Yuma Yaletaña Muzañalu Muchisaka

Ikalenu Antu awuSpiritu Neyi Adisumbula

Frederick *: “Chitwadisumbwili, nakoleleluhu nami ami niñodami tudizileña hamu Bayibolu. Nafwilileña nami ñodami yasheñaku muchima neyi hitukudiza. Ilaña ñodami Leanne kushakama kwamukalilileña. Chinatachika kwihula malwihu, wakuminineña dakwakula nindi eña hela inehi. Ñakwilu yindi hiyendeleleña hamu nayitoñojoka yami kwesekeja nachitwatela kudiza Bayiboluku.”

Leanne: “Nadiña nayaaka 18 hampinji yansumbwiluwu kudi aFrederick. Twadizileña Bayibolu mpinji yejima hamu, anfumwami aFrederick azatishileña mpinji yakudiza nakunleja yiluwa yejima yinakoñeleña nichinatela kuhimpa yililu yami hamu neyi mumbanda wasumbuka. Chumichi channeñesheleña nikuyeña kumuchima!”

KUKALANYI kwadiña mumaluwi aFrederick niLeanne? Yitoñojoka yawu yadiña chiwahi. Wonsu wawu amukeñeli Nzambi. Nawa amweni kuwaha kwafumaña mukudizila Bayibolu hamu. Ilaña chuma chacheni chadi kuyikwasha kulonda atiyañaneña chasoñeleña nyikabu yacheñi. Hela tuhu adizilileña hamu, ilaña mwayedi wawu hiyekalili antu awuspirituku.

Indi wuspiritu hichumanyi? Muloñadi adisumbula chatela kwikalilawu antu awuspiritu? Kukalanyi kunateli kumonawu nawa anateli kukumanisha ñahi?

Indi wuSpiritu Hichumanyi?

Izu dakwila nawu “wuspiritu” neyi chadizatishawu muBayibolu dakundama kuyililu hela kunzatilu. (Yuda 18, 19, NW.) Chakutalilahu, nsoneki waBayibolu Pawulu washimwini chaambu chidi hayililu yamuntu waspiritu namuntu wakumujimba. Pawulu washimwini nindi antu akweti yaaku yakumujimba, adilemeshaña aweni bayi akwawuku. Elaña yuma yakudizañalesha aweni chatela ovwahileña nshimbi jaNzambi.—1 Akorinda 2:14; Aŋalija 5:19, 20.

Ilaña antu akweti yililu yaspiritu alemeshaña nshimbi jaNzambi. Amumonaña Yehova Nzambi nawu Hiibwambu dawu nawa afwilaña kwimbujola yililu yindi. (Aefwesesa 5:1) Neyi adi nawakwawu, amwekeshaña kukeña,  luwi nikudiwunjika. (Kwidika 34:6) Amwovwahilaña Nzambi hela yuma yinakali chamuchidinyi. (Masamu 15:1, 4) Darren wakuCanada nawa wunashakami mumaluwi hadi yaaka 35 nindi: “Neyi chineluka, muntu waspiritu watoñojokaña hanhoshelu niyililu yindi chiyinateli kuwahisha wubwambu windi naNzambi.” Ñodindi, Jane, wawejeleluhu nindi: “Natoñojokaña nami mumbanda wawuspiritu wadikitaña mafuku ejima kulonda yekali namukabu waspiritu yaNzambi muchihandilu chindi.”—Aŋalija 5:22, 23.

Ilaña, hichinayi mukwila nawu chiña muntu yasumbula hela kusumbuka mwakadi dinu yekalili nayililu yawuspirituku. Bayibolu yatulejaña nawu muntu himuntu watela kumwiluka Nzambi nikumwimbujola.—Yililu 17:26, 27.

Muloñadi Adisumbula Chatela Kwikalilawu awuSpiritu?

Muloñadi adisumbula chatela kwikalilawu namuchima wawuspiritu neyi eyala namumbanda? Talenu chakutalilahu: Andimi ayedi akweti itempa dimu munakukeña kudimawu wakaaka. Ndimi wumu hakutoñola mpinji yakutumbayi mbutu, mukwawu nindi oyu mpinji nehi chiña mpinji yikwawu. Ndimi wumu nakukeña kushaku wushi, mukwawu hakukaana nakunwinahu menji nindi kushaku wushi nehi. Ndimi wumu nakuhumisha itañwa nakuzata mwitempa mafuku ejima. Mukwawu nadiwuluku, yavuña nimakasa nakumutala mukwawu. Neyi chimunamoni, mwitempa mukufuma nyikabu, ilaña hiyikuvulaku chiña neyi andimi ejima aditeja yuma yatela kwilawu nikuzatila hamu kulonda yuma yilumbuluki.

Eyala namumbanda adi neyi awa andimi. Neyi wumu diyi wukwikala muntu wawuspiritu, nshakaminu yawu yinateli kuwaha. (1 Petulu 3:1, 2) Ilaña, chikubadika kuwaha neyi wonsu wawu akwikala namuchima wakwovwahila nshimbi jaNzambi nakudikwasha chikupu hampinji yinakumuzatilawu Nzambi! Mwanta wamaana Solomoni wasonekeli nindi: “Antu ayedi anabadiki wumu.” Muloñadi? ‘Muloña akweti wuloku wawu wawuwahi nanyidimu yawu yakukabakanawu. Muloña neyi wumu wukudimbuka, wumu wukuhindwisha mukwawu.’—Mukwakutaŋisha 4:9, 10.

Chakadi nikujina anenu munakukeña kwikala antu awuspiritu namwini kwenu. Neyi chochitwadimaña itempa, kudima namunu kwaletaña nzala. Talenu hakukala kuyedi kumunateli kumona nichimwatela kushinda.

KUKALA KWATACHI: Hitukweti mpinjuku. Sue, wunashakami mumaluwi hakapinji kanti nindi: “Nfumwami wenzaña nakunsenda na 7:00 yamelela. Chitwashika hetala, nyidimu yejima yinakututalila. Hadi njita hakachi kayitoñojoka namujimba; yitoñojoka yatulejaña nawu twatela kushakama hamu nakudiza hadi Nzambi, ilaña nyijimba niyena nawu twatela kunooka.”

Chimwatela kwila: Ikalenu namuchima wakuhimpa nikuzatila hamu. Sue nindi: “Ami ninfumwami twafuukwili netu tukuhindukaña budidi nakutañila hamu nikuhanjeka hayibalu yamuBayibolu henohu kanda tuyi nakuzata. Nfumwami wankwashañaku tunyidimu kulonda niwaneña mpinji yakuhanjeka nindi.” Nkiswinyi yinatambwiluwu hamuloña wakudikita chikupu? Nfumwa Sue, Ed nindi: “Nachiwani neyi ami niSue chitwasweja kushakama hamu nakuhanjeka hayuma yakuspiritu, twatweshaña kumanisha kukala kutwamonaña nawa hitwaswejaña kwakamaku.”

Kubombela hakuhanjeka, mwatela kwikala nakapinji kakushakama hamu nakulomba hefuku hefuku. Kulomba kunateli kuyikwasha ñahi? Ryan wunashakami mumaluwi hadi yaaka 16 nindi: “Hashimbwili wanyi, ami niñodami twamweni kukala kweneni mumaluwi etu. Ilaña twadiña nampinji yakulombela hamu nawufuku, twamulejeleña Nzambi kukala kwejima kutwamweneña. Natoñojoki nami kulombela hamu dikwatukwashili kumanisha kukala kwetu nikwikala cheñi namuzañalu mumaluwi etu.”

ESEKENU IYI NJILA: Ikalenu nakapinji kukumana kwefuku nakuhanjeka hayuma yayiwahi yayimwekena wonsu wenu, yuma yimunateli  kumuhamekelahu Nzambi. Hoshenu cheñi hakukala kumunakumona, kumwatela kulomba wukwashu kudi Nzambi kulonda muumiki. Anukenu nenu: Bayi muzatisha mpinji yakudiza kulonda mutachiki kuloñolola yiluwa yamwinikwenuku. Ilaña neyi munakulombela hamu, tenenu hohu kukala kumunateli kumanishila hamu. Chikwacha, zatilenu hayuma yimwalomba.

KUKALA KWAMUCHIYEDI: Tukweti wuswa washiyashana. Tony wahosheli nindi: “Kanda nishakameñahu dehi nakutaña mukanda.” Mwinikwindi, Natalie nindi: “Nakeña kutaña nawa nakeñaña kulejaku akwetu yuma yinnatañi. Mpinji jikwawu natoñojokaña nami anfumwami aTony nayitiyishaña nsonyi neyi hitukuhanjeka hansañu yamuBayibolu.”

Chimwatela kwila: Zatilenu hamu, bayi mwikala namuchima wakudibecha hela kudinka nyiloñaku. Kwashenu nikukolesha mwinikwenu hayuma yinakudikitayi. Tony wahosheli nindi: “Iyena dikwetiyi ñodami dakuhanjeka hansañu yamuBayibolu mpinji jikwawu danzañaleshaña, nawa kunyima nadiña nawudi wakuhanjeka nindi hayuma yakuspiritu. Hela chochu, Natalie wankwashaña nankashi. Ichi twahanjekaña hamu hayuma yakuspiritu mpinji yejima nawa nachiwani neyi kwosi chuma chinatela kuchinaku. Nahanjikaña nindi nsañu yakuspiritu. Nawa kunatukwashi kwikala akasunuka nikushakama chiwahi mumaluwi etu.”

Adisumbula amavulu anachiwani neyi maluwi awu anawahiluku kuhitila mukwikala nampinji yakutañila hamu Bayibolu nikudiza mulungu nimulungu chakadi kujiña. Hanu dinu mwatela kubabala: Yikuma yejima yimukudiza yizatishenu enu aweni bayi muyikunjika hadi mwini kwenuku. (Aŋalija 6:4) Hanjikenu hayuma yaletaña wufwinda mumaluwi enu mpinji yikwawu bayi hampinji yakudizaku. Muloñadi?

Chakutalilahu: Neyi munakudya nshima nachisaka chenu, mukutachika kukasununa heboñola nakukosahu? Inehi. Akwenu akutachika kusanzola. Yesu wesekejeli kudiza nikwila nkeñelu yaNzambi nakudya yakudya. (Matewu 4:4; Yowanu 4:34) Neyi mutachika kuhosha hayiluwa hampinji yimunakudiza Bayibolu, mukuletesha mwini kwenu kubula kwikala nampwila yakuspiritu. Eña, mwatela kuhanjeka hakukala kumukweti. Ilaña mwatela kuhanjeka mpinji yacheñi.—Yishimu 10:19; 15:23.

CHIMWATELA KWILA: Sonekenu yililu yiyedi hela yisatu yimwakeña nankashi yikwetiyi mwini kwenu. Ifuku dikwawu neyi himukuhanjeka hayuma yakuspiritu yinakundami kunoyu yililu, mwatela kumuleja mwini kwenu nenu yililu yikwetiyi yayitiyishaña kuwaha.

Mukañula Yuma Yimunakutumba

Neyi mwikala adisumbula awuspiritu, kumbidi mwakashakama mukuwunda nimuzañalu chikupu mumaluwi. Izu daNzambi datushiika nawu ‘yejima yatumbañayi muntu, diyakañulayi cheñi.’—Aŋalija 6:7.

A Frederick niLeanne, itwashimuna hakutachika kwachinu chibaaba, adizili chalala munilu lushimbi lwamuBayibolu. Ichi anashakami mumaluwi hadi yaaka 45 nawa aneluki nawu mukuzata nañovu mwafumaña yuma yayiwahi. Frederick nindi: “Namutwinkileña ñodami nyiloña hamuloña wakubula kuhanjeka. Mukuhita kwampinji, natoñojokeli nami anami nawa natela kudishaku.” Leanne nindi: “Kusweja kumukeña Yehova Nzambi dikwatukwashili kuumika yihuñu yitwamweneña. Yaaka yejimiyi, twadizaña nikulombela hamu mpinji yejima. Chinamona nfumwami Frederick nakufwila kumwekesha yililu yawakwaKristu, anami nawa nekalaña namuchima wakumukeña.”

[Tumazu twaheshina]

DIHULENU NENU . . .

▪ Mpinjinyi yinalombeleli hamu namwinikwami kakukumishaku?

▪ Chumanyi chinatela kwila chatela kumukwasha mwinikwami kulonda yekali wakasunuka nankashi chikutukwasha kuhanjekela hamu nsañu yakuspiritu?