Malwihu Ehulañawu Antañi . . .

Hinyi watemesheli “katumbwa”?

▪ Komana mwamonahu dehi nyivwimbimbi hela yisela yamwekeshaña anyanta asatu, hela amayala akwamaana, anakuya nakuhempula mukeki Yesu wunavwalikili mwadishilañawu ayimuna? Kwesekeja naniyi nsañu, Nzambi wazatishili katumbwa kulonda kayilomboli kwitaña muBetelemi. Mumatuña amakwawu anyana amavulu eluka nimajina anawa anyanta asatu, Melchior, Caspar, niBaltazar. Komana iyi nsañu yaya mpuhu yaditejaña nayuma yahosha Bayibolu? Inehi. Iyi nsañu yekala yakutwamba muyuma yayivulu.

Chatachi, antu wenawa adiña anyi? MuchiGriki chacheni, Bayibolu hiyayitenaña nawu anyanta hela amayala akwamaanaku. Adiña akwakuhoña natutumbwa. Chakadi nikujina adiña asenji ahoñeleña kushindamena hatutumbwa chitwendaña mwiwulu. Nsañu yamuBayibolu hiyashimuna majina hela kuvula kwawantu ayili nakumuhempula Yesuku.

Chamuchiyedi, indi awa amayala ayili nakuhempula mpinjinyi? Bayi neyi hampinji yachidiñayi Yesu nkemba mwadishilañawu ayimunaku. Tweluka ñahi iyi nsañu? Nsoneki waNsañu Yayiwahi Matewu wahosha nindi: “Eñila nimwitalodu, hiyakumona owu mwana wanyanya hamu namama yindi Mariya.” (Matewu 2:11) Ilukenu nenu Yesu hadiña nkembaku, ilaña wadiña “mwana wanyanya.” Mariya niYosefu hiyadiña nakukama mwitañaku; ilaña adiña nakushakama mwitala.

Chamuchisatu, hinyi watemesheli “katumbwa” kulonda kayilomboli akwakuhoña natutumbwa? Akulumpi jansakililu avula kutañisha nawu Nzambi diyi watemesheli “katumbwa.” Komana chalala Nzambi diyi watemesheli katumbwa? Anukeñu nenu, “katumbwa” hikasambilili kuyilombola akwakuhoña natutumbwa kuBatelemuku. Ilaña kayilombweli kudi Mwanta Herodi muYerusalema. Ashimwini kuvwalika kwaYesu kudi mwanta wechima nawa mukwakujahana wasweja ñovu nikumuleja yuma yaletesheli yamuheli chikupu mwana wadi kwikala “mwanta wawaYudeya.” (Matewu 2:2) Herodi wakasili kafunta, nakuyileja nindi akanfuti nakumuleja kwiluña kwadiyi kulonda niyena yakayi nakudifukula kudi mwana. Kuhiñahu “katumbwa” kayilombweli akwakuhoña natutumbwa kudi Yosefu niMariya. Dichi yuma yeliluwu akwakuhoña natutumbwa yadi kuleñela mwana wanyanya kufwa neyi chakwila Nzambi hazatiluhu chumaku. Ilaña Nzambi wazatiluhu chuma. Herodi wahilili nankashi chelili akwakuhoña natutumbwa abuli kufunta nakumuleja, chakwila wahanini lushimbi lwakujaha anyana amayala ejima anyaka yiyedi niabulili kushika munyaka yiyedi, adiñi muBetelemi, niadiñi kuñinza jawu jejima.—Matewu 2:16.

Nkumininaku, Yehova wamuteneni Yesu nindi “Mwanami nakeña, natiyaña kuwaha nankashi mudi yena.” (Matewu 3:17) Toñojokenu ntahi: Komana Tata waloña wukweti kukeña wadi kutonda akwakuhoña natutumbwa awusenji apanda adiña nakwila yuma yakaanishiluwu muNshimbi jindi kwikala antemesha jindi? (Kuhituluka 18:10) Komana wadi kuzatisha katumbwa kulonda kayilomboli kudi muntu wafwana nawa mukwakujahana wasweja ñovu mwituña, nakushimuna nsañu yamuleñeleleli Herodi wechima kutiya kutama chikupu? Komana Nzambi wadi kuzatisha katumbwa kokamu niakwakuhoña natutumbwa kuyilombola kwiluña kwadiña mwanindi henohu hakweti wakumwamwinaku?

Chakutalilahu: Mukulumpi wawamashidika wamuwahi natemeshi mushidika windi wakuhwelelayi kuya nakuzata mudimu wafwana mwiluña dawayilumbu. Komana wukuyileja ayilumbu jindi kwakumuwana ona mushidika? Nehi. Chochimu, Yehova watemesheli Mwanindi mukanu kaayi kafwana. Komana wadi kumuleja Mwanta Herodi watama kwiluña kwadiña Mwanindi henohu hakweti wakumwamwinaku? Kwakulehi.

Hanu dinu, hinyi watemesheli “katumbwa” hela chuma chadifwana nakatumbwa? Hinyi wakeñeleña chikupu kumujaha Yesu nikumukañesha kulonda yabuli kukula nakushikija mudimu wamutemesheleluwu hamaseki? Hinyi wakeñaña kudimba antu nikutwamba, madombu nikujahana? Yesu yomweni wamuteneni nindi “hintwambi, hitata yachu” yowu “wadiñi mbanji kufumisha kutachi,” Satana Diyabolu.—Yowanu 8:44.