Muntu wakuMuchima waYehova

CHUMANYI chimwanukaña neyi mutoñojoka hadi muntu asonekawu muBayibolu Davidi? Chashindiliyi kaFwilistinu wasweja kutaluka Goliyati tahindi, chatemukililiyi muchinkalampata kuchiina ndulu yaMwanta Sawulu? Indi kwiji mwanukaña nshidi yakoñeliyi naBatisheba nimakabi amweniyi hamuloña wanshidi yeliliyi? Hadaha mwanukaña tumina tuyonenawu twasonekawu muBayibolu mumukanda waMasamu?

Davidi wadiñi nakukooleka kwadimena kwakumukalakela Nzambi mukuhanda kwindi, washindili majita nawa wamweni makabi. Ilaña chuma chitwamukeñela hayuma yejima himazu ahosheliyi kaprofwetu Samweli kutalisha hadi Davidi nindi, wukekala “muntu wakumuchima [waYehova].”—1 Samweli 13:14.

Wuprofwetu waSamweli washikijeweli henohu Davidi wuchidi kansi. Komana ninenu mwakeñaña kuyitena nawu muntu wakumuchima waYehova? Hanu dinu yumanyi yeliliyi Davidi muchihandilu chindi, sweje-e hampinji yachidiñayi kansi yatela kuyikwasha kwikala neyi yena? Tutalenu yuma yeliliyi.

Chisaka niMudimu

Jesi tata yaDavidi nawa mwizukulu aBowazi naLuti wadiñi kambuña aYehova wadihana chikupu. Hampinji yachidiñayi Davidi kansi niana kwindi atanu nayedi niahelindi ayedi, Jesi wayidizishileña Nshimbi jaMosi. Mwisamu dimu Davidi waditeneni yomweni nindi mwana ‘kakambuña wamumbanda’ waYehova. (Masamu 86:16) Chumichi chaletesha antu amakwawu kukunkulula nawu mama yaDavidi wuyabula kutenawu muBayibolu wadiña nakumudizisha yuma yakuspiritu. Muntu wumu  wadiza chikupu wahosheli nindi: “Hadaha Davidi watachikili kutiya nsañu yekomwesha yazatiliyi Nzambi nawantu jindi akushankulu kukanwa kamama yindi,” kubombelahu ninsañu yaLuti naBowazi.

Nsañu yatachi yitwatañaña hadi Davidi, himpinji yachidiñayi kansi nawa kabiña wahembeleña nyikoku yatata yindi. Chakadi nikujina, mudimu weniwu wakeñekeleña kushakama nkawindi mwisaña hadi mpinji yeneni mwaana niwufuku. Fwikijenu iyi nsañu.

Chisaka chaDavidi chashakamineña muBetelemi, musumba wanyanya wekala hewulu nimumbaña yayinekineki yamapidi aYuda. Iluña damalola damuBetelemi dasoñeleña yakudya yayiwahi. Muyinekineki mwadiña matempa anyikabu, anyiolive ninyivinyu. Mumafuku aDavidi, mutupidi-pidi mwabulileñawu kudima, adishilileñamu ayimuna. Kuswinaku chantesha kwadiña chinkalampata chaYuda.

Mudimu wawukabiña wadiña wakala nankashi. Hakachi kanitu tupidi-pidi dihawaniniyi mutupa nibera akeñeleña kukwata mukoku hamutaña. * Iwu mukwenzi wawulobu wayilondeleleli awa ayisumi nakuyijaha nawa wapulwisha anyikoku kutunwa twawu. (1 Samweli 17:34-36) Hadaha diyi mpinji yadiziliyi Davidi kwasa malekenyi chiwahi. Mukala wawu wadiñi wadikumashana nañinza yaBenjamini. Akwakwasa akumuchidi waBenjamini elukili kwasa malola namalekenyi “lusuki lwamuntu kululweza nehi.” Davidi niyena halwezeleñaku.—Ansompeshi 20:14-16; 1 Samweli 17:49.

Wazatishili Mpinji Yindi Chiwahi

Kakavulu, atubiña ashakamineña kumatelu amwena nawa kwakankawawu hadi mpinji yeneni. Ilaña Davidi hakeñeleña kutiya wuuduku. Kwambukaku, wazatishili chiwahi iyi mpinji kulonda yatoñojokeña chikupu. Chamwekana neyi nsañu yikwawu yasonekeliyi Davidi mumasamu yadiña nsañu yatoñojokeleñayi hachidiñayi kansi. Chidi neyi kwiji  diyi mpinji yatoñojokeleñayi chikupu hachifulu chikwetiyi muntu hayuma yaleñawu niyuma yakuhayamisha yekala mwiwulu, itañwa, kakweji, nitutumbwa, ‘nyidimu yanyinu yaYehova.’ Komana hampinji yadiñi mumpata yaBetelemi dihu hatoñojokeleñayi hayuma yaleñawu hamaseki yidi neyi añombi, atujila “nianyama amumpata”?—Masamu 8:3-9; 19:1-6.

Chakubula nikujina, hakwikala kabiña yuma yamweniyi Davidi yamuleñeleli kwiluka chikupu Yehova chakeñayi antu Jindi ashinshika. Dichi Davidi wembili nindi: “Yehova diyi kabiña kami; hinukubula chumaku. Wankamikaña kumunyenvu wutuuta; wanlombolaña kuchikumu chameji awunda. Mwalala, hela hinukwenda muchinekineki chamwidima wakufwa, hinukutiya woma wachuma chatamaku; muloña eyi nidi neyi, ninkunyi yeyi ninkobu yeyi yankundejaña.”—Masamu 23:1, 2, 4.

Munateli kuhayama iyi nsañu chiyayikundama. Chuma chaletesheli Davidi yekali nawulunda chikupu naYehova nikumutena nawu ‘muntu wakumuchima windi’ wadiña nakutoñojoka chikupu hanyidimu yaYehova nihawulunda windi naNzambi. Komana ninenu munateli kwikala neyi Davidi?

Komana mwafwilaña kumushimeka nikumulemesha Nleñi hanyima yakushinshika hayuma yaleñayi? Komana mwamukeña Yehova chakufuma kumuchima neyi mutala hayililu yindi yamwekenaña muyuma yelañayi nawantu? Hakwila nawu mumuhameki Yehova hayuma yeniyi, mwatela kwikala nampinji yakulombela nikutoñojoka chikupu Hezu daNzambi niyileñaleña yindi. Kutoñojoka muniyi njila kukuyikwasha kwimwiluka Yehova hama nawa mukumukeña. Atwansi niakulumpi anateli kwila mwenimu. Davidi watachikili kukundama kudi Yehova kufuma tuhu kuwansi windi. Tuneluki ñahi?

Davidi Anamuwayishi

Chelili Mwanta Sawulu yakañanyi kuyuula antu jaNzambi, Yehova wamulejeli kaprofwetu Samweli nindi: “Mwakanyi iwakakumisha kumudila Sawulu inaleka dehi kwikala mwanta wawaIsarela? Inzeshaku luseñu lweyi manji, nikutemeshi wuyi kudi Jesi wakuBetelemi. Muloña hadi anyanindi amayala namonuhu dehi mwanta.”—1 Samweli 16:1.

Chashikiliyi Samweli muBetelemi, wamulejeli Jesi kutambika anyanindi awamayala. Mwananyi wadi kuwayishayi Samweli kulonda ekali mwanta? Samweli chamumweniyi Eliyabi wedi nawa walubanji, watoñojokeli nindi: ‘Diyi yeniwu.’ Ilaña Yehova wamulejeli Samweli nindi: ‘Bayi wumutala chekalayi kumesu hela chatalukayuku; namukaani kwami; muloña Yehova hamonaña chamonañawu  antuku; muloña antu atalaña kumesu, hakwila Yehova watalaña mumuchima.’ Yehova wamukaanini Abinadabi, Shama niana kwindi amakwawu awana munjila yoyimu. ‘Nkumininaku,’ iyi nsañu yatwalekahu nawu: “Samweli hakumwila Jesi nindi Anyaneyi ejima wowenawa? Nindi, kunashali kabinda kawu, wudi nakuhemba nyikoku.”—1 Samweli 16:7, 11.

Ñakwilu yaJesi yamwekeshaña neyi watalishili mukwila nindi: ‘Bayi neyi Davidi diyi iwunakukeñaku.’ Davidi amwinkeli mudimu wakuhemba nyikoku muloña diyi wadiña kabinda nawa wakehelamu chikupu muchisaka. Ilaña diyi atondeluwu kudi Nzambi. Yehova wamonaña mumuchima, chakadi kujina wamweni chuma chasweja kuwaha mumuchima waniwu kansi. Dichi chelili Jesi yamuleti Davidi, Yehova wamulejeli Samweli nindi: ‘Nyamukaku wumuwayishi manji; diyi yeniwu. Samweli hakunona luseñu lwamanji hakumuwayisha manji mukachi kawana kwindi. Spiritu yaYehova yenjili nañovu hadi Davidi kufumisha kwifuku odu kutwala nikumbidi.’—1 Samweli 16:12, 13.

Bayibolu hiyashimuna yaaka yadiña naDavidi hamwekeni chumichuku. Hela chochu, chimwahitili mpinji, anakwindi asatu awakulumpi, Eliyabi, Abinadabi niShama ekalili amashidika aSawulu. Hadaha awa amakwawu atanu achidiña atwansi chikupu dichabuliluwu kuya kunjita. Hekwawu adiña kanda ashikiji yaaka 20 yakusemuka, yaaka yetejeleñawu amayala amuIsarela kwikala amashidika. (Kuchinda 1:3; 1 Samweli 17:13) Hela chochu, Davidi wachidiña kansi chikupu hampinji yamutondeluwu kudi Yehova. Ilaña chamwekana neyi Davidi wadiña muntu walemesha yuma yakuspiritu chikupu haniyi mpinji. Chakadi nikujina wadiña nawulunda wawuwahi naYehova, nawa wekalili nawulunda weniwu kuhitila mukutoñojoka hayuma yelukiliyi hadi Nzambi.

Atwansi makonu niwena anateli kuyikolesha kwila chuma chochimu. Anvwali, komana mwakoleshaña anyanenu kutoñojoka chikupu hayuma yakuspiritu, kulemesha yileñaleña yaNzambi, nikudiza yuma yahosha Bayibolu kutalisha hadi Nleñi? (Kuhituluka 6:4-9) Anenu atwansi, komana munakwila yumiyi halwenu? Nyikanda yashindamena haBayibolu yidi neyi magazini * aKaposhi Kakutalila niAwake! ayisonekaña kulonda ayikwasheña.

Welukili Kwimba Kadada

Neyi chochekala nsañu yayivulu yamumasamu aDavidi yatulejaña chihandilu chindi hampinji yadiñayi kabiña, niyivuminu yembileñayi yatulejaña nsañu yoyimu. Hela chochu, yivuminu yembileñayi hakwimba itu tumina twajila yajiya. Ilaña tweluka netu nsoneki yatumina twenitu wadiña ñimbi wakuluka yitembi chikupu. Kafwampi Davidi amutambikili kufuma mwisaña mwadiñayi kulonda yayi nakumukalakela Mwanta Sawulu muloña wadiña weluka kwimba kadada.—1 Samweli 16:18-23. *

Indi Davidi wadizilili kwimba kudihi nawa mpinjinyi? Chakadi nikujina himpinji yadiñayi mwisaña nakubiña anyikoku. Tunateli kukuhwelela chikupu netu nihampinji yadiñayi kansi, Davidi wadiña nakwimba tumina twakumuhameka Nzambi chakufuma hamuchima. Kafwampi Yehova wamutondeli muloña wadiña wadihana nawa washa maana kuyuma yakuspiritu.

Davidi watwalekeluhu kwikala nawulunda wawuwahi naYehova nihampinji yakuliliyi. Ilaña yililu yamwekesheliyi muchihandilu chindi chejima yamwekenaña mumazu atoñojokeleñayi hanyaka mumasaña amuBetelemi. Fwikijenu Davidi nakumwimbila Yehova nindi: “Hinukwanuka mafuku akumwaka, hinukutoñojoka mwejima muwelaña, muchima wami hiwukuhita mwaya nyidimu yakumakaseyi.” (Masamu 143:5) Mazu amawahi anidi isamu nimasamu amakwawu amavulu embiliyi Davidi asañumunaña antu ejima afwilaña kwikala antu akumuchima waYehova.

[Tumazu twaheshina]