Kundamenu Kwakwihi Nanzambi

Munateli ‘Kumwiluka Nzambi Chikupu’

YEHOVA NZAMBI watwinka iheta dalema nankashi, nawa wakeñaña nindi twikali nadu. Idi iheta hidakojejaña muntu kwikala nayikumbaku, ilaña damuwundishaña muchima nikwikala nachihandilu chachiwahi nawa yuma yejimiyi muntu hakutwesha kuyilanda namaluku. Hihetanyi? Mazu ahosheliyi Mwanta wamaana Solomoni haYishimu 2:1-6 akushimuna.

Solomoni wateneni idi iheta nindi ‘hikumwiluka Nzambi chikupu,’ dikwila nawu, kwiluka chalala chaNzambi ninkeñelu yindi yashimunawu muBayibolu. (Vasi 5) Munidi iheta mudi yuma yayivulu.

Ntañishilu yalala. Bayibolu yakula malwihu amuchidiwu: Indi ijina daNzambi hinyi? (Masamu 83:18) Chumanyi chamwekanaña neyi muntu nafwi? (Masamu 146:3, 4) Muloñadi chatuleñeleluwu? (Kutachika 1:26-28; Masamu 115:16) Eñañi, ñakwilu yanawa malwihu yalema nankashi.

Kufumba kwakuwahi. Bayibolu yatulejaña chitwatela kwikala nachihandilu chachiwahi. Yumanyi yimunateli kwila kulonda mushakami yaaka yayivulu mumaluwi? (Aefwesesa 5:28, 29, 33) Yumanyi yimwatela kwila kulonda mukulishi anyana chiwahi? (Kuhituluka 6:5-7; Aefwesesa 6:4) Munateli kwikala ñahi namuzañalu muchihandilu? (Matewu 5:3; Luka 11:28) Munatoñojokuhu nenudi, mwalala iku kufumba kwakuwahi kunateli kuyikwasha nankashi, netu?

Kwiluka chekalayi Nzambi niyililu yikwetiyi. MuBayibolu hohu dimutwatela kuwana nsañu yalala yakumwiluka nachu Nzambi. Himuntu wamuchidinyi? (Yowanu 1:18; 4:24) Watwakamenaña? (1 Petulu 5:6, 7) Wukweti yililwinyi yabadika? (Kwidika 34:6, 7; 1 Yowanu 4:8) Mwalala, mwatela kuhosha nenu nsañu yalala yahosha hadi Nleñi yetu yalema chikupu.

‘Kumwiluka Nzambi chikupu’ didi iheta dadeni dakuspiritu. Tunateli kudiwana ñahi? Nsañu yidi muYishimu kapetulu 2 navasi 4 yikutuleja mwesekejeliyi Solomoni iku kwiluka ‘nayuma yalema yaswekawu.’ Toñojokenu hachumiche: Chuma chalema chaswekawu kwila chivubuka mwibuku mwachiswekawu nakuholokela mumakasa amuntu wunakudihitila nehi. Twatela kuzata nañovu kulonda tuchinoni. Nikumwiluka Nzambi dichikwekala. Iheta denidi dekala muBayibolu. Hakwila tudiwani, twatela kuzata nañovu.

Solomoni walumbulula chitwatela kwila kulonda tutweshi ‘kumwiluka Nzambi chikupu.’ Mazu akwila nawu ‘tambulaku mazu ami’ nawa ‘teñelekaku itu deyi’ anakumwekesha nawu twatela kwikala namuchima wakwiteja. (Vasi 1, 2) Mazu akwila nawu ‘kubilela,’ ‘kukeñakeña’ ‘nikutondatonda’ anakumwekesha nawu twatela kudishaku chikupu nakufwila kuwana njila jakukeñelamu iheta. (Vasi 3, 4) Hakwila twikali nanidi iheta, twatela kudiza Bayibolu nankashi namuchima wumu.—Luka 8:15.

Neyi tutachikilaku kukeñakeña jinjila, Yehova wukutukwasha. Vasi 6 yahosha nawu, “Yehova diyi wenkaña muntu maana.” Nzambi hohu diyi wunateli kutukwasha kwiluka nankashi chalala chamuBayibolu. (Yowanu 6:44; Yililu 16:14) Nawa twatela kukuhwelela awa mazu: Neyi musandujola chiwahi Mwiizu daNzambi, ‘mukumwiluka Nzambi chikupu,’ iheta dikuyiletela muzañalu nankashi muchihandilu chenu kubadika maheta akumujimba.—Yishimu 2:10-21. *

[Tumazu twaheshina]