Dizenu Nsañu Yidi Mwizu Danzambi

Munateli Kwiluka Ñahi Kudifukula Kwalala?

Ichi chibaaba chikweti malwihu imwadihulahu dehi nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova anateli kuhanjeka nenu hakwakula awa malwihu.

1. Komana kwekala nsakililu yalala yimu hohu?

Yesu wayidizishili atumbanji twindi nsakililu yimu hohu, nsakililu yalala. Yekala neyi njila yaya kuwumi. Yesu wahosheli haniyi njila nindi: “Ayimonaña antesha.” (Matewu 7:14) Nzambi wetejaña hohu antu adifukulaña kwesekeja nachahosha Izu dindi dansañu yalala. Akwakudifukula alala ejima anuñañana muchikuhwelelu chimu.—Tañenu Yowanu 4:23, 24; 14:6; Aefwesesa 4:4, 5.

2. Muloñadi antu amunsakililu yayivulu chiyaditenenañawu nawu hiyakwaKristu?

Atuprofwetu akutwamba analuwañeshi wuKristu nawa anakufwila kuhetelamu. Neyi chashimwineñahu dehi Yesu, adimwekeshaña neyi ‘hiyanyikoku’ jindi ilaña elaña yuma neyi atuñwidi atuhuka. (Matewu 7:13-15, 21, 23) AkwaKristu akutwamba atachikili hampinji yafwiluwu apostolu aYesu.—Tañenu Yililu 20:29, 30.

3. Yumanyi yaleñelaña kudifukula kwalala kwikali kwambukaku?

Akwakudifukula alala alemesha Bayibolu nawu Hiizu daNzambi. Afwilaña kulondela nshimbi jamuBayibolu muchihandilu chawu. Dichi nsakililu yalala yambukaku chikupu nansakililu yashindamena hamaana awantu. (Matewu 15:7-9) Akwakudifukula alala azatishaña yuma yashimwinañawu.—Tañenu Yowanu 17:17; 2 Timotewu 3:16, 17.

Nsakililu yalala yalemeshaña ijina daNzambi, Yehova. Yesu watiyakesheli ijina daNzambi. Wayikwashili antu kumwiluka Nzambi nawa wayidizishili nindi alombeleña ijina daNzambi kulonda adijiliki. (Matewu 6:9) Kwiluña kumwashakamaña, nsakililwinyi yatañishaña ijina daNzambi?—Tañenu Yowanu 17:26; Aroma 10:13, 14.

  4. Munateli kwiluka ñahi akwakudifukula alala?

AkwaKristu alala ashimwinaña haWanta waNzambi. Nzambi wamutemesheli Yesu kwinza nakutañisha haWanta. Wanta waNzambi hohu diwukamanisha kukala kwawantu. Yesu watwelekeluhu kuhosha haWanta nichafwiliyi. (Luka 4:43; 8:1; 23:42, 43) Wayilejeli atumbanji twindi kushimwina haWanta waNzambi. Neyi muntu yayiwana nindi muhanjeki nsañu yaWanta waNzambi, watela kwikala wamunsakililwinyi?—Tañenu Matewu 10:7; 24:14.

Akwakumulonda Yesu hiyekala ampata yamunu mwishina yatamaku. Hiyadiñijaña munsañu yamatuña nachiyuulu hela muyikonkojola yetuñaku. (Yowanu 17:16) Cheñi nawa hiyembujolaña yililu yawantu amukaayi yatamaku.—Tañenu Yakoba 1:27; 4:4.

5. Chinjikijilwinyi chacheni chakwilukilaku akwaKristu alala?

AkwaKristu alala adikeña wumu namukwawu chikupu. Izu daNzambi dayidizishaña chakulemesha antu akuyitachi yejima. Hela chakwila nsakililu yakutwamba kakavulu yakwashaña antu ekalamu kudiñija munsañu yamajita, akwaKristu alala akanaaña kwila mwenimu. (Mika 4:1-4) Ilaña, antu ekala munsakililu yalala azatishaña mpinji yawu nimahetawu kulonda akwashi akwawu.—Tañenu Yowanu 13:34, 35; 1 Yowanu 4:20, 21.

Izanvu dimu didihi datañishaña yuma yejima kushindamena Hezu daNzambi, kulemesha ijina daNzambi, nikushimwina Wanta waNzambi nawu diwukamanisha kukala kunakumonawu antu? Izanvu dimu didihi damwekeshaña kukeña nawa dabulaña kudiñija munjita? A Yinsahu jaYehova hohu diwu elaña mwenimu.—1 Yowanu 3:10-12.

Neyi munakukeña nsañu yayivulu, talenu kapetulu 15 kaniwu mukanda, wasonekawu kudi aYinsahu jaYehova.

[Mwevulu wudi hefu 16]

‘Ahoshaña nawu twamwiluka Nzambi, ilaña nyidimu yawu yaya mwacheñi.’—Titusa 1:16