Yuma Yaletaña Muzañalu Muchisaka

Lemeshenuña Mwinikwenu

Will * wahosheli nindi: “Rachel neyi nahili welaña tuhu dile-e! Neyi tushakama nakuhanjeka wukuhila chikupu yaleka nikunhoshesha. Twakañanyaña kuhanjika chiwahi. Natoñojokaña nijakumuseña.”

Rachel wahosheli nindi: “Chashikiliyi Will hetala nelili tuhu dile-e! Chinesekeli kumulumbulwila chuma channeñesheli, hanlekeli nindi nimanishi kuhoshaku. Wanlejeli nindi hiyadiñi nsañu yakala nankashuku nawa natela kuvulamenaku hohu. Chumichi channeñesheleña hama.”

KOMANA mpinji jikwawu mwatiyaña neyi chatiyileñayi Will hela Rachel? Wejima wawu afwilileña kuhanjeka ilaña ahilileña mpinji yejima. Muloñadi?

Amayala niambanda ahanjekaña munjila yamboka-mboka, nawa yuma yakeñañawu yadimena. Mumbanda wakeñaña kuhosha yuma yidi kumuchima mukukasunuka nawa kapampa kakavulu. Kwambukaku, amayala amavulu afwilaña kuleta kuwunda kuhitila mukumanisha kukala swayi-swayi nikutondolwela nyiloña yomisha mbaña. Hanu dinu, munateli kushinda ñahi iku kukala hakwila nawu muhanjekeña nanfumwenu hela nañodenu chiwahi? Kuhitila mukumulemesha mwinikwenu.

Muntu wukweti kavumbi walemesha amakwawu nawa wafwilaña kutiyishisha chinakutoñojokawu. Hadaha kufuma kuwansi, mwelukili nenu mwatela kulemesha antu ayibadika ñovu hela eluka yuma yayivulu kubadika enu. Hela chochu, kukala kwekala mumaluwi hikulemesha muntu wamwekanaña neyi mwesekana nindi, mwinikwenu. Linda wunashakami munaluwi yaaka yitanu nayisatu wahosheli nindi: “Nelukili nami Phil wadiwunjikileña nakutiyilila chikupu neyi muntu wacheñi nakumuleja nsañu. Nakeñeleña yantiyilileña neyi chatiyililañayi antu acheñi.” Chakubula nikujina, mwatiyililaña nakanañachima nikuhosha nakalemesha neyi mudi nawamabwambu jenu hela nawantu acheñi. Komana mwatoñojokelañaku mwinikwenu?

Kasawuntu kaletaña ndulu niyikonkojola hetala. Nyuuli wamaana wahosheli nindi: “Kamusa kanshima kominina dehi kakudya nakuwunda, kanabadiki itala denzala nambiji yakudya nandombu.” (Yishimu 17:1) Bayibolu yayilejaña amayala kulemesha añodijawu. (1 Petulu 3:7) “Mumbanda” niyena ‘watela kulemesha nfumwindi chikupu.’—Aefwesesa 5:33.

 Munateli kuhanjeka ñahi nakalemesha? Talenu iku kufumba kwakuwahi kwekala muBayibolu.

Neyi Mwinikwenu Wudi naNsañu Yinakukeñayi Kuhosha

Kukala: Antu amavulu akeñaña kuhosha kubadika kutiyilila. Anenu nawa mwakeñaña kuhosha? Bayibolu yahosha nawu muntu welaña “wuchidi kanda atiyi chachiwahi hakwakula” nawu hichisupi. (Yishimu 18:13) Dichi tiyililenu henohu kanda muhoshi. Muloñadi? Kara wunashakami mumaluwi hadi yaaka 26 wahosheli nindi: “Hinakeñaña nfumwami kumanisha kukala kunukweti hohenohuku. Nawa hatelela kwiteja hela kwiluka chamwekana kukalaku. Nakeñaña hohu yantiyilili nawa yeluki chinnakutiya.”

Kwambukaku, amayala amakwawu niambanda ashintajalaña kushimuna yuma yinakutoñojokawu nawa atiyaña kutama neyi mwinikwawu yayikanjikija kuhosha yuma yinakutoñojokawu. Lorrie wasumbuka katataka weluka nindi nfumwindi wamulejaña swayi wanyi yuma yinakutoñojokayi. Wahosheli nindi: “Nadiwunjikaña nakumuhembelela kulonda yanleji yuma yinakutoñojokayi.”

Chuma chatela kuyikwasha: Neyi munakukeña kuhanjeka nsañu yikuleta ntaadi namwinikwenu, mwatela kuhanjeka neyi wejima wenu munawundishi nyichima. Mukwiladi neyi mwinikwenu nakushintajala kuhosha? Mwatela kwiluka nenu “mpuña yekala mumuchima wamuntu yidi neyi inyiñi [ishima dakunama], ilaña muntu wakashinshi wukuyitaha.” (Yishimu 20:5) Neyi munyamuna mbeketi mwishima swayi-swayi mukumwaña menji amavulu. Chochimu neyi mumukanjikija mwinikwenu, wukutachika kudibaba nawa himukutwesha kumushika nfumwenu hela iñodenu hamuchimaku. Ilaña, mwatela kumwihula malwihu munjila yayiwahi nawa yakalemesha, neyi mwinikwenu hanakuhosha swayi-swayi yuma yinakutoñojokayi neyi chimunakukeñaku, wundishenu muchima.

Neyi mwinikwenu nakuhosha, ‘nyakalenu kutiya, labenu kuhosha, labenu kuzuwa.’ (Yakoba 1:19) Muntu watiyililaña chiwahi hakuminaña dakutiya nsañu hohuku, ilaña watiyishishaña yuma yaletesha muntu kuhosha nsañu yenoyu. Neyi mwinikwenu nakuhosha, tiyishenu yuma yinakutoñojokayi. Mwinikwenu wukwiluka neyi mwamulemesha chikupu hela nehi kwesekeja nachimukutiyilila.

Yesu watudizishili chakutiyilila. Chakutalilahu, chelili muntu wakata yamuwani Yesu nindi yamuuki, hashikeneni dakumuuka hohenohuku. Wasambilili kutiyilila kulembelela kwanona muntu. Wamutiyililili wushona muloña wayuma yatiyiliyi. Nkumininaku wamuukili ona muntu. (Maku 1:40-42) Imbujolenu chakutalilahu chaYesu neyi mwinikwenu nakuhosha. Anukenu nenu iñodenu hela nfumwenu nakukeña mumutiyili wushona, bayi neyi mumanishi kukala swayi-swayuku. Dichi tiyililenu nakanañachima. Chimweluka chinakutoñojokayi mwinikwenu, tiyenu neyi chinakutiyayi. Kuhiñahu, zatilenu hayuma yinakukeñayi mwinikwenu. Neyi mwila mwenimu mukumwekesha nenu mwamulemesha mwinikwenu.

ESEKENU KUZATISHA IYI NJILA: Ifuku dikwawu neyi mwinikwenu natachiki kuhosha nenu, bayi mwakula swayi-swayuku. Hembelelenu sampu mwinikwenu nakumishi kuhosha nawa munatiyishishi yuma yahoshayi. Kuhiñahu hanjekenu namwinikwenu nawa mwihulenu nenu, “Komana mweluka nenu natiyililaña chimwahoshaña?”

Neyi Mukweti Nsañu Yakuhosha

Kukala: Linda atenawu hakusambila wahosheli nindi, “Yisela yahachisanji chanyivwimbimbi yaleteshaña antu kutoñojoka nawu chachiwahi kuhosha yuma yatama hadi mwinikwenu nikumutukola.” Antu amakwawu akulila mumatala mwenjililawu kuditukola. Chasumbulawu hela kusumbuka chayikalilaña kuleka ichi chaaku muchisaka chawu. Ivy, washakamaña kuCanada wahosheli nindi: “Nakulilili muchisaka mutwamweneña kuditukola, kudizuwila nikuditumba majina akusupisha neyi hichuma chachiwahi.”

Chuma chatela kuyikwasha: Neyi munakuhosha nawantu acheñi nsañu yinakundami hadi mwinikwenu, yilejenu “mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.” (Aefwesesa  4:29) Hoshenu hadi mwinikwenu munjila yikuleñela antu amakwawu kumulemesha.

Hela neyi mudi nkawenu namwinikwenu bayi muzatishaña mazu akasawuntu nikuditumba majinaku. MuIsarela wakushankulu, Mikali wamuzuwilili nfumwindi Mwanta Davidi. Wahosheli mazu akasawuntu nakumwila nindi welili “neyi kantu kamukunkulwayi.” Mazu ahosheliyi amuhilishili Davidi, amutiyishili cheñi Nzambi kutama. (2 Samweli 6:20-23) Chumanyi chitukudizilaku? Neyi munakuhosha namwinikwenu, hoshenu mazu amawahi. (Akolosi 4:6) Phil wunashakami mumaluwi hadi yaaka yitanu nayisatu, wetejeli nindi achidi kuditadikisha nañodindi. Weluka nindi mpinji yikwawu yuma yahoshañayi yaletaña kukala kweneni. “Neluki nami kufwila kudiyiñisha kwaluwañeshaña wubwambu. Neluki nami kukolesha wubwambu wetu dichuma chaleteña muzañalu chikupu.”

Ntuluwa wumu wakushankulu wayikolesheli akuwindi awambanda ‘kuwana kwakushakama chachiwahi kumatala awanfumu jawu.’ (Luti 1:9) Neyi eyala namumbanda adilemeshaña, ‘akushakama chachiwahi’ mwitala dawu.

ESEKENU KUZATISHA IYI NJILA: Ikalenu nampinji yakuhanjeka namwinikwenu jinjila jidi heshina dakamutu kanyanya. Mwihulenu mwinikwenu nenu: “Neyi inakuhosha hadenu mukachi kawantu, komana mwatiyaña nenu nayilemeshaña tahindi nayisawulaña? Natela kuzatila hadihi?” Tiyililenu nakanañachima neyi nfumwenu hela iñodenu nakuyileja yuma yinakutoñojokayi. Esekenu kuzatisha yuma yikuyilejayi.

Ilukenu Nenu Mwambukaku naMwinikwenu

Kukala: Antu amakwawu anafumi tuhu hakudisumbula atoñojokaña mwaluwa nawu Bayibolu chiyahosha nawu anekali dehi “mujimba wumu,” chaya mukwila nawu atela kutoñojokaña yuma yoyimu hela kwikala nayililu yoyimu. (Matewu 19:5) Hela chochu, chimwahita kapinji elukaña nawu yitoñojoka yeniyi yaheña. Chashakamawu mumaluwi mafuku antesha, yitoñojoka yawu yashiyashana kakavulu yaletaña ntaadi. Linda wahosheli nindi: “Twekala nakukala mukachi ketu muloña ami nakamenaña nankashi kubadika Phil. Mpinji jikwawu neyi naneñi nankashi yena nikushaku maana nehi, chumichi chanhilishaña nankashi muloña namonaña neyi wakamenaña wanyi yuma yanneñeshaña.”

Chuma chatela kuyikwasha: Dilukenu wumu namukwawu, nawa lemeshenu yitoñojoka yamwinikwenu yambukaku. Chakutalilahu, mesu enu azatikaña munjila yambukaku namatu enu ilaña atiyañanaña, dichi munateli kukiluka mukwakwa chachiwahi. Adrienne wunashakami mumaluwi kwakwihi nayaaka makumi asatu wahosheli nindi: “Ami ninfumwami tweteja kufuukulahu yuma yashiyashana chakala neyi yitoñojoka yetu hiyinakumotoka Izu daNzambuku. Hela chakwila twadisumbula nawa twazatilaña hamu, hitwatoñojokaña yuma yoyimuku.”

Neyi mwinikwenu nakutoñojoka yuma yambukaku hela neyi welaña yuma munjila yambukaku, bayi mushinshika hayuma yimunakukeña hohuku. Lemeshenu yitoñojoka yamwinikwenu. (Afwilipi 2:4) Kyle nfumwa Adrienne wetejeli nindi: “Bayi neyi mpinji yejima netejaña yuma yahoshañayi ñodami hela yafuukulañayuku. Ilaña nadanukishaña nami namukeña kubadika chinakeña yuma yinafuukulaña. Neyi nazañalali anami nawa nazañalalaña.”

ESEKENU KUZATISHA IYI NJILA: Sonekenu ndandanda yayuma yatoñojokañayi hela yelaña mwinikwenu chiwahi kubadika enu. (Afwilipi 2:3)

Kalemesha hichuma chimu hakachi kayuma yaletaña muzañalu nawa kaleñelaña antu kushakama yaaka yayivulu mumaluwi. Linda wahosheli nindi: “Kalemesha kaletaña muzañalu nawa kakiñaña maluwi. Chachiwahi nankashi kwikala nakalemesha.”

[Tumazu twaheshina]

DIHULENU NENU . . .

▪ Indi yitoñojoka yamwinikwami yambukaku yinakwashi ñahi chisaka chetu?

▪ Muloñadi chichawahila kwovwahila yuma yinafuukuliyi mwinikwami neyi chakwila hiyikumotoka nshimbi jamuBayiboluku?