Dizenu Nsañu Yidi Mwizu Danzambi

Mwatela Kwiladi Kulonda muChisaka Chenu Mwikali Muzañalu?

Chinu chibaaba chinakuhosha hamalwihu imwadihulahu dehi nikumwatela kuwana ñakwilu muBayibolu yenu. A Yinsahu jaYehova akuzañalala kuhanjeka nenu haniji ñakwilu.

1. Muloñadi maluwi akalemesha chiyalemena kulonda muchisaka mwikali muzañalu?

Yehova, Nzambi wamuzañalu, diyi watachikili maluwi. Aletaña muzañalu muchisaka muloña akwashaña antu kwikala namuchima wakudikunda nawa adi neyi chiswamu mwakukulishila anyana. Indi Nzambi wahoshahu nindidi hansañu yamaluwi? Wakeñaña nindi atwalekuhu nawa nindi eyala namumbanda atela kusonekesha maluwi awu kunfulumendi. (Luka 2:1-5) Nzambi wakeñaña eyala namumbanda kwikala ashinshika mumaluwi awu. (Aheberu 13:4) Yehova weteja akwaKristu kudiseña hohu nakwikala nawuswa wakusumbula hela kusumbuka cheñi neyi mwini kwawu neli wuvumbi.—Tañenu Matewu 19:3-6, 9.

2. Indi eyala namumbanda atela kudihemba ñahi mukachi kawu?

Yehova waleñeli amayala niambanda nindi azatileña hamu. (Kutachika 2:18) Hakwikala mutu wachisaka, iyala watela kukeñela chisaka chindi yuma yakumujimba nikuyidizisha kulonda amwiluki Nzambi. Watela kwikala namuchima wakukeña ñodindi nankashi. Eyala namumbanda atela kudikeña nikudilemesha. Chineli adisumbula awanina wanyi, atela kwikala namuchima wakudanakena kulonda ekali namuzañalu muchisaka.—Tañenu Aefwesesa 4:31, 32; 5:22-25, 33; 1 Petulu 3:7.

3. Neyi mumaluwi enu mudi wufwinda, mwatela kumuhayika mwini kwenu?

Neyi munakumona yinzeñeli namwini kwenu, ikalenu namuchima wakudikeña. (1 Akorinda 13:4, 5) Izu daNzambi hidahosha nawu adisumbula atela kwambuka kulonda amanishi kukala kunakumonawuku. Ilaña neyi kukala kunasweji, akwaKristu akufuukulahu aweni neyi atela kwambuka hela nehi.—Tañenu 1 Akorinda 7:10-13.

  4. Enu anyana, Nzambi nakukeña nindi mwikali antu amuchidinyi?

Yehova nakukeña nindi mwikali namuzañalu. Wayifumbaña chiwahi nindi mutweshi kuluña muwansi wenu. Nakukeña nindi mwovwahileña mwayilejañawu anvwali jenu. (Akolose 3:20) Yehova wahamekaña yuma yejima yimwelaña kulonda mumushimeki nachu.—Tañenu Mukwakutaŋisha 11:9–12:1; Matewu 19:13-15; 21:15, 16.

5. Enu anvwali, anyanenu anateli kwikala ñahi namuzañalu?

Mwatela kuzata nañovu kulonda mukeñeli anyana yakudya, hakukama niyakuvwala. (1 Timotewu 5:8) Hakwila nawu anyanenu ekali namuzañalu, mwatela kuleja anyanenu kulonda amukeñi Nzambi nikwovwahila mwahoshañayi. (Aefwesesa 6:4) Neyi enu mwikala namuchima wakumukeña Nzambi mwanenu niyena wukusweja kumukeña. Neyi kufumba kwenu kukushindamenaña Hezu daNzambi, mukwolola yitoñojoka yamwanenu.—Tañenu Kuhituluka 6:4-7; Yishimu 22:6.

Anyana atiyaña kuwaha neyi munakuyikolesha nikuyihameka. Cheñi mwatela kuyifumba nikuyibabesha. Neyi muyifumba muniyi njila, chikuyikwashaku kubula kwila yuma yikuyineñesha. (Yishimu 22:15) Dichi, bayi mwikala namuchima wakuzuwa hakuyibabeshaku.—Tañenu Akolose 3:21.

A Yinsahu jaYehova asonekaña nyikanda yayivulu yatela kukwasha nankashi anvwali nianyana. Iyi nyikanda yashindamena haBayibolu.—Tañenu Masamu 19:7, 11.

Neyi munakukeña nsañu yikwawu, talenu kapetulu 14 muwunu mukanda waChumanyi Chacheni Chatañishaña Bayibolu?