Muloñadi Chitwatela Kwovwahila Nshimbi JamuBayibolu?
Muloñadi Chitwatela Kwovwahila Nshimbi JamuBayibolu?
KOMANA nsañu yahosha Bayibolu kutalisha hakubulakana kweyala namumbanda yamukunkulwayi nawa yatukañeshaña? Inehi. Nsañu yahosha Bayibolu kutalisha hakubulakana kweyala namumbanda yatukwashaña kubula:
▪ Kukata nyisoñu yafumaña mukama nawambanda hela amayala
▪ Yuma yafumaña mukwimita mavumu amuyiputa
▪ Kuyeñashana nayihuñu yafumaña mukudiseña
▪ Kukabakana nachinleji
▪ Kumona ilamba hamuloña wakuyizatisha kudi akwenu
Nleñi yetu, Yehova Nzambi, * nakukeña nindi tuzatishi yamukunkulu yindi kulonda tudiluñishi nikuhetelamu. Nzambi diyi ‘watulejaña mwakutuwahisha.’ (Isaya 48:17) Muntu wovwahilaña nshimbi jamuBayibolu jahosha hakubulakana kweyala namumbanda:
▪ Watambwilaña nkisu yaNzambi
▪ Wekalaña wawunda muyitoñojoka
▪ Atiyañana muchisaka
▪ Wekalaña nejina dadiwahi
▪ Wadilemesha
Chumanyi chimwatela kwila neyi chayinu mpinji himunakulondela nshimbi jajiwahi jamuBayiboluku? Munateli kuhimpa chihandilu chenu? Komana Nzambi wakayibabesha hayuma yimwakoñeli kunyima?
Talenu chuma chamwekeni: Antu amakwawu adiñi muchipompelu chawakwaKristu muyaaka nkulakaji yakusambila mpinji yimu adiña akwakujikwa, ayivumbi niakwakukama nawakwawu amayala hela ambanda. Ilaña ahimpili chihandilu chawu, nawa ahetelelumu nankashi. (1 Akorinda 6:9-11) Nikulelu, antu amavulu mukaayi afuukulahu kuleka yuma yamuchidiwu. Aleka chihandilu chakubatajala nakwila wujila nawa anatambwili wuloku hamuloña wakuwahisha yililu yawu kwesekeja nanshimbi jamuBayibolu. Talenu nsañu yaSarah itwashimuna muchibaaba chakusambila.
“Hohenohu Muchima Wawundili”
Sarah welukili nindi chihandilu chakukulujoka nawamayala chamushili mumpompa yakubula muzañalu wakeñeleñayi. Wahosheli nindi: “Chinleji chami chadiña nakuñocha. Natiyili nsonyi nawa nakameneni nami keña nimiti hela kutambula musoñu wafwana. Ilaña nelukili nami Nzambi wudi kwoku nawa nelukili nami yuma yinakoñeleña yamuneñesheleña. Nadimweneña kwikala wamajilu nawa chumichi chanñocheleña kumuchima.”
Nkumininaku, Sarah wekalili nawuswa wakuhimpa chihandilu chindi. Walejeli anvwali jindi adiña aYinsahu jaYehova, nindi amukwashi. Walombeli cheñi wukwashu kudi aeluda apama awakwaKristu muchipompelu. Sarah nindi: “Nahayamini nankashi hakumona chankeñeluwu kudi anvwali jami niaeluda muchipompelu nimuzañalu watiyiluwu. Hohenohu muchima wawundili.”
Ichi Sarah nakuhemba anyana ayedi. Sarah nindi: “Nayilejaña anyanami yuma yinakoñeli chakadi kuyisweka. Nakeñaña eluki ihuñu dinamweni hamuloña wakudiwula nshimbi yaNzambi. Inakufwila kuyikwasha kulonda eluki wuloku wakumujimba nimuyitoñojoka wafumaña mukwovwahila nshimbi jaNzambi jahosha hakubulakana kweyala namumbanda. Neluki chikupu nami Nzambi watwinkaña nshimbi jajiwahi muloña hakeñaña nindi twiñili mukukalaku.”
Anenu nawa munateli kuhetelamu neyi mwovwahila nshimbi jaNzambi jajiwahi. Bayibolu yatukana nawu: ‘Nshimbi jaYehova jaloña, jaluñishaña muchima wamuntu; nshimbi jaYehova jajiwahi chikupu, jatoneshaña mesu amuntu . . . Hakuyihemba hadi wuloku weneni.’—Masamu 19:8, 11. *
[Tumazu twaheshina]
^ Neyi chashimunawu muBayibolu ijina daNzambi diyi Yehova.
^ Hakwila mwiluki kufumba kwamuBayibolu kwakuvulu, mwani hanjekenu nawaYinsahu jaYehova amwiluña denu. Hela sonekenu mukanda kuzatisha keyala yatelela yidi hefu 4 hela yenu haWeb site yetu ya www.watchtower.org.
[Mazu ekoku adi hefu 8]
Antu adiwulaña nshimbi jamuBayibolu kakavulu adiletelaña jomisha mbaña
[Mazu ekoku adi hefu 9]
Antu ovwahilaña nshimbi jamuBayibolu ekalaña nachinleji chitooka nawa atiyañanaña muchisaka
