Dizenu Nsañu Yidi Mwizu Danzambi

Muloñadi akwaKristu Chayipapatishilañawu?

Ichi chibaaba chinakuhosha hamalwihu imwadihulahu dehi nawa chinakushimuna himwatela kuwana ñakwilu muBayibolu yenu. A Yinsahu jaYehova anateli kuhanjeka nenu hakwakula awa malwihu.

1. Indi chipapatishu chawakwaKristu chalumbulukadi?

Chipapatishu hinjila yakumulombelamu Nzambi kulonda twikali nawulunda wawuwahi nindi. Dichi mukwaKristu watela kupapatishewa bayi neyi hachidiyi nkembaku, ilaña neyi nakuli dehi chakwila nateli kudiza hadi Nzambi nikwikala kambanji kaYesu. (Yililu 8:12; 1 Petulu 3:21) Twekalaña kambanji kaYesu neyi tudiza nikwila yuma yatulejeliyi.—Tañenu Matewu 28:19, 20.

Mumafuku awapostolu aYesu, antu amavulu afuukwiluhu kudiza hadi Nzambi niYesu chakadi kumba mpinji. Chakutalilahu, chelili muntu wumu yeluki nindi kufwa kwaYesu kwenzulwili njila yawamwinu, wekalili kambanji chakadi kumba mpinji. Makonu antu amavulu ashinshika atondahu kwikala atumbanji twaYesu.—Tañenu Yililu 8:26-31, 35-38.

2. Muloñadi Yesu chamupapatishililuwu?

Yesu wadiña nayaaka 30 yakusemuka hampinji yamujimikiluwu kudi Yowanu Mpapatishu Mukaloña Yodana. Chipapatishu chaYesu chamwekesheli nawu wafuukwiluhu kwila muchima waNzambi. (Aheberu 10:7) Chumichi chakeñekeleña nikuhana wumi windi neyi mulambu hanshidi yawantu. Henohu kanda yenzi nakushakama hamaseki, Yesu wadiña wamukeña Tata yindi Yehova nawa wadiña nakumwovwahila mpinji yejima.—Tañenu Maku 1:9-11; Yowanu 8:29; 17:5.

  3. Muloñadi mukwaKristu chatela kupapatishewelayi?

Twekala ambukaku naYesu, etu twavwalika akwanshidi. Hela chochu, mulambu wakufwa kwaYesu waleñela twikali nawulunda wawuwahi naNzambi. (Aroma 5:10, 12; 12:1, 2) Kafwampi chaswayi kwikala antu jindi neyi antu amuchisaka chindi. (2 Akorinda 6:18) Twekalaña ñahi naniku kukooleka? Twadihanaña kudi Yehova mukulomba, nakukana kwila mwaya muchima windi muchihandilu chetu chejima. Hanyima yakudihana muniyi njila, twamwekeshaña hatooka nawu tunadihani kuhitila mukupapatishewa.—Tañenu Matewu 16:24; 1 Petulu 4:2.

4. Munateli kudiloñesha ñahi hakwila mupapatishewi?

A Yinsahu jaYehova adizaña Bayibolu nawantu ejima akeñaña kukundama kwakwihi naNzambi. Kudiza Bayibolu nikuya kukupompa kwawakwaKristu kukukolesha chikuhwelelu chenu mudi Nzambi nawa mukumukeña chikupu. Kukuyikwasha cheñi kwikala nayililu yayiwahi. Neyi mwikala nakukeña, chikuhwelelu niyililu yikwawu yamuzañaleshaña Nzambi chikuyikwasha kutwalekuhu kumukalakela Yehova haya nyaka neyi chimwamukanini.—Tañenu Yowanu 17:3; Aheberu 10:24, 25.

Neyi munakukeña nsañu yikwawu, talenu kapetulu 18 kaniwu mukanda, Chumanyi Chacheni Chatañishaña Bayibolu? wasonekawu kudi aYinsahu jaYehova.