Mukanda Kufuma kuCongo (Kinshasa)

Muwulelu waMpidi yaKesi

IWULU damwekanaña kuchinana mumusumba waGoma neyi itañwa hidikushika mwiwulu. Mafuku ejima twamonaña Mpidi yaNyiragongo yasweja kuwaha yekala hakachi kajimpidi jasuñunukaña mukaayi. Wishi watwalekañahu kufukumuka kufuma mwibuku. Nawufuku wishi wamwekanaña kuchinana, wamwekeshaña malola atata asuñunuka adi mwibuku.

MuSwahili mpidi yeniyi ayitenaña nawu Mulima ya Moto, dikwila nawu Mpidi yaKesi. Mpidi yaNyiragongo yabusikili nankashi mu 2002. Antuñi netu niamabwambu jetu amavulu muGoma ajimbesheli yuma yejima. Mumaluña amakwawu mutwashimwinaña nanfumwami, twendaña hamalola wenawa adikwata, malola wenawa ambuka nayuma yejima yitwamonaña hamaseki. Antu hiyakola nyichima neyi malola wenawaku. Akweti chisambu, akweti nyichima yayovu nawa atambwilaña nsañu yayiwahi yitwashimwinaña. Chumichi chatuzañaleshaña kushimwina muwulelu waMpidi yaKesi.

Hamposu nantentemena nahindukili namuzañalu hama. Nfumwami hamu nawamabwambu jetu enjili nakutuhempula niakwetu amishonali, twayili nakushimwina ifuku dejima muchilombu chawamatunduka kuMugunga kumujika wamusumba. Antu amavulu ashakamaña munichi chilombu atemuka kujimbaka jawu muloña wamajita.

Twaloñejeli nyikanda yashindamena haBayibolu mwidimi daFrench, Kiswahili niKinyarwanda mumotoka. Tunyamuka nikunyamuka, chitwayileña munjila yamankulokela twawanini antu amavulu mumusumba. Twawanini anyikwenzi awamayala anakushinjika yiteli yalema yasendeleluwu hachukudus (matemba akutuña namapulanga). Ambanda anavwali mahina awulombu wawuwahi anakwendela kunsa yamukwakwa niyiteli yawu hanyitu. Mataakisi anakusenda antu nakuyitwala kunyidimu nikuyisankanu. Matala ekala munidi iluña akutuña namapulanga eyila, akunduluka nawa akupenta wulombu wawusombu.

Twashikili Hetala daWanta dakuNdosho hitwawanini akwetu aYinsahu jaYehova itwayili nakushimwina nawu muchilombu. Natiyili kuwaha hakumona atwansi, antuluwa, anshona niamakwawu adiña nakukala kwashiyashana. Amavulu amweni kañalaña chikupu ilaña awahisha chihandilu chawu kuhitila mukwovwahila nshimbi jamuBayibolu. Yuma yachiñejañawu yamuBayibolu yabidimaña chikupu munyichima yawu, nawa afwilaña kulejaku akwawu. Chitwahanjekeli chantesha hamavasi amuBayibolu atela kukolesha antu itwawanineña, etu  antu akushika ku 130 twakandamini mumabasi anyanya atanu nimotoka wukwawu.

Chimwahitili jiminiti 30 twashikili muchilombu. Matenti amavulu atooka ayilemeneni hamalola asuñunukili hampinji yabusikili mpidi. Mukachi kachilombu atuñilamu nyisalanyi yayiwahi nimaluña akukosela yakuvwala. Twawanini antu amavulu adiña nakukosa, kuteleka, kulandisha makundi nikukomba kumatenti awu.

Twawanini muntu watenañawu nawu Papa Jacques, himukulumpi watalaña kabadi kamu kachilombu. Wakamenaña chikupu chatela kukulishayi anyanindi munawa mafuku akala. Watiyili kuwaha chitwamwinkeli mukanda wunakwila nawu Questions Young People Ask—Answers That Work nawa wahosheli nindi wukuwutaña kufumahu wukupompesha mazanvu antesha kulonda yayileji yuma yikudizayi.

Chitwendeluku chantesha, twawanini mumbanda watenañawu nawu Mama Beatrice. Watwihwili muloña wetejelayi Nzambi makabi. Watoñojokeleña nindi Nzambi nakumubabesha. Nfumwindi amujahili munjita, mwanindi wamumbanda himujiki nakuyanda hakulela nkemba yindi muchilombu, nawa mwahitili tukweji twantesha kufuma hamuwombolweluwu mwanindi weyala. Weluka wanyi kwekala mwanindi.

Nsañu yawushona yatulejeliyi Mama Beatrice yañanukishaña chatiyiliyi Yoba hakutambwila nsañu yatama. Twamulumbulwilili muloña wutwamwenaña makabi nawa twamulejeli netu Nzambi hamubabesheleña hamakabi amweneñayuku. (Yoba 34:10-12; Yakoba 1:14, 15) Twamulejeli cheñi yuma yikahimpayi Nzambi katataka hadinu iseki kuhitila muWanta windi. Watachikili kumwemweta chitwahanjekeleña nindi nawa wahosheli nindi wukutwalekahu kudiza Bayibolu nikulomba kudi Nzambi kulonda yamukwashi.

Wejima wetu twayili nakushimwina twazañaleli nawa twelukili netu Yehova watukwashili chikupu kukolesha antu itwawanini nansañu yakuchiñeja. Chitwafumineña muchilombu, antu amavulu anyamwini matilakiti awu, magazini ninyikanda nakutushiika nawu mwenduhu.

Hampinji yitwafuntileña kumataletu twatoñojokeleña hayuma yitwamweni. Nasakililaña nankashi hakushimwina hanidi ifuku dadimena. Nanukaña chasakililiyi Papa Jacques, chazañaleliyi Mama Beatrice, chitwadimushili mumakasa nañovu nakashinakaji wamumbanda wahosheleña nanami kuhitila mukumwemweta hohu. Natoñojokaña hadi atwansi enhwileña malwihu amawahi nawa amwekeni nawu adiña apama. Nakomokeli yililu yayiwahi yinamweni mudi antu adiña nakumwemweta nikuseha hela chakwila ayandili chikupu.

Twamonaña antu amavulu azataña nañovu kulonda akwashi antu anakukabakana kumaluña adi neyi awa. Lelu nadiña nakukooleka kwakweni kwakuzatisha Bayibolu hakuyileja antu kutalisha hachakamanishawu makabi haya nyaka. Nazañaleli nankashi hakwikala hakachi kawantu anakuzata mudimu weneni wakuspiritu wakukwasha antu welukawu mukaayi kejima.