . . antu aya hambidi amakowa acheñi akajilumuka, nawa mwakasinsa antu amakowa acheñi amadombu.” Chawushona antu amavulu ayiyandishaña kudi antu atoñojokaña nawu ikowa dawu dabadika dawakwawu.

Komana chachiwahi kutoñojoka nenu ikowa denu dabadika dawakwenu? Chakutalilahu, komana asayansi ashimuna nawu antu ekowa dimu abadika amakwawu kwesekeja natuyuma twanyanya twatuñaña chifwanisha? Kwambukaku nkuluñaña wejina daOxford Bryan Sykes weluka nsañu yatuyuma twanyanya twatuñaña chifwanisha wahosheli nindi: “Hikwekala tuyuma twanyanya twatuñaña chifwanisha twambukaku kwesekeja nekowa dawantu hela idimuku. . . . Mpinji yejima añihulaña nawu kwekalahu DNA yawaGreek hela yawaItaly, kafwampi kwekala kwosi. . . . Twadifwana chikupu.”

Nsañu yamuchidiwu yesekana nansañu yitwatañaña muNsona. Bayibolu yatañishaña nawu Nzambi waleñeli hohu iyala wumu nimumbanda wumu, kwafuma antu ejima. (Kutachika 3:20; Yililu 17:26) Kwesekeja nachamonañayi Nzambi kwekala hohu ikowa dimu, antu.

Yehova halemeshaña muntu kushindamena hekowa hela chamwekanañayi kumesuku. Ilaña Nzambi walemesha chuma chabadika kulema muchima wetu, muntu wamukachi. Wahosha nindi, “Antu atalaña kumesu, hakwila Yehova watalaña kumuchima.” (1 Samweli 16:7) Kwanuka iwu wunsahu walala kukutukundeja hama. Munjilanyi?

Hichikweti muloña nekowa detuku, etu amavulu twatiyaña kutama chitwekala, hela chochu hitukutwesha kuhimpa yumiyuku. Ilaña, tunateli kuhimpa yuma yalema nankashi, yitoñojoka yamumuchima wetu. (Akolosi 3:9-11) Neyi tudishinshika chachiwahi, tukudimona netu twabadika antu ekowa dacheñi hela netu atubadika. Chineli iyi yitoñojoka hiyesekana nayitoñojoka yaNzambuku, twatela kuzata nañovu kulonda tuleki kutoñojoka muniyi njila.—Masamu 139:23, 24.

Neyi tuzata nañovu kulonda tumoneña akwetu neyi chayimonañayi Yehova, tukwiluka chikupu netu wukutukwasha. Izu Dindi datwanukishaña nawu: “Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushindulula 16:9) Iyi nsañu yalala hichikweti muloña nekowa detuku.