Kuhanjeka naMwiniitala Komana Yesu hiNzambi?

AYINSAHU JAYEHOVA atiyaña kuwaha kuhanjeka nsañu yamuBayibolu nawantuñi nawu. Komana kuduhu nsañu yamuBayibolu yimwajinokaña? Komana mwakeñaña kwiluka yuma yakuhwelelawu aYinsahu jaYehova? Neyi mwakeñaña kwiluka, bayi mukashintajala kuhanjeka oyu nsañu ifuku dikwawu dimwakadimona naChinsahuku. Wakatiya kuwaha kuhanjeka nenu iyi nsañu.

Iyi mpanji yinalondeluhu diyi yavula kuhanjekawu aYinsahu jaYehova nawantuñi nawu. Fwikijenu neyi Chinsahu wejina daKatendi nayi kwitala damumbanda wejina daWomba.

Komana Chalala Himwamukuhwelela Yesuku?

Womba: Shikenu mwani.

Katendi: Mwani vude mwani. Ankoleshi mwani.

Womba: Kolenu mwani.

Katendi: Tunakoli mwani. Ijina dami yami Katendi.

Womba: Iyami Womba.

Katendi: Natiyi kuwaha kuyiwana hamukala. Inakushimwina nsañu yayiwahi.

Womba: Chinawahi chimunenzi. Antañishi etu ahoshaña nawu aYinsahu jaYehova hiyamukuhwelela Yesuku. Komana chalala?

Katendi: Nukuyileja chalala nami twamukuhwelela Yesu. Kafwampi twakuhwelela netu hakwila muntu yakaheti wamwinu watela kumukuhwelela Yesu.

Womba: Anetu dichitwakuhwelela.

Katendi: Komana wejima wetu twakuhwelela chuma chimu. Munateli kudihula nenu, ‘Neyi chalala aYinsahu jaYehova amukuhwelela Yesu, muloñadi antu chahoshelañawu nawu hiyamukuhwelelaku?’

Womba: Eñani, inakukeña kwiluka iyi nsañu.

Katendi: Iyi mpanji yakunama, ilaña nikuyihihisha. Twamukuhwelela Yesu chikupu ilaña hitwakuhwelela yuma yejima yahoshañawu antu hadi Yesuku.

Womba: Munateli kunleja chakutalilahu?

Katendi: Eña mwani. Antu amakwawu ahoshaña nawu Yesu wadiña muntu wamuwahi hohu. Ilaña hitwakuhwelela iyi yitoñojokaku.

Womba: Ninami nawa hinayikuhwelelaku.

Katendi: Wejima wetu twakuhwelela chuma chochimu. Chakutalilahu chamuchiyedi chakwila nawu aYinsahu jaYehova hiyeteja ntañishilu yatadikishaña nsañu yahosheli Yesu yomweni kutalisha hawulunda windi naTata yinduku.

Womba: Munatalishi mudihi?

Katendi: Nsakililu yayivulu yatañishaña nawu Yesu hiNzambi. Hadaha ninenu dichayitañishañawu.

Womba: Eña, apasita ahoshaña nawu Nzambi niYesu esekana.

Katendi: Komana munateli kwiteja nenu njila yayiwahi yimwatela kudiza nsañu yalala hadi Yesu hikushinshika yuma yahosheliyi yomweni?

Womba: Eña, nateli kwiteja.

 Yesu Wahosheli Nindidi?

Katendi: Tushinshiki vasi yamuBayibolu yinateli kutukwasha kutiyishisha iyi nsañu. Mwani talenu mazu ekala haYowanu 6:38. Yesu wahosheli nindi: “Ichi chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli.” Awa mazu anateli kutukomwesha neyi chakwila Yesu hiNzambi.

Womba: Munatalishi mudihi?

Katendi: Kafwampi Yesu wahosheli nindi hasulukili mwiwulu kulonda yeli muchima windi yomwenuku.

Womba: Eña, wahosheli nindi wenjili nakwila muchima waYena wamutemesheli.

Katendi: Neyi chakwila Yesu hiNzambi, hinyi wamutemesheli kufuma mwiwulu? Cheñi nawa muloñadi Yesu chovwahililiyi kwila mwaya muchima waYena wamutemesheli?

Womba: Ichi dinu hinukutiyishisha chimunakuhosha. Ilaña nakuhweleli wanyi nami iyi vasi yimu yikumwekesha nawu Yesu hiNzambuku.

Katendi: Shinshikenu chahosheliyi Yesu mpinji yikwawu. Wahosheli nsañu yadifwanaku mukapetulu kanalondeluhu kaYowanu. Munateli kutaña Yowanu 7:16?

Womba: Kukala kwosi. ‘Dichi Yesu hakuyakula nindi, Ntañishilu yami hiyamami awenuku, yambala yayena wantemesheli.’

Katendi: Kusakililaku mwani. Kwesekeja naniyi vasi, komana Yesu watañishileña yuma yahalwindi?

Womba: Inehi, wahosheli nindi yuma yatañishileñayi yadiña yambala yayena Wamutemesheli.

Katendi: Dimu. Chumichi chaleteshaña kwihula cheñi malwihu: ‘Hinyi wamutemesheli Yesu? Nawa hinyi wamudizishili nsañu yalala yatañishileñayi?’ Komana Muntu yeniwu hamubadika Yesuku? Kafwampi muntu watemeshaña mukwawu wabadika muntu atemeshañawu.

Womba: Iyi nsañu yayiwahi. Kanda nitañeñahu dehi iyi vasi.

Katendi: Shinshikenu cheñi mazu aYesu asonekawu haYowanu 14:28: “Munatiyi chinayili nami nukuya kwacheñi, nakenza kudenu. Neyi mwankeña, mutenowu munazañalali nanichi chinukuya kudi Tata, muloña Tata wambadikami.” Kushindamena haniyi vasi, munateli kuhosha nenu Yesu wamumweneña ñahi Tata?

Womba: Wahosheli nindi Tata wamubadika yena. Dikwila nawu wamumweneña Nzambi nindi wamubadika.

Katendi: Dimu. Chakutalilahu chikwawu, shinshikenu Yesu chayilejeliyi atumbanji twindi neyi chasonekawu haMatewu 28:18. Iyi vasi yahosha nawu: “Ñovu jamwiwulu nijahamaseki jejima anajinyinki.” Komana Yesu wahosheli nindi wadiña nañovu jejima mafuku ejima?

Womba: Inehi, wahosheli nindi amwinkeliju.

Katendi: Hanu dinu, neyi Yesu hiNzambi, akumwinka ñahi ñovu jikwawu? Nawa hinyi wamwinkeli iji ñovu?

Womba: Namoni nukutoñojokahu haniyi nsañu.

Wahosheleña Nawanyi?

Katendi: Kudi nsañu yikwawu yatela kutukomwesha neyi chalala Yesu hiNzambi.

Womba: Hinsañwinyi?

Katendi: Hinsañu yahosha hachipapatishu chaYesu. Talenu nsañu yasonekawu haLuka 3:21, 22. Mwani tañenu awa mavasi.

Womba: ‘Chelili namanishi dehi kupapatisha antu ejima to-o, niYesu anamupapatishi dehi, yena Yesu hakulomba, iwulu hidikubaluka; spiritu yajila hiyikuzelumukila hadi yena namujimba wudi neyi katela; mwiwulu himukufuma izu nawu, Yeyi Mwanami nakeña, natiyaña kuwaha nankashi mudeyi.’

Katendi: Munamoni chuma cheliliyi Yesu hampinji yamupapatishileñawu?

Womba: Wadiña nakulomba.

Katendi: Eña. Ilaña tunateli kudihula netu, ‘Neyi Yesu hiNzambi, wadiña nakulomba kudinyi?’

Womba: Hilwihu lwaluwahi. Namoni natela kumwihula pasita.

Katendi: Chuma chikwawu chitwatela kutoñojokahu iche, ilukenu nenu chafuminiyi Yesu mumenji, muntu wahosheli nindi mwiwulu. Munamoni chuma chahosheliyi ona Muntu?

Womba: Wahosheli nindi Yesu wadiña Mwanindi, nindi Wamukeña nawa nindi Wamutiyaña kuwaha nankashi.

 Katendi: Dimu. Ilaña neyi Yesu hiNzambi, hinyi wahosheli awa mazu kufuma mwiwulu?

Womba: Kanda nitoñojokeñahu dehi haniyi nsañu muniyi njila.

Muloñadi Wulunda waNzambi naYesu Chiwekala Neyi ‘waTata Yawantu naMwana’?

Katendi: Chuma chikwawu chitwatela kushinshikahu iche: Tunatañi nawu Yesu wahosheli nindi Nzambi hiTata yindi wamwiwulu. Nawa hampinji yamupapatishiluwu Yesu, izu dakufuma mwiwulu damuteneni Yesu nawu hiMwanindi. Kafwampi Yesu waditeneneña nindi Mwana kaNzambi. Neyi munakukeña kunleja nenu antu ayedi esekana, munateli kuzatisha chakutalilahu chawantu amuchidinyi amuchisaka kulonda ichi chikuma chitiyakani?

Womba: Nateli kuzatisha chakutalilahu chawantu ayedi evumu dimu.

Katendi: Dimu, hadaha mukuzatisha chakutalilahu chawampamba adifwana chikupu. Ilaña Yesu wamuteneneña Nzambi nindi Tata nawa waditeneneña nindi Mwana. Munakutoñojoka nenu Yesu watalishili mudihi?

Womba: Neluki mumunatalishi. Yesu nakutena muntu wumu neyi himukulumpi nawa wukweti ñovu kubadika mukwawu.

Katendi: Dimu. Toñojokenu chumiche: Mwatoñojoka chakutalilahu chatelela chawantu esekana, ampamba hela antu evumu dimu. Neyi chalala Yesu hiNzambi, himunatoñojoki nenu hakwikala Ntañishi Muneni wadi kuzatisha chakutalilahu chochimu chakwesekeja antu hela chakutalilahu chatiyakana chawantu adifwanaku nehi?

Womba: Eña.

Katendi: Ilaña, wazatishili mazu akwila nawu “Tata” ‘niMwana’ hakulumbulula wulunda windi naNzambi.

Womba: Munashimuni chikuma chachiwahi.

Yumanyi Yahosheluwu Atumbanji twaYesu Akusambila?

Katendi: Henohu kanda niyi, inakukeña tuhanjeki nsañu yikwawu yakundama kuniyi nsañu neyi mudi nampinji.

Womba: Eña nikweti kapinji kantesha.

Katendi: Neyi chalala Yesu hiNzambi, komana atumbanji twindi hiyadi kushimuna hatookaku nehi?

Womba: Omu dimu.

Katendi: Ilaña hosi hitwatañaña muNsona atumbanji anakutañisha muniyi njilaku. Kwambukaku, talenu chasonekeliyi kapostolu Pawulu kambanji wumu hadi atumbanji twaYesu akusambila. Hamukanda waAfwilipi 2:9, walumbulula chuma cheliliyi Nzambi chafwiliyi Yesu nichamusañwiluwu nindi: “Dichi Nzambi nawa namutuumbakeshi [Yesu] chakubadika, namwinki ijina dabadika majina ejima.” Kwesekeja naniyi vasi, chumanyi chamwililuwu Yesu kudi Nzambi?

Womba: Yahosha nawu Nzambi wamutuumbakesheli chakubadika.

Katendi: Eña. Neyi chakwila Yesu wadiña wesekana naNzambi henohu kanda yofwi nawa Nzambi wamutuumbakesheli chamusañwiliyi, komana Yesu hadi kumubadika Nzambuku? Hinyi wunateli kumubadika Nzambi?

Womba: Kwosi. Hichikutweshekaku.

Katendi: Dimu. Kwesekeja nawunsahu wejimiwu, komana munateli kuhosha nenu Bayibolu yatañishaña nawu Yesu hiNzambi?

Womba: Chinjila. Bayibolu yahosha nawu Yesu hiMwana kaNzambi.

Katendi: Chalala. Nukuyileja nami aYinsahu jaYehova amulemesha Yesu chikupu. Twakuhwelela netu chafwiliyi neyi Mesiya akaninuwu wenzunwini njila yawamwinu wawantu ejima ashinshika.

Womba: Anami nawa dichuma chinakuhwelela.

Katendi: Munateli kudihula nenu, ‘Indi Yesu nateli kwiluka ñahi nindi twamusakililaña hakuhana wumi windi hanyijimba yetu?’ *

Womba: Natoñojokahu dehi haniyi nsañu.

Katendi: Hadaha nateli kufunta cheñi kulonda tukahanjeki ñakwilu yamuBayibolu. Nateli kuyiwana hamukala mulungu wunakwinza yoyinu mpinji?

Womba: Eña nakekala hohu.

Katendi: Chachiwahi twakadimona.

[Tumazu twaheshina]