Antu Anakukeñakeña Ñakwilu

“Antu amavulu nankashi eluka nsañu yantesha hadi [Yesu]. Chili tukweti chikuhwelelu hela twajinokaña, wejima wetu twadihulaña netu, ‘Indi iwu muntu hinyi?’”—NSONEKI STAN GUTHRIE.

ANTU akeñaña chikupu kumwiluka Yesu. Nyikanda yahosha hadi yena ayilandaña nankashi. Mafwilimu aYesu anatandi nankashi. Ilaña antu saña ehwilawu malwihu kutalisha hadi Yesu. Antu ekala nayitoñojoka yashiyashana kutalisha hadi Yesu.

Yaaka yantesha yinahituhu, akwakushimuna nsañu ayedi ehwili antu haintaneti kulonda akuli ilu lwihu lwakwila nawu, “Indi Yesu hinyi?” Iyi diyi ñakwilu yakwiluwu:

● “Hadaha wadiña rabi (ntañishi) wemekili chakutalilahu chachiwahi chakutiyila antu luwi muchihandilu chindi.”

● “Wadiña muntu neyi chitwekala nawa wahandili chihandilu chasweja kuwaha.”

● “Kwosi wunsahu wamwekeshaña nawu Yesu wadiñi kwoku.”

● “Yesu hiMwana kaNzambi wavwalikili, wafwili nawa wasañukili mudi afu kulonda yatupulwishi kunshidi yetu. Wekala kwoku nimakonu nawa Wakenza cheñi hamaseki.”

● “Nakuhwelela nami Yesu Kristu diyi mwana kaNzambi wumu hohu, himuntu chikupu nawa muntu yowumu hinzambi chikupu.”

● “Anyana anyanya hohu diwu akuhwelela nawu Yesu wadiña kwoku.”

Chakadi nikujina, nsañu yamuchidiwu yashiyashana chikupu hiyinateli kwikala yalalaku. Komana kuduhu mukanda mutunateli kuwana nsañu yalala yinateli kwakula chikupu malwihu itwehulaña hadi Yesu? Ansoneki ayinu magazini akuhwelela nawu Bayibolu Hizu daNzambi nawa diyi yinateli kutuleja nsañu yalala chikupu hadi Yesu. *—2 Timotewu 3:16.

Muchibaaba chinalondeluhu, tukuhanjeka hañakwilu yamuBayibolu kutalisha hamalwihu avula kwihulawu antu hadi Yesu. Yomwenindi wahosheli nindi “muntu wukumukuhwelela” wukahanda. (Yowanu 3:16) Tunayikoleshi kushinshika jiñakwilu kulonda mufuukuluhu enu aweni neyi munateli kudiza nsañu yayivulu yahosha hadi Yesu nichimunateli kumukuhwelela.

[Tumazu twaheshina]