Antu Ahoshaña Nawu Amagedoni Hichumanyi?

“Hiyakuyipompeshela kumu kwanatenuwu muHeberu nawu Amagedoni.”—CHIMWEKESHU 16:16.

CHUMANYI chimwatoñojokaña neyi mutiya izu dakwila nawu “Amagedoni”? Hadaha mwatoñojokaña hawubanji weneni. Hela chakwila idi izu damwekanaña hohu kamu muBayibolu, aditenaña kapampa kakavulu kudi akwayikunzulemba niakulumpi jansakililu.

Komana yitoñojoka yekala nawantu haAmagedoni yesekana nayuma yatañishaña Bayibolu? Chalema kwiluka ñakwilu. Muloñadi? Neyi mwiluka nsañu yalala kutalisha haAmagedoni himukutiyaña womaku, mukwikala nakuchiñeja kwakuwahi kwakumbidi nawa mukumwiluka Nzambi munjila yayiwahi.

Shinshikenu hamalwihu asatu analondeluhu, nawa yesekejenu nayuma yavula kutoñojokawu antu haAmagedoni nachuma chacheni chatañishaña Bayibolu.

  1. KOMANA AMAGEDONI HIWUBANJI WAKOJEJAÑAWU ANTU?

Akwakushimuna nsañu niakwakusandujola kakavulu azatishaña izu ‘daAmagedoni’ hakulumbulula wubanji wakojejañawu antu. Chakutalilahu, Njita yaKaayi Kejima Yatachi niYamuchiyedi ayitenaña nawu Amagedoni. Chamanini iji njita antu adiña nakwakamena nawu aUnited States naSoviet Union akudasa nyitendanzumbu yañovu nankashi. Akwayikunzulemba ateneneña ndombu yeniyi nawu “Amagedoni yanyitendanzumbu.” Makonu, akwakusandujola achiinaña nawu kutamisha mpepela kunateli kuhimpa chikupu mpepela yahamaseki nawa ababeshaña antu nawu kukenza “Amagedoni yakahimpa mpepela.”

Mwatalisha mazu ahoshañawu: Antu akweti wuswa wakuyuula yuma yikamwekana kumbidi hamaseki niyuma yejima yikweti wumi. Neyi nfulumendi yikañanya kuzata chiwahi, iseki dakakisika haya nyaka.

Chatañishaña Bayibolu: Nzambi hamba keteja antu kukisañana isekuku. Bayibolu yatulejaña nawu Yehova * hawumbili iseki kwikala ‘damukunkulwayuku.’ Ilaña wadiwumbili nindi “mushakami antu.” (Isaya 45:18) Chatela yeteji antu kukisañana iseki, Nzambi ‘wukajilumuna akisañanaña iseki.’—Chimwekeshu 11:18.

2. KOMANA AMAGEDONI HIWUBANJI WADIMWIKENAÑA WAWENI?

Akwakushimuna nsañu mpinji yikwawu azatishaña izu ‘daAmagedoni’ hakutena wubanji weneni wadimwekenaña waweneni. Chakutalilahu, mu 2010, chileji chimu chahosheli nawu “kuHaiti kwadiña Amagedoni.” China chileji chadiña nakulumbulula hamakabi amwenuwu antu, yuma yakisikili niantu afwili hamuloña wamutentanshi weneni waholokeli mudina ituña. Akwakushimuna nsañu niakwakutuña jifwilimu azatishaña idi izu bayi neyi kuyuma yamwekeni dehi hohuku ilaña niyuma yatiyañawu woma nawa yikamwekana. Chakutalilahu, azatishaña izu ‘daAmagedoni’ hakulumbulula yuma yafwikijañawu nawu yikamwekana neyi pulaneti yatenañawu nawu asteroid yinahumi iseki.

Mwatalisha mazu ahoshañawu: Amagedoni hiwubanji wamwekanaña kwejima nawa wakisañanaña antu chakadi kutonda. Kwosi chuma chatela kwilayi muntu hakwila yadikiñi.

Chatañishaña Bayibolu: Bayi neyi Amagedoni hiwubanji wajahaña antu chakadi kutondaku. Ilaña hampinji yaAmagedoni antu atama hohu diwu akakisañanawu. Bayibolu yashiika nawu katataka “muntu watama hakekala nawa mwokuku; mwalala wakakeñakeña hindi hadiñilañayi, hihakamwekanaku.”—Masamu 37:10.

3. KOMANA NZAMBI WAMBA KAJILUMUNA ISEKI HAAMAGEDONI?

Antu amavulu etiya akuhwelela nawu antu atama niantu amawahi akalwa kakukumishaku nawa chumichi chikaleñela kukuma kwadinu iseki. Antu ehujoleluwu kuUnited States kudi mutayi waPrinceton Survey Research Associates wawanini nawu mapesenti 40 awakulumpi akuhwelela nawu kaayi kakakuma “nanjita yaAmagedoni.”

Mwatalisha ntañishilu yawu: Antu hiyayileñeli nawu akashakami hamaseki haya nyakaku,  nawa iseki hiyadiwumbili nawu dikashakami haya nyakaku. Nzambi waleñeli antu nankeñelu yakwila nindi akafwi wejima wawu hampinji yimu.

Chatañishaña Bayibolu: Bayibolu yashimuna hatooka to-o nawu Nzambi “wahatishili iseki hamashina adu, kulonda dibuli kuswila chahaya nyaka.” (Masamu 104:5) Kutalisha hadi antu akashakama heseki, Bayibolu yahosha nawu: “Akwakuloña akaswana ituña, akashakamamu haya nyaka.”—Masamu 37:29.

Mwamweni, Bayibolu hiyaditeja nayitoñojoka yawantu kutalisha haAmagedonuku. Hanu dinu, nsañwinyi yalala yahosha haAmagedoni?

[Tumazu twaheshina]