Ayitumbili Nawu “Anyana Kachivumina Chanvula”
Dizishenu Anyanenu
Ayitumbili Nawu “Anyana Kachivumina Chanvula”
NEYI nvula yinakunoka, mwatiyaña kudidima kwanvula. Chakukasumwishahu dehi?— * Yesu wateneni atumbanji twindi ayedi nindi “Anyana Kachivumina Chanvula.” Tutali chaletesheli yayitumbi idi ijina.
Awa atumbanji twaYesu ayedi adiña aYakoba naYowanu. Adiña anyana evumu dimu, anyana kaZebedewu nañodindi Salomi. Hadaha Salomi adiña akansi namukulumpi naMariya, mama yaYesu. Dichi Yesu, Yakoba niYowanu adiña amana kwamuntu nawa atela atiyañeneña chikupu hampinji yakulileñawu.
Zebedewu wadiña chibinda chanshi, aYakoba niYowanu niwena adiña ayibinda anshi. Adiña hakachi kawantu atachi atondeliyi Yesu kwikala atumbanji twindi. Chayitambikiliyi, hohenohu ashili mudimu wawu wakukwata inshi nakumulondela. Nkumininaku Yesu watondeli atumbanji twindi 12 kulonda ekali apostolu indi. A Yakoba niYowanu ayitondeli.
Henohu kunashali tukweji twantesha nakumujaha Yesu, wayili nawapostolu indi kwiluña dampidi daSamariya. Kwadiña kwela dehi melela nawa azeyeli chikupu. Ilaña aSamariya ahosheli nawu hiyanakukeña Yesu niapostolu indi akami mumukala wawuku. Wuneluki chakaanininuwu?— Tutali chaletesheli.
Yesu niapostolu indi adiña aYudeya nawa aYudeya amavulu aheleli aSamariya. Ilaña Yesu hayiheleluku. Wayakameneneña chiwahi nawa aYakoba naYowanu ateleli kumwimbujola. Ilaña awa atumbanji ayedi aneñeli hakuyihaña kudi aSamariya, hiyakumwila Yesu nawu: ‘Wunakeñi tutambiki kesi kaholoki mwiwulu kayijahi?’ Wunatoñojoki neyi Yesu wahosheli nindidi?— Wayilejeli nindi aluwañesheli hakuhosha awa mazu atama. A Yakoba niYowanu ateleleli kudiza yuma yayivulu hakwikala naluwi.
A Yakoba naYowanu adiña nakukala kukwawu kwakwikala atachi, akeñeleña kwikala alema kubadika akwawu. Henohu Yesu wudi dehi kwakwihi nakufwa, amutemesheli mama yawu kudi Yesu nakumwila nawu: “Hoshaku izu dakushakamisha awa anyanami ayedi muwanta weyi, wumu kuchikasa cheyi chachidiilu, mukwawu kuchikasa cheyi chachimunswa.” Chachitiyiluwu apostolu amakwawu ikumi chuma chelili aYakoba naYowanu, ahilili. Aneyi nawa wadi kuhila?—
Hadaha wadi kuhila. Twatiyaña kutama neyi akwetu anakukeña kwikala atachi nikudilemesha nankashi kubadika akwawu. Nkumininaku, aYakoba niYowanu elukili nawu aluwañesheli nawa ahimpili yililu yawu. Ekalili apostolu akweti kukeña niluwi. Chumanyi chitukudizilaku?—
Chuma chitukudizila kudi Yesu chakwila nawu twatela kutiyila akwetu luwi. Yesu wadiña nakwakamena antu chiwahi, amayala, ambanda nianyana. Komana wukufwilaña kwanuka chakutalilahu chindi mpinji yejima nikumwimbujola?—
Tañenu Mubayibolu Yenu
Matewu 27:55, 56; Maku 15:40, 41
Yowanu 4:4-15, 21-26; Luka 9:51-55
Matewu 20:20-24; Maku 10:35-37, 41
[Tumazu twaheshina]
^ Neyi munakutañila hamu namwana, iwu mufunda wunakuyanukisha nawu muhudikili nawa mumuleji mwana yahoshuhu.
