Nakeñeleña Kwikala Neyi Mwana Kayefwata Wamumbanda

Washimwini Joanna Soans

Henohu nichidi kankaña, nakeñeleña kwikala neyi mwana kaYefwata wamumbanda chikupu. Ñitejenu nilumbululi chuma chinatoñojokeleña nichinekalili neyi mwana kaYefwata.

MU 1956, nayili nakupompa katachi nawaYinsahu jaYehova kupompa kweneni mumusumba waBombay (wunakutenawu makonu nawu Mumbai), India, nawa iku kupompa kwahimpili chihandilu chami. Mpanji yahosheleña hadi mwana kaYefwata wamumbanda yanshikili hamuchima chikupu.

Neyi chimwatañaña muBayibolu, mwana kaYefwata wakaanini kusumbuka hadiñayi kankaña. Chumichi chamukwashili tata yindi kwila chuma chasanyikiliyi. Dichi wakalakeleli hetala daYehova nawujiki, hela hatabanaka, muchihandilu chindi chejima.—Ansompeshi 11:28-40.

Ochinakeñeleña kwikala neyi mwana kaYefwata wamumbanda! Ilaña namweni kukala kweneni, kwesekeja nachisemwa chetu muIndia hayina mpinji hiyetejeleña muntu kushakama wujikiku.

Chitachi Chachisaka Chami

Hadi anyana atanu nawumu, yami nadiña mwana wamuchitanu avwaliluwu kudi Benjamin niMarcelina Soans muUdipi, musumba wakumujika wekala kwakwihi nachikumu chakaluñalwiji muIndia. Tulu didi idimi detu, hidimi dahoshañawu kudi antu kwakwihi natununu tuyedi. Hela chochu, kufwana antu ejima amuUdipi, twatañili shikola mwidimi daKannada.

Antu amunidi iluña alemesha nankashi kusumbula nikusumbuka nikuvwala nyana. Hampinji yinakulileña, kwosi anlejeluhu mazu amwidimi daTulu akwila nawu “wujiki,” “wuudi,” hela “kuneña hamuloña wakwanuka antañaku.” Chamwekeneña neyi kwosi antu ashakamineña wujiki. Chakutalilahu, atata niamama ninetu anyanawu twashakamineña itala dimu nawankaaka jami, amandumi niañodi jawu, atatankaji niasonyi jami amavulu.

Kwesekeja nachisemwa, etu anyana twakundamini kukamama, muloña anyana ayikunjikaña kudi mama yawantu. Antu alondeleleña chikota chamama yawantu nawa anyana awambanda atambwilileña iseka deneni dawuswana. Munyikala yikwawu yawaTulu, mwana wamumbanda watwalekeleñahu kushakama namama yindi neyi nasumbuki hamu ninfumwindi.

Hamuloña wakwila chisaka chetu chatachikili kuya munsakililu yawakwaKristu, yuma yikwawu yadiña yambuka. Mafuku ejima nampinji yamelela ankaaka awamayala alombweleña chisaka hakudifukula, hakulomba nikutaña Bayibolu yamwidimi daTulu nañovu. Mpinji yejima neyi hiyakubakula muBayibolu yawu yataboka nakututañila, chadiña neyi kwiji nakushinkula muchikasha mudi yingelingeli yalema wuseya. Twatiyileña kuwaha! Nsona yaMasamu 32:1 yantiyishileña kuwaha: “Yehova diyi kabiña kami; hinukubula chumaku.” Nadihwileña nami, ‘Indi iwu Yehova hinyi, nawa muloñadi chamutenenañawu nawu kabiña?’

“Makalu” Aholokeli Mumesu Ami

Hamuloña wakukala kwamali hanyima yaNjita Yamukaayi Kejima yamuchiyedi, twayili nakushakama kuBombay, hadi makilomita 900 nakutwadiña. KuBombay, mu 1945 aYinsahu jaYehova ayedi ayendeleli atata nawa ayinkeli kamukanda kashindamena haBayibolu. Atata akitañili kejima nakwiteja nsañu yadiñamu nawa atachikili  kuleja antu ahosheleña idimi daKannada nsañu yeniyi. Kukutachika kwa 1950, izanvu danyanya dawatudizi datoheli nakutachika chipompelu chatachi mwidimi daKannada muBombay.

Atata nawamama atudizishili kwikala atudizi niantañishi amawahi aBayibolu. Mafuku ejima awanineña mpinji yakulomba nikudiza nanetu. (Kuhituluka 6:6, 7; 2 Timotewu 3:14-16) Ifuku dimu chinatañileña Bayibolu, makalu achifwikija aholokeli mumesu ami. (Yililu 9:18) Nelukili nami Yehova amufwanisha kudi kabiña muloña walombolaña, wadiishaña nikukiña akwakudifukula indi.—Masamu 23:1-6; 83:18.

Yehova Wanlombolaña Chiwahi

Napapatisheweli hanyima yakupompa kweneni kwadiña muBombay mu 1956. Chimwahitili añondu atanu nawumu, nembujoleli chakutalilahu chayayami weyala Prabhakar nawa nekalili mukwakushimwina wampinji yejima. Hela chakwila nadiña nampwila yakushimwina chalala chamuBayibolu kudi antu, ilaña natiyileña woma nankashi kuhosha hayuma yinakuhwelela mumudimu wakushimwina. Nadiña nakumamata nawa izu dami dazalileña. Nadihoshesheli nami, ‘Nateli kuzata iwu mudimu nawukwashu waYehova hohu!’

Yehova wankwashili kuhitila mudi amishonali aHomer niRuth McKay afumini kuCanada, adizili shikola yawumishonali yawaYinsahu jaYehova muNew York, U.S.A., mu 1947. Ankwashili hampinji yinabulili kwiluka chakushimwina hakutachika mudimu. Mpinji yejima twadiña nakuhituluka naRuth kulonda niluki chakushimwina kwitala nikwitala. Welukili yuma yinatela kwila kulonda nibuleña kutiya woma. Wankwatileña kumakasami azalileña nakuhosha nindi: “Kwakama nehi mboku. Tuyi nakushimwina hetala dikwawu.” Muchima wami wawundileña namazu ahosheleñayi akunkolesha.

Ifuku dimu anlejeli nawu Elizabeth Chakranarayan, ntañishi yaBayibolu wakuluka yitembi wachikulumpi, wukwikala mukwetu mutukuzatilaña mudimu wakushimwina. Nasambilili kuhosha nami: ‘Nukutwesha ñahi kushakama naniwu muhela? Himukulumpi nankashi kubadika ami.’ Ilaña wanteleleli nankashi.

“Hitwekalaña Nkawetuku”

Iluña datachi kwatulejeluwu kushimwina wadiña musumba waya mpuhu waAurangabad, hadi makilomita kwakwihi na 400 kumusela waBombay. Twashikeneni kwiluka netu mumusumba wejima mwadiña antu kwakwihi nakanunu kamu twadiñamu hohu aYinsahu ayedi. Cheñi, nadizili idimi daMarathi, muloña didi idimi dahoshañawu antu amavulu muniwu musumba.

Mpinji yikwawu, natiyileña wuudi nankashi nawa nadilileña neyi mwana wakadi mama yindi. Ilaña Elizabeth wahosheleña neyi nvwali wadiña nakunkolesha. Wahosheleña nindi, “Mpinji yikwawu tunateli kutoñojoka netu tudi nkawetu, ilaña hitwekalaña nkawetuku. Hela chakwila, wudi kwakulehi nawamabwambu jeyi nichisaka cheyi, Yehova wudi naneyi mpinji yejima. Mwilishi yekali ibwambu deyi, wuudi wejima wukumana.” Mazu anlejeleñayi anankwashi nikulelu.

Neyi hitukweti mali akwendelaku, twendeleña makilomita akushika ku 20 mafuku ejima munyikwakwa yalunkuñu nimalowa, munkanza nimumashika. Nampinji yanooña mpepela yatatileña nakushika kumadigilizi 40. Muchilaaka chanvula, maluña amakwawu adiña namalowa hadi tukweji twatuvulu. Ilaña twachiwanini neyi antu akunidi iluña adiña akala kubadika yilaaka.

Ambanda hiyahosheleña nawamayala hakachi kawantuku chiña neyi hiyantaña, nawa ambanda hiyavulileña kutañisha amayalaku. Dichi antu atuseheleña nikutukabisha. Hadi tukweji tutanu nakamu twakusambila, twapompeleña kupompa  kwaBayibolu kwamulungu nimulungu etu ayedi hohu. Chimwahitili mpinji, antu akweti mpwila yakudiza apompeleña. Hohenohu, twikala nikadizanvu. Amakwawu twatachikili kuya nawu nakushimwina.

“Shaku Muchima Hakwilukisha Mudimu”

Chimwahitili yaaka yiyedi nachikunku, atulejeli kuya nakuzatila cheñi kuBombay. Elizabeth watwalekeluhu kuzata mudimu wakushimwina, ami añilili nawu niyikwasheñaku atata kubalumuna nyikanda yashindamena haBayibolu mwidimi daKannada muloña haniyi mpinji adiña nkawawu. Atiyili kuwaha muloña adiñi nanyidimu yayivulu muchipompelu.

Mu 1966, anvwali jami afuukwiluhu kufunta kuUdipi, kutwafumini. Hakufuma kuBombay, aTata anlejeli nawu: “Shaku muchima hakwilukisha mudimu, mwanami. Wenda wubalumuna munjila yapela yatela kutiyawu antu. Bayi wusweja kudikuhwelelaku, nawa ikalaku wadizoza. Shindamenaku hadi Yehova.” Awa diwu mazu akukumishaku anfumbiluwu, muloña afwili kufuma tuhu hampinji yafuntiluwu kuUdipi. Dichinelaña hakuzata mudimu wami wakubalumuna nikulelu.

“Wunakukeña Kwikala Nanyana Wanyi?”

Kwesekeja nachisemwa, anvwali muIndia aloñeshaña yuma kulonda anyanawu eñili muwulu hela chakwila anyanawu awamayala niawambanda achidi atwansi nawa ayikoleshaña kulonda ekali nanyana. Kakavulu antu añihwileña nawu: “Wunakukeña kwikala nanyana wanyi? Hinyi wakakuhembaña neyi wunashinakaji dehi? Watiyaña wuudi wanyi?”

Mpinji yikwawu natiyileña kutama hakusweja kuñihujola malwihu amuchidiwu. Hela chakwila nayilejeña wanyi, ilaña neyi nidi nkawami namulejeleñamu Yehova kukala kunamweneña. Natiyileña kuwaha hakwiluka nami wanlemesheli hela chakwila nadiña mujiki. Hakwila nawu nifuukuluhu cheñi kumuzatila chakubula yuma yakunluwañesha, nadiña nakutoñojoka hadi mwana kaYefwata wamumbanda niYesu, wejima wawu adiña ajiki nawa ashili muchima hakumuzatila Nzambi.—Yowanu 4:34.

Chawaana Chakufuma Kudi Yehova

Twatwalekeluhu kwikala nawulunda wawuwahi naElizabeth hadi yaaka kwakwihi na 50. Wafwili mu 2005, nayaaka 98. Henohu wudi kwakwihi nakufwa wakañenyeña kutaña Bayibolu muloña wakubula kumona chiwahi, dichi mafuku ejima wadiña nakulomba chikupu kudi Nzambi. Mpinji yikwawu natoñojokeleña nami nakuhanjeka nsañu yamunsona namuntu mukapeka kindi, komana wadiña nakuhosha naYehova. Nzambi wadiña ibwambu dindi chikupu nawa wahandileña neyi kwiji nakumumona. Neluki nami dichuma chacheni chinateli kunkwasha kwikala washinshika hakumuzatila Nzambi neyi cheliliyi mwana kaYefwata wamumbanda. Namusakililaña Yehova hakunyika muhela wachikulumpi wapama wakundizisha nikunkolesha muyaaka yami yawansi nimukukala kwami kwejima.—Mukwakutaŋisha 4:9, 10.

Natambwili nkisu jajivulu hakumukalakela Yehova neyi chatambwililiyi mwana kaYefwata wamumbanda. Kwikala mujiki nikulondela kufumba kwamuBayibolu kunankwashi kwikala nachihandilu chachiwahi nikutwalekahu ‘kumukalakela Mwanta chakadi kuluwañesha.’—1 Akorinda 7:35.

[Mwevulu wudi hefu 22]

Atata anakuhana mpanji yawantu amavulu muBombay muma 1950

[Mwevulu wudi hefu 22]

Nidi naElizabeth henohu kanda yafwi

[Mwevulu wudi hefu 23]

Tunakutambika antu kumpanji yaBayibolu muBombay mu 1960

[Mwevulu wudi hefu 23]

Nawakwetu mutwazatilaña mukasanji ketu kakubalumwina