Bayibolu Yahimpaña Yihandilu Yawantu

CHUMANYI chakojejeli iyala wumu kufunta munsakililu mwakulililiyi mwafuminiyi? Indi mukwenzi weyala wawanini ñahi muntu wakeñeleñayi chikupu kumumona neyi tata yindi muchihandilu chindi chejima? Tañenu muditiyili chinahoshuwu awa antu.

“Nakeñeleña kufunta kudi Yehova.”—ELIE KHALIL

CHAAKA CHAKUVWALIKA: 1976

ITUÑA KWAFUMAYI: CYPRUS

KUHANDA KWINDI: MWANA WAJIMBELI

CHIHANDILU CHAMI CHAKUNYIMA: Navwalikilili muCyprus ilaña nakulilili muAustralia. Anvwali jami hiyaYinsahu jaYehova, nawa azatili nañovu hakwila andizishi kumukeña Yehova Niizu dindi Bayibolu. Hela chochu, natachikili kudikaña henohu nichidi kampululu. Nawombolokeleña mwitala nawufuku nakudiwana nawatwansi awambanda niamayala. Tweyileña nyotoka nikudiñija mukukala kukwawu.

Hakusambila nelileña yumiyi mukuswamujoka muloña natiyileña woma wakutiyisha anvwali jami kutama. Ilaña nalekeli kutiya woma chovu-chovu. Nakwatili wubwambu nawakulumpi abulili kumukeña Yehova nawa ahuñumwini munjila yatama. Nkumininaku nayilejeli anvwali jami nami hinukuyaña muchipompelu chawuku. Esekeli kunkwasha mumesu awunda, ilaña nakaanini. Anvwali jami aneñeli nankashi.

Chinafumini hetala natachikili kunwa yitumbu yashetana, nawa natachikili kudima nikulandisha damba nankashi. Chihandilu chami chadiña chatama nawa navulileña kuya kumatala akunwina walwa. Natachikili kuhila swayi. Neyi muntu yahosha yuma yinahela nazuwileña nankashi, kakavulu nadiña nakuzuwila antu nikuyeta. Kafwampi nelileña yuma yejima yandizishiluwu nawu mukwaKristu hatela kwila yumiyuku.

BAYIBOLU CHIYAHIMPILI CHIHANDILU CHAMI: Natachikili kudikunda namukwetu samadamba wafwishili tata yindi henohu wuchidi kansi. Twahanjikileña kushika nimukachi kawufuku. Mpinji jikwawu nawufuku, wadiña nakunleja nindi wamwanukileña nankashi tata yindi. Chineli nelukili kuchiñeja kwakusañuka, natachikili kumuleja nami Yesu wasañwili afu nawa nami wakana kusañula afu kumbidi. (Yowanu 5:28, 29) Namulejeleña nami, “Fwikijaku chiwakatiya hakumumona tata yeyi cheñi. Wejima wetu twakashakamaña muParadisa hamaseki haya nyaka.” Iyi nsañu yamushikili ibwambu dami hamuchima.

Mpinji jikwawu ibwambu dami waleteleña mpanji yidi neyi mafuku akukuminina hela  ntañishilu Yawanzambi Asatu. Nazatishileña Bayibolu yindi nakumuleja nsona yashiyashana yamwekeshaña nsañu yalala hadi Yehova Nzambi, Yesu, nimafuku akukuminina. (Yowanu 14:28; 2 Timotewu 3:1-5) Chinasweja kuhosha nsañu yaYehova nebwambu dami, natoñojokeleña chikupu hadi Yehova.

Mbutu yansañu yalala yamuBayibolu yadiña yashakama hohu mumuchima wami, mbutu yatumbiluwu anvwali jami, yatachikili kumena chovu-chovu. Chakutalilahu, mpinji yikwawu neyi nidi hachidika nakunwa yitumbu yashetana nawakwetu, natoñojokeleña hadi Yehova chakadi nikwiluka. Amabwambu jami amavulu ahosheleña nawu amukeña Nzambi, ilaña yililu yawu yamwekesheleña nawu hiyamukeñaku. Nelukili chuma chinateleleli kwila muloña hinakeñeleña kwikala neyi wenaku. Nakeñeleña kufunta kudi Yehova.

Kafwampi chaswayi kwiluka chuma chakwila, ilaña chakala hama kwila chumichi. Yuma yikwawu yadiña yapela kuleka, nalekeli kunwa yitumbu yashetana chakubula kukala. Nalekeli kudikunda nawamabwambu inadikundileña nawu nawa natachikili kudiza Bayibolu naeluda mukwaKristu.

Hela chochu yuma yikwawu yadiña yakala kuleka. Chankalilili nankashi kuleka kuzuwa. Mpinji yikwawu mwahitileña mpinji hakwila nizuwi, ilaña kukasumuka hinukuzuwa cheñi. Chinazuwa natiyili kutama nakutoñojoka nami nidi mukañanyi wandunda. Natiyileña kutama, nawa namulejeleña eluda wandizishileña Bayibolu hakukala kwami. Eluda wadiña wawunda nawa waluwi, wadiña nakunkolesha hama. Ifuku dimu wanlejeli kutaña chibaaba chimu muKaposhi Kakutalila chahosheleña hakulema kwakubula kuzeya. * Twahanjekeli yuma yinatela kwila neyi nahili. Natwesheli kuwundisha ndulu chovu-chovu hamuloña wakulomba kudi Yehova nikwanuka ichi chibaaba. Nkumininaku muApril 2000, napapatisheweli nakwikala Chinsahu chaYehova. Anvwali jami atiyili kuwaha nankashi.

CHINAHETELUMU: Nalulutaña wanyi nachinleji chamuchima nawa nakamenaña wanyi, muloña neluka nami hinatamishaña mujimba wami nayitumbu yashetana hela yuma yatamaku. Hichikweti muloña nayuma yinelañaku, chili inakuzata, inakupompa kupompa kwawakwaKristu, hela kuhema, nekala namuzañalu chikupu. Nalemesha wumi.

Namusakililaña Yehova muloña anvwali jami hiyazeyeli kunkwashaku. Natoñojokaña cheñi mazu aYesu ekala haYowanu 6:44 akwila nawu: “Kwosi muntu natweshi kwinza kudami chakadi kumukoka kudi Tata wantemesheluku.” Natiyaña kuwaha hakwiluka nami nafunta kudi Yehova muloña wankwokweli.

 “Nakeñeleña chikupu kwikala natata.”—MARCO ANTONIO ALVAREZ SOTO

CHAAKA CHAKUVWALIKA: 1977

ITUÑA KWAFUMAYI: CHILE

KUHANDA KWINDI: MUKWAKWIMBA TUMINA TWATENAÑAWU NAWU DEATH-METAL

CHIHANDILU CHAMI CHAKUNYIMA: Anleleli kudi mama muPunta Arenas musumba wawuwahi waStrait of Magellan kwakwihi nakabeta kambwela kaSouth America. Anvwali jami ambukili henohu nichidi nayaaka yitanu yakuvwalika, nawa chumichi chanleñeleli kutoñojoka nami añumba. Nakeñeleña chikupu kwikala natata.

Mama wadizileña Bayibolu nawaYinsahu jaYehova nawa wansendeleña kukupompa kwawakwaKristu Hetala daWanta. Hela chochu, hinakeñeleña kuya nakupompaku, dichi nadilileña neyi tunakuya nakupompa. Chinashikijili yaaka 13 nalekeli kuya nakupompa.

Haniyi mpinji nakeñeli tumina nankashi nawa nelukili kwimba. Chinashikijili yaaka 15, natachikili kwimba tumina twatenañawu nawu heavy-metal nideath-metal hayidika, kumatala akunwina walwa nikuyidika yikwawu. Kudikunda nawañimbi eluka kwimba, kwanleñeleli kukeña kwimbaña tumina twalemeshawu chikupu. Natachikili kudiza tumina heluña hadizilañawu añimbi mwiluña detu. Chinashikijili yaaka 20 nayili kuSantiago nakudizilaku chikupu. Natwalekeluhu kwimba namazanvu embileña heavy-metal nideath-metal.

Yaaka yejimiyi hinadiña namuzañaluku. Hakwila nawu nimanishi chineñi, nanwineña walwa niyitumbu yashetana nawamabwambu jami mutwembilileña inamweneña nami hichisaka chami. Nadiña chiluwañimbi nawa chumichi chamwekeneña mummwekenu yami. Navwalileña yakuvwala yiyila, nahembeleña wevu nawa nsuki yakulili nakushika kwakwihi nambunda.

Kakavulu yililu yami yanleñeleleña kuzuña nawantu nawa akapokola ankwatileña. Ifuku dimu chinasheteli walwa, nalukukili izanvu dawakwakulandisha yitumbu yashetana adiña nakutukabisha. Awa antu añeteli nankashi chakwila ankotweli chibaña.

Hela chochu, akwetu inadikundili nawu diwu anneñesheli chikupu. Ifuku dimu nelukili nami kajila kami wadiña nakwenda nebwambu dami wahamuchima hayaaka yayivulu, nawa amabwambu jami ejima anjindileña iyi nsañu. Chankatili kumuchima hama.

Nafuntili kuPunta Arenas kunatachikili kutañisha tumina nikuzata mudimu wakwimba chisanji chatenañawu nawu cello. Natwalekeluhu kwimba nikukwata tumina nawakwakwimba tumina twaheavy-metal nideath-metal. Nadimweni nakansi wamumbanda walubanji wejina daSussan, nawa twatachikili kushakama hamu. Chimwahitili mpinji, Sussan welukili nindi mama yindi wakuhweleleli muntañishilu Yawanzambi Asatu nawa ami hinakuhwelela iyi ntañishiluku. Dichi wañihwili nindi, “Indi nsañu yalala hichumanyi?” Nakwili nami neluka nami ntañishilu Yawanzambi Asatu yakutwamba ilaña hinelukili hasonekawu muBayiboluku. Ilaña nelukili atela kumuleja. Namulejeli nami aYinsahu jaYehova anateli kumuleja nsañu yalala muBayibolu. Kufumahu nelili chuma chinabulili kwila hayaaka yayivulu, nalombeli kudi Nzambi nami yankwashi.

Chimwahitili mafuku antesha, namweni muntu wamwekeneña wenimbu, nawa namwihwili neyi hiChinsahu chaYehova. Hela chakwila wadiña  nakuzaala muloña wammwekenu yami, wakwili malwihu ami chiwahi kutalisha hampinji yakupompa Hetala daWanta. Chinadimweni naniwu muntu nakuhweleleli chikupu nami Nzambi nakuli kulomba kwami. Nayili Kwitala daWanta nawa nashakami kunyima kulonda abuli kuñiluka. Ilaña amavulu añilukili muloña nadiña nakupompa kuwansi. Antambwilili nachisambu nikunkumbata chakwila natiyili kuwaha nankashi. Chamwekeni neyi nafunti hamukala. Chinamweni muntu wandizishileña Bayibolu kuwansi, namulejeli nami yatachiki kundizisha cheñi.

BAYIBOLU CHIYAHIMPILI CHIHANDILU CHAMI: Ifuku dimu natañili Yishimu 27:11, yahosha nawu: “Eyi mwanami, ikalaku mukwamaana, wutiyishaña muchima wami kuwaha.” Natiyili kuwaha hakwiluka nami muntu wakehelamu nateli kumuzañalesha Nleñi wayuma yejima. Nelukili nami Yehova diyi Tata yami inakeñeleña muchihandilu chami chejima.

Nakeñeleña kumuzañalesha Tata yami wamwiwulu nikwila mwaya muchima windi, ilaña nadiña nduñu wayitumbu yashetana niwalwa hayaaka yayivulu. Nelukili mazu aYesu ekala haMatewu 6:24, hahosha nawu “kwosi muntu natweshi kukalakela anyanta ayeduku.” Chinadiña nakulwisha kulonda nihimpi chihandilu chami, lushimbi lwasonekawu ha 1 Akorinda 15:33 lwahosha nawu: “Kudikunda nawantu atama kwatamishaña maana amawahi,” lwanshikili hamuchima. Nelukili nami hinateli kuleka yililu yami yatamaku neyi nitwalekahu kwendela maluña wowamu nikudikunda nawantu wowamu. Kufumba kwamuBayibolu kwadiña kwatiyakana: Nateleleli kuzata nañovu kulonda nileki yuma yadiña nakundimbwisha.—Matewu 5:30.

Chineli naswejeli kukeña tumina chankalilili nankashi kuleka kwimba nikutiyilila tumina twaheavy-metal. Nkumininaku hamuloña wakunkwasha kudi amabwambu amuchipompelu, nalekeli. Nalekeli kusweja kunwa walwa nikunwa yitumbu yashetana. Natewili nsuki niwevu nawa nalekeli kuvwala yakuvwala yiyila hohu. Chinamulejeli Sussan nami inakukeña kutewula nsuki, wakeñeli nankashi kwiluka yuma yinadiña nakwila Hetala daWanta. Wahosheli nindi, “Inakuya neyi kulonda nimoni yuma yazatikaña Hetala daWanta.” Watiyili kuwaha yuma yamweni, nawa watachikili kudiza Bayibolu chakubula kuumba mpinji. Nkumininaku twadisumbwili naSussan. Twapapatisheweli nakwikala aYinsahu jaYehova mu 2008. Twazañalala hakwikala anuñañana namama hakumukalakela Yehova.

CHINAHETELUMU: Nashiya kaayi kakweti muzañalu wamakudi niamabwambu atama. Nichidi nakeña tumina, ilaña chayinu mpinji natondaña hohu twatuwahi. Nazatishaña yuma yinamweni muchihandilu chami hakukwasha chisaka chami niamakwawu, sweje-e atwansi. Nakeñaña kuyikwasha kulonda eluki nawu yuma yamukaayi yamwekanaña kuwaha, ilaña kumakumishilu yekala ‘yawuzondu hohu.’—Afwilipi 3:8.

Nawana amabwambu ashinshika muchipompelu chawakwaKristu mwekala kukeña kwalala nikuwunda. Sweje-e dinu, chineli nakundama kwakwihi naYehova, dikwila nawu nawana Tata yami.

[Tumazu twaheshina]

[Mazu ekoku adi hefu 13]

“Nafunta kudi Yehova muloña wankwokweli”