“Mpinji Yakukeña Nimpinji Yakuhela”

“NZAMBI diyi kukeña.” Mumatuña amakwawu antu asonekaña awa mazu nakuyisha hambañu yamatalawu. Eñañi, awa himazu amawahi alumbululaña chekalayi Nzambi, chakutalilahu chabadika chakumwekesha kukeña.

Ilaña, antu amavulu hiyeluka nawu awa mazu afuma muBayiboluku. Kapostolu Yowanu diyi wayisonekeli nindi: ‘Muntu wabula kukeña hanamwiluki Nzambuku, muloña Nzambi diyi kukeña.’ (1 Yowanu 4:8) Yowanu wasonekeli cheñi hakukeña kwamwekesheliyi Nzambi kwakupulwisha antu nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”—Yowanu 3:16.

Iyi nsona yaleteshaña antu amakwawu kutoñojoka nawu mpinji yejima Nzambi wadiwulaña yuma yejima yitwelaña. Yuma yakoñañawu antu amavulu yamwekeshaña nawu atoñojokaña nawu Nzambi hakayinka muloña kukoola yuma yejima yelañawuku. Komana atoñojokaña mwalala? Komana Nzambi wakeña antu ejima, amawahi niatama? Kwekalahu mpinji yahelañayi Nzambi antu?

Chaleteshaña Nzambi Kukeña Muntu Hela Kumuhela

Mwanta wamaana Solomoni wahosheli nindi: “Yuma yejima yikweti yilaaka yayu, niyuma yejima yafuukulawu mwishina dewulu yikweti hawililu wayu. . . . Mpinji yakukeña, nimpinji yakuhela.” (Mukwakutaŋisha 3:1, 8) Kwesekeja nanilu lushimbi, hela chakwila Nzambi wukweti kukeña nankashi niluwi, kwekalaña mpinji yahelañayi muntu.

Indi izu dakwila nawu “kuhela” datalisha mudihi kwesekeja nachadizatishawu muBayibolu? Mukanda wumu wahosha nawu: “Munyikanda yajila izu dakwila nawu ‘kuhela’ datalisha mwamuvulu. Dinateli kutalisha mukuhela muntu chikupu, kumufuukwila chatama nawa kakavulu mwabombela nikumushila muntu nkunyi. Kuhela kwamuchidiwu kwamudyaña muntu kumuchima nawa kwaleñelaña yekali namuchima wakumwila mukwawu chatama.” Iku dikuhela kutweluka nankashi kunatandi mukaayi kejima, nawa twamonaña yuma yafumañamu neyi muntu naheli mukwawu muniyi njila. Ilaña mukanda wowumu wahosha cheñi nawu: “‘Kuhela’ kwatalisha cheñi mukubula kukeña muntu chakadi kumufuukwila chuma chatama.”

Tukuhanjeka hanawa mazu amuchiyedi analumbululi mwatalisha izu dakuhela. Awa mazu atalisha mukuhela muntu chikupu, kumuhoshola, bayi neyi kumuhembela nkunyi, ndulu hela kufwila kumwila katamaku. Nzambi nateli kuhela muntu muniyi njila? Talenu mukanda waYishimu 6:16-19 chiwahosha: “Kudi yuma yitanu nachimu yamonayi Yehova nindi hiyishimashima, niyitanu nayiyedi yikwikala, yatiyañayi kumuchima bwi; mesu akudimujola, idimi datwambaña, makasa apwekeshaña mashi akadi muloña, muchima wafuukulaña yitoñojoka yatama, nyendu yayaña lufuchi kuyuma yatama, chinsahu wakutwamba washimunaña  yakutwamba, nimuntu waleteshaña yikonkojola kudi antu evumu dimu.”

Neyi chitunamoni, kwekala yililu yikwawu yahelayi Nzambi. Ilaña hashikenaña dakuhela muntu wakoñaña yuma yamuchidiwuku. Washinshikaña hayuma yinaleteshi owu muntu yakoñi yuma yamuchidiwu chidi neyi kuzeyazeya kwakumujimba, iluña kwadiyi, chitachi chindi nikubula kwiluka yuma. (Kutachika 8:21; Aroma 5:12) Nsoneki waYishimu walumbulula iyi nsañu nachakutalilahu chachiwahi nindi: ‘Yehova wahosholaña antu akeñayi; dimu mwelaña tata yamuntu namwanindi atiyañayi kuwaha.’ (Yishimu 3:12) Nvwali wahelaña yililu yatama yinakukoñayi mwanindi, ilaña hichinayi mukwila nawu namuheli mwaninduku, nakufwila hohu kumukwasha kulonda yaleki kwila yuma yatama kuhitila mukumubabesha. Hamuloña wakukeña, Yehova niyena dichelañayi neyi namoni nindi nateli kupulwisha owu mukwanshidi.

Neyi Kudi Chuma Chinaleteshi Amuheli

Chumanyi chikumwekana neyi muntu neluki chuma chakeñayi Nzambi ilaña nakaani kuchila? Muntu wamuchidiwu akumukeña wanyi kudi Nzambi, akumuhela. Neyi wakoñaña yuma yahelayi Yehova mumushikila, Nzambi wukumuhela, wakojejaña Nzambi kumushila nkunyi. Chakutalilahu, Bayibolu yahosha nawu: “Yehova wesekaña mukwakuloña; ilaña muchima windi wahelaña niwatama nimuntu wakeña madombu.” (Masamu 11:5) Antu amuchidiwu abulaña kubalumuka mumuchima hiyayanakenañaku, neyi chalumbulwiliyi kapostolu Pawulu mumukanda wayisonekeleliyi Aheberu nindi: “Neyi tukuvulumuna chakukeñamu, iku tweluka dehi nsañu yalala, hikunashali chimuna chikwawu chakuketwila nyiloñaku; kunashali kwawoma waweni wakutalila kusompesha nikesi kabidima kakanoñesha ayilumbu.” (Aheberu 10:26, 27) Muloñadi Nzambi wakukeña chelilañayi mwenimu?

Neyi muntu wakoñaña nshidi yeneni mumushikila, kutama kwelañayi kwatentamaña chikupu mudi yena chakwila hakutwesha kuhimpaku. Nateli kwikala neyi ntamba waheña, mutuntuki nawa wachinchika. Bayibolu yesekejaña muntu wamuchidiwu nachisumpa wakañanyaña kuhimpa mabeña indi. (Yeremiya 13:23) Neyi muntu yakoña muloña wakubula kubalumuka muchima, nakoñi nshidi yatenawu muBayibolu nawu ‘nshidi yahaya nyaka,’ yabulaña kwanakenawu.—Maku 3:29.

Diyi nshidi yakoñeluwu Adama naEvu niYudasi Isakaroti. Chineli Adama naEvu ayileñeli awanina nawa elukili chikupu nshimbi yaNzambi yayilejeluwu, chinakumwekana hatooka to-o nawu avulumwini mumushikila nawa hiyakayanakenaku. Chelili anavulumuni dehi, Nzambi hahosheli nindi ateleli kubalumuka mumuchimaku.  (Kutachika 3:16-24) Hela chakwila Yudasi wadiña wabula kuwanina, wadikundeleña naMwana kaNzambi chikupu, ilaña wamufukejeleli. Dihafumini Yesu hakumutena nindi ‘mwana kamukwakunoña.’ (Yowanu 17:12) Bayibolu yashimuna cheñi nawu Diyabolu watachikili dehi kuputola mumushikila nawa chindi yowu kunoña. (1 Yowanu 3:8; Chimwekeshu 12:12) Awa antu akojejeli Nzambi kuyishila nkunyi.

Hela chochu, twazañalala hakwiluka netu bayi neyi antu ejima avulumunaña akayijilumunaku. Yehova wadiwunjika chikupu nawa hatiyaña kuwaha kubabesha antu avulumunaña mukuyambaku. (Ezekeli 33:11) Wayilejaña nindi abalumuki kulonda ayanakeni. Twatañaña netu: “Watama aleki mwelañayi, muntu waheña aleki mwatoñojokañayi, afunti kudi Yehova, yena wakamutiyila wushona; afunti kudi Nzambi yetu, yena wakamwanakena nankashi.”—Isaya 55:7.

Chitwatela Kwiluka Mpinji Yakukeña niYakuhela

Chineli amwimbujolaña Nzambi, akwaKristu alala atela kwiluka ‘mpinji yakumwekesha kukeña, nimpinji yakuhela.’ Yitoñojoka yawuntu yinateli kuluwañesha yitoñojoka yamuntu kubula kwikala namuchima wakukeña niluwi. Ilaña mazu akambanji Yuda anateli kutukwasha kwiluka mpinji yitwatela kutiyila muntu luwi nakuhela nshidi: ‘Amakwawu yitiyilenu luwi nawoma, nakuhela niihina dakuvwala dinatami namajilu amujimba.’ (Yuda 22, 23) Dichi twatela kuhela yuma yatama bayi kuhela muntu wunakoñi chuma chatamaku.

AkwaKristu ayileja cheñi kukeña ayilumbu jawu kuhitila mukuyilila yuma yayiwahi. Yesu nindi: “Keñenu ayilumbu jenu, ninawa ayikabishaña, yilombelenu.” (Matewu 5:44) Dimuloña watwalekelañawu aYinsahu jaYehova kushimwina nsañu yayiwahi yaWanta waNzambi mpinji yejima kudi antuñinawu hela chakwila amakwawu hiyetejaña iyi nsañuku. (Matewu 24:14) Kwesekeja nachahosha Bayibolu, aYinsahu amonaña muntu wejima nawu atela kumutiyila luwi nikumukeña kudi Yehova. Neyi azata nañovu kulonda akwashi antu, ilaña kwonti kwawu indi kwiji hiyakuyikabisha nikuyikabisha, aYinsahu alondaña kufumba kwaPawulu kwakwila nawu: “Kiswilenu ayikabishaña nkisu; kumina dakukisula nkisu, bayi kushiñanaku . . . Bayi mwila mwinenu chatama nakatama kanayiliyuku.” (Aroma 12:14, 17) Eluka nawu Yehova diyi weluka muntu watela kukeñayi niwatela kuhelayi. Diyi Nsompeshi wakukumishaku munsañu yakufwa niyakupulwisha.—Aheberu 10:30.

Eñañi, “Nzambi diyi kukeña.” Hakwila etu, twatela kumusakilila muloña watukeña nawa twatela kuzata nañovu kulonda twiluki chuma chakeñañayi nikwila mwakeñayi. A Yinsahu jaYehova amwiluña denu akutiya kuwaha kuyikwasha kwiluka nsañu yidi muBayibolu yenu kulonda mwiluki nkeñelu yaNzambi nichakuyizatisha muchihandilu chenu. Chimwela mwenimu Nzambi hamba kayihelaku, ilaña wakayikeña.

[Mazu ekoku adi hefu 13]

“Kudi yuma yitanu nachimu yamonayi Yehova nindi hiyishimashima, niyitanu nayiyedi yikwikala, yatiyañayi kumuchima bwi; mesu akudimujola, idimi datwambaña, makasa apwekeshaña mashi akadi muloña, muchima wafuukulaña yitoñojoka yatama, nyendu yayaña lufuchi kuyuma yatama, chinsahu wakutwamba washimunaña yakutwamba, nimuntu waleteshaña yikonkojola kudi antu evumu dimu.”—YISHIMU 6:16-19.

[Mazu ekoku adi hefu 14]

“Neyi tukuvulumuna chakukeñamu, iku tweluka dehi nsañu yalala, hikunashali chimuna chikwawu chakuketwila nyiloñaku; kunashali kwawoma waweni wakutalila kusompesha nikesi kabidima kakanoñesha ayilumbu.”—AHEBERU 10:26, 27

[Mazu ekoku adi hefu 15]

“Watama aleki mwelañayi, muntu waheña aleki mwatoñojokañayi, afunti kudi Yehova, yena wakamutiyila wushona . . . Yena wakamwanakena nankashi.”—ISAYA 55:7

[Mwevulu wudi hefu 14]

Nvwali wukweti kukeña wamubabeshaña mwanindi kulonda yamukwashi

[Mwevulu wudi hefu 15]

Akwakaleya amavulu anahetelumu nankashi mukukeña kwaNzambi nimuluwi lwindi