Yumanyi Yatela Kudizawu Anyana Hadi Nzambi?

“Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña.”—2 TIMOTEWU 3:16.

ANYANA atela kuyidizisha nsañu yalala hadi Nzambi. Anateli kudizila nsañu yalala mumukandanyi? Mumukanda wansakililu walemeshawu chikupu mukaayi, Bayibolu.

Bayibolu yidi neyi mukanda wakufuma kudi Nzambi. Nzambi wamwekeshaña yililu yindi muniwu mukanda nawa wayiloñeshela anyanindi ejima nshimbi yayiwahi, atwansi niakulumpi. Talenu ntañishilu yikwawu yekala muBayibolu niyuma yatela kudizilaku anyana anyanya.

Chumanyi chakeñañayi Nzambi nindi twiluki hadi yena?

◼ Yuma yatañishaña Bayibolu: ‘Yeyi wukweti ijina deyi daYehova, yeyi Mukwakubadika Kwiwulu mwahita iseki dejima.’—Masamu 83:18.

Chuma chitukudizilaku: Nzambi wekala kwoku nawa wukweti ijina.

◼ Yuma yatañishaña Bayibolu: ‘Yehova washinshikaña nyichima yejima, welukaña yafuukulaña yitoñojoka yejima. Neyi wakamukeñakeña, wakamuwana.’—1 Kushindulula 28:9.

Chuma chitukudizilaku: Yehova Nzambi watwakamenaña wejima wetu kushilahu nianyana anyanya. (Masamu 10:14; 146:9) Wakeñaña nindi tudizi nsañu yahosha hadi yena.

◼ Yuma yatañishaña Bayibolu: ‘Bayi mwakakabisha hoku . . . mwana wanshonaku. Neyi wakayikabishahu hela chantesha, neyi akadila kudami, chalala ami nakatiya kudila kwawu.’—Kwidika 22:22-24.

Chuma chitukudizilaku: Yehova watiyaña nikulomba kwawanyana anyanya. Tunateli kuhosha naNzambi mpinji yejima nikumuleja yuma yejima yitunakutoñojoka kumuchima.

◼ Yuma yatañishaña Bayibolu: ‘Abalumukili cheñi hiyakumweseka Nzambi, amukañesheli wambala waIsarela Wajila.’—Masamu 78:41.

Chuma chitukudizilaku: Yuma yitwahoshaña nikwila yamutiyishaña Yehova kutama, dichi twatela kutoñojoka henohu kanda tuhoshi nikwila chuma chidi chejima.

 Twatela kumona ñahi antu ambukaku nanetu?

◼ Yuma yatañishaña Bayibolu: ‘Nzambi haakaminaña antu kumesuku; hakwila munyunza yejima, muntu wamwakamaña yena, welaña mwaloña, amutiyaña kudi Nzambi kuwaha.’—Yililu 10:34, 35.

Chuma chitukudizilaku: Chineli Nzambi wetejaña antu akuyitachi yejima, dichi hitwatela kwikala nachaambu hamuloña wakushiyashana kwekowa hela chatuleñawuku.

◼ Yuma yatañishaña Bayibolu: ‘Mutweshi kwakula mafuku ejima antu ejima akuyihula nsañu yakuchiñeja kumwachiñejaña; nakudizoza nawoma.’—1 Petulu 3:15.

Chuma chitukudizilaku: Neyi tunakuhosha hansañu yansakililu twatela kuhosha nakushinjila nawa munjila yayiwahi. Twatela cheñi kulemesha antu ekala munsakililu yambukaku nayetu.

Twatela kumona ñahi antu amuchisaka?

◼ Yuma yatañishaña Bayibolu: ‘Anyana, ovwahilenu anvwali jenu muyuma yejima, muloña dichi chuma chamutiyishaña Mwanta kuwaha.’—Akolosi 3:20.

Chuma chitukudizilaku: Anyana ovwahila amwekeshaña nawu akeña anvwali jawu nawa akeñaña kumuzañalesha Nzambi.

◼ Yuma yatañishaña Bayibolu: ‘Nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Mwanta, ninenu nawa ilenu chochimu.’—Akolosi 3:13.

Chuma chitukudizilaku: Mpinji yikwawu antu amakwawu kushilahu niantaña jetu anateli kututiyisha nsonyi. Ilaña neyi tunakukeña netu Nzambi yotwanakeni, twatela kudiza kwanakena amakwawu.—Matewu 6:14, 15.

 Muloñadi chitwatelela kwikala ashinshika nawa aluwi?

◼ Yuma yatañishaña Bayibolu: ‘Lekenu kutwamba, hoshenuña nsañu yalala nawakwenu.’—Aefwesesa 4:25.

Chuma chitukudizilaku: Neyi tuhoshaña nsañu yalala, tukumwimbujola Nzambi nawa tukumuzañalesha. Neyi twikala nachaaku chakutwamba tukwikala neyi chilumbu chaNzambi Diyabolu, ‘tata yantwambi.’—Yowanu 8:44; Titusa 1:2.

◼ Yuma yatañishaña Bayibolu: ‘Yimunakeñi antu kuyililenu, ninenu nawa yililenu mwomumu.’—Matewu 7:12.

Chuma chitukudizilaku: Twatela kusha maana kuyuma yatoñojokañawu niyakeñañawu antaña jetu niantu amakwawu muchituñilu. Neyi ‘tutiyilaña akwetu wushona’ antu amakwawu niwena akututiyila luwi.—1 Petulu 3:8; Luka 6:38.

Neyi chinakumwekesha iyi yakutalilahu, yuma yitwadizaña muBayibolu yinateli kukwasha anyana kwikala antu asakililaña, akalemesha, nikwikala nawushona neyi anakuli dehi. Hanu dinu hinyi watela kuyidizisha anyana yumiyi?