Malwihu Ehulañawu Antañi . . .

Komana Iseki Akadijilumuna mu 2012?

▪ “Antu amavulu apompeli mumukala wumu wamuFrance, akuhweleleli nawu adinu iseki keña dijilumuki . . . Akuhwelela nawu iseki dakajilumuka ha 21 December 2012, dihakamana yaaka 5,125 yidi hakalenda kakushankulu kawaMaya.”—dichahosheli chikuzulemba chaBBC.

Hela chakwila kudi wunsahu wafwikijañawu anlomboli ansakililu alejaña antu nawu kaayi kakakuma, niantu aditenaña nawu hiyasayantisiti niantu amakwawu amuyaaka nkulakaji yamu 21 ashimunaña yuma yikamwekana kumbidi, ilaña iseki dakashakama nyaka yayivulu nankashi. Eña, iseki akadijilumuna wanyi mu 2012. Iseki dikatwalekahu bayi neyi muchaaka cha 2012 hohuku ilaña niyaaka yikalondelahu.

Bayibolu yatulejaña nawu: “Ikiñu dawantu dimu hidikuya, ikiñu dikwawu hidikuhiñamu, [ilaña] iseki saña dashakamina haya nyaka.” (Mukwakutaŋisha 1:4) Shinshikenu cheñi mwatalisha mazu ahoshawu haIsaya 45:18 nawu: “Yehova waleñeli mawulu . . . wawumbili iseki, wadituñili, wadishimatishili, wadileñeli dibuli kwikala damukunkulwayi, wadiwumbili mushakami antu, nindi, Yami Yehova, hikudi wacheñuku.”

Komana tata yawantu wukweti kukeña nateli kuumba mpinji yeneni nakumutuñila mwanindi chuma chachiwahi chakuhemesha chakumuzañalesha, kuhiñahu hakuchikisañana hanyima yakumwinka chumichi? Mwana wukutiya kutama. Munjila yoyimu, Nzambi waleñeli iseki kulonda antu adiluñisheña. Nzambi walejeli antu akusambila Adama naEvu nindi: “Semununenu, muvuleña, muwanini heseki, mudovwahishi.” Kuhiñahu, “Nzambi wamweni yuma yejima yeliliyi nindi yinawahi nankashi.” (Kutachika 1:27, 28, 31) Nzambi wahimpa wanyi chuma chafuukwilayi iseki; haketeja iseki kudijilumunaku. Yehova wahosheli nakukonkomwena hachuma chakanayi nindi: “Hidakafunta kudami makasakasaku, dakela munakeña, dakakoña chachiwahi mudimu wadu wunaditemesheleli.”—Isaya 55:11.

Hela chochu, Yehova nakukeña ‘kujilumuna antu akisañanaña iseki.’ (Chimwekeshu 11:18) Mwizu dindi wakana nindi: “Akwakwoloka diwu akashakama mwituña, antu alala diwu akashalamu. Hakwila antu atama akayifumisha mwituña, antu akwatilaña akwawu makasu akayibwitamu.”—Yishimu 2:21, 22.

Wakayibwitamu mpinjinyi? Kwosi muntu weluka. Yesu nindi: “Ilaña itañwodu hela mpinji oyu kwosi wayilukaku, chalala hela añelu amwiwulu hela Mwana, chiña Tata.” (Maku 13:32) A Yinsahu jaYehova hiyafwilaña kushimuna ifuku dakajilumunayi Nzambi antu atamaku. Hela chakwila eluka ‘chinjikijilu’ chamafuku akukuminina nawa akuhwelela nawu antu anakushakama mumpinji yatenañawu muBayibolu nawu “mafuku akukuminina,” hiyeluka mpinji yayeni yakenza kukumaku. (Maku 13:4-8, 33; 2 Timotewu 3:1) Ashiya yuma yejimiyi mumakasa aTata yawu wamwiwulu niMwanindi.

Chayinu mpinji, aYinsahu jaYehova anakuzata mudimu wakushimwina nsañu yayiwahi yaWanta waNzambi, nfulumendi yamwiwulu yakayuula nikubalumuna Iseki kwikala paradisa mukekala kuwunda, ‘mwakaswanawu akwakuloña nakushakamamu haya nyaka.’—Masamu 37:29.

[Mazu aKusakilila eniMwevulu wudi hefu 12]

Image Science and Analysis Laboratory, NASA-Johnson Space Center