Indi Atata Jawantu Anateli Kudikunda Ñahi Nawanyanawu Awamayala?

“ATATA, muloñadi chimwelukila yuma yayivulu?” Komana ayihulahu dehi lwihu lwamuchidiwu kudi mwanenu weyala? Haniyi mpinji, hadaha mwazañaleli hakwikala nvwali. Nawa mwaswejeli kuzañalala hakumona chakulileñayi mwanenu namaana akutiyilila yuma yimwamufumbileña nikuhetela muyuma yimwamulejeleña. *—Yishimu 23:15, 24.

Chineli hanahiti yaaka, komana mwanenu weyala wuchidi wayikeña neyi chayikeñeliyi hatachi? Tahindi chineli hakukula, hanakuyilemesha chikupuku? Chumanyi chikuyikwasha kukudikunda namwanenu weyala hampinji yinakupamayi? Tusambilenu kutala hakukala kwamonañawu atata jawantu.

Kukala Kusatu Kunasweji Kumwekana

1. KUBULA MPINJI: Mumatuña amavulu, mali atambulañawu atata jawantu akukwasha nachu chisaka. Kakavulu, ajikumwinaña itañwa dejima kumudimu. Mumaluña amakwawu, atata jawantu ekalaña nakapinji kantesha hohu kakuhanjeka nawanyanawu. Chakutalilahu, antu ehujoleluwu muFrance katataka, ashimwini nawu atata jawantu ashakamaña nawanyanawu jiminiti 12 nakufunta mwishina hefuku.

TOÑOJOKENU HACHUMICHE: Mwahanjikaña maora añahi namwanenu weyala? Chimwahita mulungu wumu hela yiyedi, kwila musoneka maora ejima imwahanjikaña namwanenu weyala hefuku hefuku nehi? Mwakadihayamina hakumona maora imwahanjikaña.

2. KUBULA KWIKALA NACHITACHI CHACHIWAHI: Amayala amakwawu hiyavulileña kuhanjeka nawatata jawuku. Jean-Marie washakamaña muFrance nindi: “Hinahanjikileña nawatataku.” Kukalanyi kunakumonayi Jean-Marie? Wahosheli nindi: “Namonaña kukala kweneni nankashi. Chakutalilahu, chankalilaña hakwila nitachiki kuhanjeka chiwahi nawanyanami awamayala.” Kukala kukwawu, anyana awamayala ayiluka atata jawu chiwahi, ilaña hakachi kawu hosi wubwambu. Philippe wudi nayaaka 43 nindi: “Chayikalileña atata kunleja nawu nakukeña. Ichi inakudikita kulonda nisweji kumukeña mwanami weyala.”

TOÑOJOKENU HACHUMICHE: Komana kudikunda kumwadikundili nawatata yenu kunakuyikwasha kuhemba chiwahi mwanenu weyala tahindi kunayiluwañeshi? Munakwimbujola yaaku yawatata yenu yayiwahi tahindi yatama? Munakuyimbujola ñahi?

3. CHISEMWA: Muyisemwa yikwawu, antu ahoshaña nawu tata yawantu hakweti mudimu wakutala  anyanaku. Luca akulishililuwu Kumujika waEurope nindi: “Kwesekeja nakunakulila, antu atoñojokaña nawu mumbanda diyi watela kutala anyana.” Muyisemwa yikwawu niyena, atata jawantu ayilejaña nawu diwu atela kubabesha anyana chikupu. Chakutalilahu, George wakulila mwituña dimu damuAfrica wahosheli nindi: “Kwesekeja nachisemwa chetu, atata jawantu hiyahemenaña hamu nanyanaku kuchina akenda kayidiwula. Ami dinu chinakunkalila kushakama hamu namwanami weyala.”

TOÑOJOKENU HACHUMICHE: Mudimwinyi wazatañawu atata jawantu mwiluña dimwashakama? Ayileja nawu mudimu wakukulisha anyana wawambanda? Komana atata jawantu ayikonkomwenaña nawu atela kukeña anyanawu awamayala, tahindi hichiyobu?

Neyi mudi atata yawantu anakumona kukala kwamuchidiwu, chumanyi chikuyikwasha? Talenu njila jinalondeluhu.

Tachikenu Kufumba Mwanenu Weyala Nawansi

Anyana awamayala anvwalikaña nampwila yakwimbujola atata jawu. Dichi mwatela kumufumba kulonda yayimbujoleña hampinji yachidiyi kansi. Munateli kumufumba ñahi? Nawa mpinjinyi yimwatela kuhanjeka nindi?

Mwatela kuzatila hamu namwanenu weyala tunyidimu kala mpinji. Chakutalilahu, neyi munakuzata nyidimu yahetala, mwilenu yayikwashuku. Neyi munakukomba mwinkenu kakombu, neyi munakwimba ibuku, mwinkenu fosholu kulonda yoyikwashuku. Wukuzañalala kuzatila hamu nanenu atata yindi! Hela chakwila mukushimbula kumanisha owu mudimu, ilaña mukukolesha mpanda yakukeña namwanenu nawa mukumudizisha mwanenu chakuzata chiwahi nyidimu. Kunyima kwakweni, Bayibolu yakonkomweneni atata jawantu kuzatila hamu nawanyanawu nyidimu nikuhanjeka nawu haniyi mpinji nikuyileja nshimbi. (Kuhituluka 6:6-9) Kufumba kwamuchidiwu kuchidi kuzatika nikulelu.

Kubombela hakuzatila hamu namwanenu, mwatela kuwana mpinji yakuhemena hamu. Kuhemena hamu kunateli kumukwasha nankashi mwanenu. Ankuluñaña ahoshaña nawu atata jawantu ahemenaña hamu nawanyanawu anyanya, ayikwashaña kwiluka yuma yayiha nikwikala ahamuka.

Mwana weyala neyi nakuhema natata yawantu wukuhetelamu hama. Mukwakusandujola wumu Michel Fize nindi: “Mwana welukaña kuhosha chiwahi natata yindi kuhitila mukuhema.” Hakuhema, tata yawantu wamwekeshaña kukeña kudi mwanindi weyala munhoshelu nimuyililu. Chelayi mwenimu, dikwila nawu nakumuleja mwanindi kukeña akwawu. André, tata yawantu wamuGermany nindi: “Henohu mwanami weyala wuchidi kansi nankashi, twavulileña kuhemena hamu. Namukumbatileña, niyena wankeñeleña.”

Mpinji yakukama niyena himpinji yatela kukoleshayi tata yawantu mpanda yindi yakukeña namwanindi weyala. Mwatela kumutañila jimpanji mpinji yejima nikutiya chinakuhoshayi hayuma yamuzañaleshaña nikukala kunakumonayi. Neyi mwila mwenimu, wukutwalekahu kwikala namuchima wakuhanjeka nenu mukukula kwindi.

Twalekenuhu kukeña Yuma Yakeñayi

Anyikwenzi amakwawu amwekanaña neyi adiwulaña mwayilejañawu atata jawu. Neyi mwanenu weyala nakukaana kwakula malwihu imunakumwihula, bayi mutoñojoka nenu wuchi wunayi dehi mukesuku. Hadaha wukuyinka matu neyi muhimpa njila yimunakumulejelamu.

Mpinji jikwawu Jacques, tata yawantu wamuFrance, chamukalilaña kuhanjika namwanindi weyala, Jérôme. Chatela yamukanjikijeña mwanindi kuhosha, wahimpili njila yakutiyañenamu, watachikili kutuma ngunja nindi. Jacques nindi: “Neyi tunovwahishi dehi mujimba, twashakamineña hamatahu nakunooka. Iyi diyi mpinji yahosheleñayi mwanami weyala yuma yatoñojokeleñayi. Hela chakwila welukileña nindi kudi mpinji yitukwikala nkawetu etu ayedi, kwatukwashili kwikala nawubwambu wakola chikupu.”

 Mukwila ñahi neyi mwanenu weyala hakeña yiselaku? André wanukaña chikupu maora ombileñayi nakutala tutumbwa namwanindi. André nindi: “Twatulileña yitwamu hanji nawufuku. Twavwalileña yakuvwala yamashika, iku tudi namalupasa atii kumakasa nakutala mwiwulu. Twahanjikileña hadi Muntu waleñeli tutumbwa. Twahanjikileña hansañu jetu etu aweni. Twahosheleña nihayuma yikwawu.”—Isaya 40:25, 26.

Mwatela kwiladi neyi yuma yakeñayi mwanenu weyala enu kuyikeña nehi? Neyi chidi mwenimu, bayi musha muchima hayuma yimwakeñaku. (Afwilipi 2:4) Ian wamuSouth Africa nindi: “Ami nakeñeli nankashi yisela, ilaña mwanami weyala Vaughan hayikeñeluku. Yena wakeñeli jindeki nimakompyuta. Anami natachikili kukeña yumiyi, namutwalileña kuyisela kwafulumokañawu añendeshi andeki nakuzañalesha antu nikuhema yisela yamadeki hakompyuta. Nachimoni neyi hamuloña wakuhemena hamu yisela, chamukwashiluku Vaughan kuhosha mukukasunuka nankashi nanami.”

Mukoleshenu Kulonda Yadikuhweleli

“Talenu, Tata, talenu!” Komana mwanenu wayilejahu dehi mazu amuchidiwu neyi kudi chuma chachiha chinadiziyi? Neyi washika dehi hawukwenzi, komana wuchidi kulomba lusesa chakadi kuyisweka? Hadaha dichelañayi wanyi. Ilaña dichatela kwilayi kulonda yatweshi kukula namaana.

Talenu chuma cheliliyi Yehova Nzambi yomweni namwanindi wumu. Hampinji yakeñeleñayi Yesu kwinza nakushakama hanu hamaseki, Nzambi wahosheli hatooka nindi wamukeña, nindi: “Diyi Mwanami nakeña, natiyaña kuwaha nankashi mudi yena.” (Matewu 3:17; 5:48) Eñañi, mudi namudimu wakubabesha nikuleja mwanenu weyala. (Aefwesesa 6:4) Hanu dinu kudihu mpinji yimwamuhamekaña hayuma yayiwahi yinahoshiyi hela yinakoñiyi?

Amayala amakwawu chayikalilaña kuhameka anyanawu nikumwekesha kukeña. Hadaha muyisaka mwakulilawu anvwali jawu atalileña hohu hayiluwa bayi hayuma yayiwahi yakoñeleñawuku. Neyi mwafuma muchisaka chamuchidiwu, mwatela kuzata nañovu kulonda mukwashi mwanenu weyala yadikuhweleli. Mukumukwasha ñahi? Luca, itwashimuna dehi, wazataña namwanindi weyala, Manuel, wayaaka 15 mpinji yejima nyidimu yahetala. Luca nindi: “Mpinji jikwawu, namulejaña Manuel kutachika kuzata nkawindi nawa neyi yuma yinamukalili wukuntambika. Kakavulu, watweshaña kuzata nkawindi. Yuma yakoñañayi yamuzañaleshaña nawa yamukwashañaku kudikuhwelela. Neyi nawuzati chiwahi, namuhamekaña. Nawa neyi nakañanyi, namulejaña nami natiyi kuwaha hakudishaku.”

Munateli kusañumuna cheñi mwanenu weyala kuhitila mukumukwasha kulonda yafwili yikonkwanyi yamaneni. Mukwila ñahi neyi mwanenu washikijaña yikonkwanyi yindi chovu-chovu? Mukwila ñahi neyi yikonkwanyi yindi hela chakwila yatama wanyi, ilaña yinambuki nayikonkwanyi yimwadi kumutondela? Mwatela kutoñojokahu chiwahi. Jacques itwashimunahu dehi nindi: “Nesekaña kukwasha mwanami weyala kufwila yuma yakatweshayi. Ilaña nesekaña cheñi kumona neyi yikonkwanyi yeniyi yindi, bayi neyi yamuku. Cheñi nelukaña nami yomwenindi neluki mpinji yakashikijayi yikonkwanyi yindi.” Chimwatiya nsañu yinahoshiyi mwanenu, muhamekenu hayuma yayiwahi yinakoñiyi, nawa mukwashenu kulonda yawahishi yuma yinakukañanyayi, chumichi chikumukwashaku kushikija yikonkwanyi yindi.

Kuhosha hohu chalala, mukudikunda namwanenu mwakamwekanaña kukala. Ilaña kumbidi, mwanenu weyala wakadikundaña hohu nanenu. Muloña kwosi muntu wakaanahu dehi kudikunda namuntu wunamukwashi nankashi.

[Tumazu twaheshina]