Imbujolenu Chikuhwelelu Chawu

Wakiñili niKukwasha Chisaka Chindi Nawa Womikili

YOSEFU hakukasa chiteli chikwawu hachimbulu. Fwikijenu nakutala mumukala waBetelemi mudi mwidima iku nakukasa yiteli hakanyama kanyanya kakusendela yiteli. Chakadi nikujina watoñojokeleña halwendu lwalulehi lukwendawu. KuEjipitu kunakuyawu, antu hiyayilukaku, ahoshaña idimi dacheñi nawa akweti tushindikilu twacheñi, indi chisaka chindi chanyanya chikutwesha kuhanda ñahi?

Chamukalilili kulejamu ñodindi Mariya wakeñayi nsañu yatama, ilaña Yosefu washilumu katwa nawa wamulejeli. Wamulejeli chaloteliyi anakumuleja kudi kañelu awa mazu afumini kudi Nzambi: Mwanta Herodi wakeñeleña kujaha mwanawu wanyanya. Ateleli kunyamuka chakubula kumba mpinji. (Matewu 2:13, 14) Mariya wakameneni chikupu. Indi muntu wukujahiladi mwanindi wakadi muloña? Mariya niYosefu elukili wanyi muloña wakeñeluwu kujaha mwanawu. Ilaña amukuhweleleli Yehova nawa adiloñesheli.

Chelili antu amuBetelemi akupukili mutulu, chakadi nikwiluka yuma yamwekeneña, Yosefu, Mariya niYesu awombolokeli mumukala nawufuku. Ayilili kukabeta kambwela nawa chejeji chatachikili kutoñeka kumusela, chakadi nikujina Yosefu watoñojokeleña yuma yikumwekana kumbidi. Indi iwu mukwakusoña wakehelamu wukukiña ñahi chisaka chindi kudi antu asweja ñovu? Komana wukutwesha kukwasha chisaka chindi mpinji yejima? Komana wukutwesha kuumika hakuzata mudimu wakola wamwinkeluwu kudi Yehova Nzambi wakwakamena nikukulisha iwu mwana wadimena? Yosefu wamweni kukala kwakuvulu. Chitukushinshika chazatiliyi nakukala kwejima kwamweniyi, tukwiluka muloña watelela atata jawantu makonu niwejima wetu kwimbujola chikuhwelelu chaYosefu.

Yosefu Wakiñili Chisaka Chindi

Mwahitili hohu tukweji twantesha kufuma hampinji yahimpikili chihandilu chaYosefu haya nyaka mumukala wawu waNazareta choteliyi mwana kaHeli. Yosefu welukili chikupu nindi Mariya wadiña mumbanda washinshika hama. Ilaña watiyili nawu nemiti. Wafwilileña kumuseña mukujinda kuchina kumutiyisha nsonyi nawu welili wujila. * Hela chochu, kañelu wahosheli nindi muchilota nakumulumbulwila nindi spiritu yajila yaYehova diyaleñeleli Mariya yemiti. Kañelu wahosheli cheñi nindi mwana wakavwalayi ‘wakaamwina antu indi kunshidi jawu.’ Wamulejeli Yosefu cheñi nindi: “Bayi wutiya woma wakutambula iñodeyi Mariyaku.”—Matewu 1:18-21.

Yosefu muntu washinshika nawa wovwahila, wamusendeli iñodindi. Wetejeli mudimu walema chikupu: wakulela nikuhemba mwana wabulili kwikala windi ilaña wadiña walema nankashi kudi Nzambi. Chimwahitili tukweji, hamuloña wakwovwahila lushimbi lwalema, Yosefu wamutwalili iñodindi walema hamujimba kuBetelemi nakusonekesha. Mwana wavwalikilili kuBetelemi.

Yosefu hatwalili cheñi chisaka chindi kuNazaretaku. Ilaña ashakamini muBetelemi hekala jikilomita jantesha hohu nakushika muYerusalema. Adiña atuzweñi, ilaña Yosefu wazatileña nañovu  kulonda yayikwashi aMariya naYesu muyuma yakeñekeleña. Chimwahitili mafuku antesha atachikili kushakama mwitala danyanya. Cheñi nawa, haniyi mpinji Yesu hadiña nkembaku hadaha wabadikili chaaka chimu, chihandilu chawu chahimpikili cheñi.

Izanvu dawamayala akwakuhoña natutumbwa denjili kufuma Kumusela, hadaha afumini kwiluña dadilehi kuBabiloni. Katumbwa kayitwamininini kwitala daYosefu naMariya nawa akeñeleña mwana wukekala mwanta wawaYudeya. Awa amayala adiña nakalemesha chikupu.

Chili elukili chili hiyelukiluku, akwakuhoña natutumbwa amushili Yesu muwubanji weneni. Katumbwa kamwenuwu kasambilili kuyitwaminina kuYerusalema, bayi kuBetelemuku. Amulejeli Mwanta Herodi watama nawu akeñeleña mwana wukekala mwanta wawaYudeya. Chumichi chamuleñeleleli Herodi kulendumuka nandulu niichima.—Talenu chibaaba chinakwila nawu “Malwihu Ehulañawu Antañi . . . Hinyi Watemesheli ‘Katumbwa’?” hefu 29.

Hela chochu, kwadiña ñovu yabadika yaHerodi. Munjilanyi? Enyi aleteli yawaana, nawa kwosi yuma yalombeluwu. A Yosefu niMariya ahayamini chikupu hakuwana neyi anaheti dehi “wuru nilibona nimora,” yuma yalema wuseya. Akwakuhoña natutumbwa akeñeleña kumuleja Mwanta Herodi kwawaninuwu mwana iyakeñeleñawu. Hela chochu, Yehova wayikaanishili. Akwakuhoña natutumbwa ayilejeli muchilota kufunta kwituña dawu kuzatisha njila yacheñi.—Matewu 2:1-12.

Chimwahitili hohu kapinji kantesha kufuma hampinji yayiluwu akwakuhoña natutumbwa, Yosefu amulejeli kudi kañelu kaYehova nindi: “Nyamukaku wutwali iwu mwana wanyanya nimama yindi, wutemukili kuEjipitu, wakashakami kwenoku, kufumaku chiña nakuleji; muloña Herodi wakakeñakeña iwu mwana wanyanya nindi amukisañani.” (Matewu 2:13) Neyi chitwataña hakusambila, Yosefu wovwahilili chakubula kukwata kumatahu. Walemesheli wumi wamwanindi kubadika yuma yejima, dichi watwalili chisaka chindi kuEjipitu. Muloña wakwila ana asenji akwakuhoña natutumbwa ayinkeli yawaana yalema wuseya, adiña nayuma yatelela kudikwasha nachu kwiluña kwayiluwu nakushakama chantesha.

Nyikanda Yakutwamba yashimuna twanu nakulebumuna lwendu lwakuya kuEjipitu, nakuhosha nawu mwana wanyanya Yesu wehihishili lwendu muchihayamisha, kukañesha ambanji nikuzembamisha nyitondu yanyikoma kulonda mama yindi yakumuneña nyikambu. * Kuhosha hohu chalala, endeli lwendu lwalulehi kwiluña dabula kwilukawu.

Anvwali anateli kudizila yuma yayivulu kudi  Yosefu. Washili mudimu windi nawa wadihanini kushiya itala dindi kulonda yakiñi chisaka chindi. Mwamweni, wamweneña chisaka chindi nindi hichuma chalema chamwinkayi Yehova. Makonu anvwali anakulelela anyanawu mukanu kaayi katama, munasweji yuma yatama yinateli kukisañana, kuhuñumuna hela kusha anyanawu muwubanji. Twahamekaña amama jawantu niatata jawantu ekala neyi Yosefu, azataña nañovu kulonda akiñi anyanawu kuyuma yamuchidiwu.

Yosefu Wakwashili Chisaka Chindi

Chamwekana neyi chisaka hichashakamini mafuku amavulu muEjipituku, muloña haleheli wanyi kañelu wamulejeli Yosefu nindi Herodi nafwi dehi. Yosefu wafuntili nachisaka chindi kwituña dawu. Wuprofwetu wakushankulu washimwineñahu dehi nawu Yehova wakatambika mwanindi “kuEjipitu.” (Matewu 2:15) Yosefu welili mwenimu kulonda iwu wuprofwetu wushikijewi, hanu denu wukutwala chikasa chindi kudihi?

Yosefu wadiña wababala. Wamuchinini nswana yaHerodi Akelawusi wadiña watama muchima nawa mbanji. Nzambi wamulombweli Yosefu nakutwala chisaka chindi kukabeta kaluwunda kumukala wawu waNazareta muÑaliliya kwakulehi naYerusalema nikudi antu ejima akasili tufuta. Kweniku dikwahambeleliyi chisaka chindi naMariya.—Matewu 2:19-23.

Chihandilu chawu chadiña chapela nawa chakala. Bayibolu yamutenaña Yosefu nawu mukwakusoña, kuzatisha izu desekana nanyidimu yayivulu yakuzatisha mbawu, chindi neyi kutema nyitondu, kuyisenda, nikuyipula kulonda ayizatisheña hakutuña matala, matu, yawu yanyanya, matemba, tufumbu, mpanda niyozelu yashiyashana yazatishileñawu andimi. (Matewu 13:55) Wadiña mudimu wakola. Mukwakusoña wakushankulu wadiña nakuzatila kwakwihi netala dindi hela kaditala kakusoñela kadikumashana netala.

Yosefu wazatishileña yozelu yashiyashana, hadaha yikwawu amushililili kudi tata yindi. Watela wazatishileña sikweya, mwonji wakuzezumuna wakwolola nachu, nsonekeshu, kazemba, kakandu, sandu, kapomposhi, chezulu, mbumbu, wupombu washiyashana ninyisumali, hela chakwila yadiña yasweja wuseya.

Fwikijenu Yesu wuchidi kansi wanyanya nakumutala tata yindi wamuleleli nakuzata. Wadiña nakushinshika chazatileñayi Yosefu, chakadi kujina wakomokeli chazatileñayi nañovu, wukalawenu nimaanindi. Hadaha Yosefu watachikili kumudizisha mwanindi wanyanya chakuzata nyidimu yapela yidi neyi kulambwija mbawu nekowa danshi yoma. Hamwaha wamudizishili Yesu chaambu chekala hambawu yashiyashana yazatishileñayi, chakutalilahu nyishikima, mukula ninyiolive.

Yesu welukili nindi ana makasa akola atemeneña nyitondu, kuketula nyalachi, nikupompa mwakunuñila mbawu adiña cheñi makasa amwovu adiña nakumuhemesha nikumukundeja yena, mama yindi nianyiki jindi. Eña, Yosefu naMariya adiña nachisaka cheneni mwekalili cheñi anyana amakwawu atanu nawumu kushilahu niYesu. (Matewu 13:55, 56) Yosefu wazatileña nañovu chikupu kulonda yayakameneña wejima wawu.

 Hela chochu, Yosefu welukili nindi kwakamena chisaka chindi kuspiritu dichuma chasweja kulema. Dichi wayidizishileña anyanindi nsañu yaYehova Nzambi ninshimbi Jindi. Yena niMariya atwalileña anyanawu kusinagogi yamwiluña dawu mafuku ejima kwadiña nakutañawu Nshimbi nikujilumbulula. Hadaha Yesu wehwileña malwihu amavulu hanyima yakufuma kusinagogi nawa Yosefu wazatileña nañovu kulonda mpwila yamwanindi yakuspiritu yimani. Yosefu watwalileña cheñi chisaka chindi kuyawija yakudifukula muYerusalema. Hakwila nawu ayi kuPaseka yahachaaka hachaaka, Yosefu nichisaka chindi akeñekeleña nyilungu yiyedi hakwila endi lwendu lwajikilomita 112.65, nakwanakana chawija nikufunta kumukala wawu.

Makonu nyitu yayisaka yawakwaKristu yelaña chuma chadifwanaku. Azataña nañovu kulonda akwashi anyanawu, alemesha kuyidizisha yuma yakuspiritu kubadika yuma yikwawu kushilahu niyuma yakumujimba. Azataña nañovu hakwila nawu atwali anyanawu kukupompa kwamaneni nikwanyanya. Kufwana Yosefu, eluka nawu kwosi maheta abadika atela kwinkawu anyanawu.

“Nawushona”

Yesu chadiñayi nayaaka 12 yakusemuka, Yosefu watwalili chisaka chindi kuYerusalema neyi chelileñayi dikalu. Yadiña mpinji yachawija chaPaseka, nawa yisaka yayivulu yendeleleña hamu mutujila twatulolu. Elileña neyi hiyakushika heluña desekana kwakwihi naYerusalema yamwekeneneña hamukandu, antu amavulu embileña masamu aya mpuhu akukandama nachu. (Masamu 120-134) Mumusumba mwatela mwapompeleña antu amavulu nankashi. Hanyima yachawija yisaka yafuntileña cheñi kunyikala yawu. Chineli aYosefu naMariya adiña nayuma yayivulu yakwila atoñojokeli nawu Yesu wudi muchendu, hadaha nawantaña jawu. Elukili nawu Yesu nashali chendeluwu lwendu lwefuku dimu kufuma kuYerusalema.—Luka 2:41-44.

Chakubula nikumba mpinji, afuntili cheñi kuYerusalema nakumukeñakeña Yesu kwejima kwahitiluwu. Fwikijenu chatiyiluwu mumusumba wamwekeneña neyi wawenyi hampinji yahitileñawu munyikwakwa iku anakumutambika Yesu hejina. Indi mwana wadiña kudihi? Chamukeñakeñeluwu hefuku damuchisatu, komana  Yosefu watachikili kujinoka neyi chakwila nakañanyi kuzata mudimu wajila wamwinkeluwu kudi Yehova? Nkumininaku, ayili kutembeli. Akeñakeñeli mutembeli nichashikiluwu mukapeka mwapompeleli amayala amavulu adiza, elukili Nshimbi chikupu, nimwana Yesu wadiña washakama mukachi kawu. Fwikijenu Yosefu naMariya chazañaleluwu!—Luka 2:45, 46.

Yesu watiyilileña kudi amayala adiza nikuyihula malwihu chikupu. Ana amayala ahayamini kashinshi kamwana nichakwileñayi. Hela chochu, Mariya niYosefu niwena ahayamini. Kwesekeja nansona, Yosefu wahosheluhu wanyi. Ilaña mazu aMariya alumbulula chiwahi chahosheluwu wejima wawu: “Mwanami wunatukoñelidi mwenimu? Nitata yeyi ninami tunakukeñakeñi nawushona.”—Luka 2:47, 48.

Dichi mumazu antesha hohu Izu daNzambi dashimuna hatooka yuma yamonañawu anvwali. Himudimu wakala hela chakwila mwana wawanina. Kulela anyana mukanu kaayi katama, kunateli kuleta “wushona” ilaña anvwali anateli kukundejewa hakwiluka nawu kukala kunakumonawu akusoneka muBayibolu.

Kafwampi, Yesu washakamini heluña dimu damweniyi nindi nateli kukundama kudi Tata yindi wamwiwulu, nakushinshika chikupu yuma yejima yateleleliyi kudizayi. Dichi wayakwili anvwali jindi munjila yayiwahi nindi: “Mwankeñelañadi? Munabulilidi kwiluka nenu ami chiña niikalaña mwitala daTata yami?”—Luka 2:49.

Chakadi nikujina Yosefu watoñojokeli hanawa mazu kapampa kakavulu. Hadaha watiyili kuwaha nankashi hanawa mazu. Kafwampi, wazatili nañovu hakudizisha mwanindi wakuwanamu kulonda yatiyeña muniyi njila kutalisha hadi Yehova Nzambi. Hachidiñayi kansi Yesu wadiña nakutiya kuwaha izu dakwila nawu “tata,” nawa wadizili chumichi nankashi hampinji yadikundileñayi naYosefu.

Neyi mwekala atata jawantu, komana mweluka kukoleka kumukweti kwakukwasha anyanenu kulonda eluki chekala tata yawantu wukweti kukeña nawa wakamenaña? Chochimu, neyi mukweti anyana akuwanamu anukenuña chakutalilahu chaYosefu nawa yimonenuña anyana ejima nenu adimena nawa alema. Yikwashenu akundami kwakwihi naTata yawu wamwiwulu, Yehova Nzambi.

Yosefu Womikili naKashinshi

Bayibolu yashimuna hohu nsañu yantesha kutalisha hachihandilu chaYosefu, ilaña nsañu yeniyi yalema nankashi kuyitaña. Twatañaña nawu Yesu “hakuyovwahilaña” anvwali jindi. Twatañaña cheñi nawu, “Yesu hakukula nikumaana nikuchiminu, amumona nikuwaha nikudi Nzambi nikudi antu.” (Luka 2:51, 52) Indi awa mazu ashimunañadi hadi Yosefu? Ashimunaña  yuma yayivulu. Twadizaña nawu Yosefu watwalekeluhu kulombola chikasa chindi, muloña mwanindi wawanina walemesheli wuswa watata yindi nawa wovwahilileña yuma yejima.

Twadizaña cheñi nawu Yesu watwalekeluhu kukula mumaana. Eñañi, Yosefu wadiña namudimu weneni wakukulisha mwanindi munjila yamuchidiwu. Munana mafuku aYudeya adiña nachishimu chalemesheluwu. Antu amavulu eluka nawu antu ahemaña diwu atela kwikala namaana, ilaña mukwakulandisha nakulandulula chidi neyi akwakusoña, andimi, akwakuzakasa, “hiyanateli kuhosha yuma yawuñaji nikusompeshaku nawa hiyatela kwikala kwahoshelañawu yishimuku.” Nkumininaku, Yesu washimwini hatooka nindi chishimu chenichi chamukunkulwayi. Hachidiñayi kansi watiyileña tata yindi wamuleleli chatañishileñayi chachiwahi kapampa kakavulu kutalisha “hawuñanji niwunsompeshi” waYehova hela chakwila wadiña mukwakusoña wadizoza. Chakadi nikujina Yosefu welileña mwenimu kapampa kakavulu.

Tukweti cheñi wunsahu wamwekeshaña nawu Yosefu wazatili nañovu hakwila Yesu yakuli chiwahi kumujimba. Yesu wadiña wakola nawa hadiña nakukatakataku muloña amwakameneneña chiwahi kuwansi. Kubombelahu, Yosefu wamudizishili mwanindi kwiluka chikupu mudimu windi wakumujimba. Yesu hiyamwilukili hohu nawu mwana kamukwakusoñaku ilaña amwilukili cheñi nawu “mukwakusoña.” (Maku 6:3) Komana Yosefu wamudizishili mwana chiwahi. Nyitu yayisaka yatela kumwimbujola Yosefu, nakukwasha anyanawu nikwiluka chikupu nawu anateli kudihemba aweni.

Chitwatañaña nsañu yamuBayibolu nakushika hampinji yamupapatishiluwu Yesu henohu wudi nayaaka 30 yakuvwalika, Yosefu amutena wanyi muniyi nsañu. Wunsahu wamwekeshaña nawu Mariya wadiña ntuluwa hampinji yatachikiliyi Yesu mudimu windi wakushimwina. (Talenu chikasha chinakwila nawu, “Indi Yosefu Wafwili Mwakanyi?” hefu 27.) Hela chochu, Yosefu wemikili chakutalilahu chachiwahi nankashi hakwikala tata yawantu wakiñili nikukwasha chisaka chindi nawa womikili nakashinshi kushika nikunsa. Tata yawantu wudi wejima, mutu wachisaka hela mukwaKristu wudi wejima watela kwimbujola chikuhwelelu chaYosefu.

[Tumazu twaheshina]

[Chikasha chidi hefu 27]

Indi Yosefu Wafwili Mwakanyi?

Tweluka netu Yosefu wachidiñi wamumi hampinji yadiñiyi Yesu nayaaka 12 yakuvwalika. Hayaaka yeniyi atwansi amavulu amuYudeya atachikileña kudiza nyidimu yazatileñawu atata jawu nakwikala atudizi nayaaka 15 yakuvwalika. Chakadi nikujina Yosefu wahandili yaaka yayivulu hakwila yamudizishi Yesu kwikala mukwakusoña. Komana Yosefu wadiñi wamumi hampinji yatachikiliyi Yesu mudimu windi wakushimwina henohu wudi nayaaka 30 yakuvwalika? Hitweluka chikupuku. Mama yaYesu, ana kwindi niahelindi ejima ayishimuna nawu adiña kwoku ilaña Yosefu hiyamushimunaku. Kafwampi mpinji yimu Yesu amuteneni nawu “mwana kaMariya” bayi mwana kaYosefuku. (Maku 6:3) Mariya amushimuna nawu wadiña nakuzata nikufuukulahu nkawindi chakubula kwihula nfumwindi. (Yowanu 2:1-5) Chumichi chadiña chishimashima mpinji yakunyima chiña neyi mumbanda hintuluwa. Nkumininaku hampinji yafwileñayi Yesu wamwinkeli kapostolu Yowanu mudimu wakuhemba mama yindi. (Yowanu 19:26, 27) Neyi Yosefu wadiña wamumi chiña hadi kwila mwenimuku. Tunateli kukunkulula netu, Yosefu wafwili hampinji yadiñiyi Yesu mukwenzi. Chineli Yesu wadiña wakulaku dehi, chakadi nikujina diyi watwalekeluhu namudimu wakusoña nikwakamena chisaka kushika nimpinji yamupapatishiluwu.

[Mwevulu wudi hefu 24]

Yosefu wazatili nakashinshi nikudihana kulonda yakiñi mwanindi

[Mwevulu wudi hefu 25]

Yosefu wazatili nañovu kulonda yakwashi chisaka chindi

[Mwevulu wudi hefu 26]

Yosefu watwalileña chisaka chindi mpinji yejima nakudifukula kuYerusalema

[Mwevulu wudi hefu 28]

Yosefu wamudizishili mwanindi kwikala mukwakusoña