Indi Njita Yaamagedoni Yikenza Mpinjinyi?

‘Hinukumona izaza deneni dakadi kutwesha kudichinda kudi muntu, dawantu akunyuza yejima, akunyichidi yejima, akumatuña ejima, akumadimi ejima . . . dinafumi kuyihuñu oyu yeneni.’—CHIMWEKESHU 7:9, 14.

NJITA yaAmagedoni keña yinzi. Munjilanyi?

Kudi izanvu dawantu mukaayi kejima dinakumukalakela Yehova nawa dovwahilaña nshimbi jaloña jamuBayibolu. Kuhitila muwukwashu waNzambi, antu amavulu akufuma kunyunza yejima, kunyichidi yejima, nikumadimi ejima anakupompela hamu nakwikala amana kwetu akeñañana. Awa amana kwetu hiyaYinsahu jaYehova.—Yowanu 13:35.

Satana keña yapompeshi amashidika indi nakutachika kulukuka awa antu awunda nawa amwekanaña neyi adana muntu wakuyamwina. (Ezekeli 38:8-12; Chimwekeshu 16:13, 14, 16) Munateli kwiluka ñahi nenu chumichi chikamwekana? Bayibolu yashimuna yuma yadimena yatukwashaña kwiluka mpinji yikenza njita yaAmagedoni. Yuma yayivulu yashimunawu muBayibolu yinakushikijewa.

Yuma Yinakushikijewa

Atumbanji twaYesu amwihwili chakelukawu antu nawu ‘kukuma kwanyaka yamakonu’ kunaswili dehi kwakwihi. (Matewu 24:3) Yesu wayakwili kuhitila mukuyileja yuma yikamwekana nindi ‘munza wumu wakanyamuka nakulwa namunza wukwawu, wanta wumu nawanta wukwawu. Kwamba kaholoka nzala ninyitentanshi kweñi nakweñi.’ Wabombeleluhu cheñi nindi: “Ilaña yuma yejimiyi diyi yihuñu yakutachika.” (Matewu 24:7, 8) Kapostolu Pawulu walumbulwili awa mafuku nindi ‘himafuku akukuminina,’ nawa nindi mafuku wenawa akekala “nyaka yakala.” (2 Timotewu 3:1) Komana munakutoñojoka nenu iwu wuprofwetu wahosha hayuma yinakumwekana makonu?

Muloñadi awa mafuku chiyanekaliluwu akala? Kapostolu Yowanu walumbulula chuma  chaleñela ekali akala. Washimwineñahu dehi nindi Satana niandemoni jindi ayinka ‘mpinji yantesha hohu’ yakukalakala nyidimu yawu hamaseki. Satana amushimuna nawu wukweti “ndombu yayeni” haniyi mpinji. (Chimwekeshu 12:7-12) Komana munakumona nenu makonu antu akweti ndulu nimadombu, bayi neyi mwiluña dimu hohuku ilaña mukaayi kejima?

Yesu wahosheli cheñi nindi hampinji yeniyi yakala nankashi, mudimu walema wakazatewaña. Wahosheli nindi: ‘Nsañu iyi yayiwahi yawanta [waNzambi] akayishimwañena mwahita matuña ejima mwashakamawu antu, kulonda yakayilili nyunza yejima wunsahu; henohu dihu hakenza kukumisha.’ (Matewu 24:14) Makonu, aYinsahu jaYehova anakushimwina nsañu yayiwahi yaWanta waNzambi mumatuña akubadika ha 235 nawa anakuyishimwina mumadimi akubadika ha 500. Magazini aKaposhi Kakutalila niAwake! ashindamena haBayibolu asonekañawu kudi aYinsahu dimagazini abadika kuvula hadi nyikanda yejima yahanañawu mukaayi kejima. A Yinsahu abalumuna cheñi Bayibolu mumadimi akushika kwakwihi na 100. Mudimu wawu awukalakalaña kudi akwakuzata mukudikeñela nawa azatishaña yawaana yahanañawu mukudikeñela. Komana aka kampeni kadimena kakushimwina kanakushikija wuprofwetu waYesu?

Bayibolu yashimuna cheñi yuma yikazatikaña hakwila nawu njita yaYehova Nzambi niantu adikañaña nayena yakatachiki. Shinshikenu iwu wuprofwetu wusatu wudi kwakwihi nakushikijewa.

Yuma Yikukeña Kumwekana Katataka

Wuprofwetu 1. Bayibolu yahosha nawu nyunza yakabidika mbila yadimena nawu “kwamwena, kwazo-o.” Anateli kutoñojoka nawu keña amanishi kukala kwamaneni. Ilaña, yuma yikalondelahu haniyi mbila hiyikaleta kuwundaku.—1 Atesalonika 5:1-3.

Wuprofwetu 2. Kuhiñahu nfulumendi jashiyashana jikazuñesha nsakililu yamukaayi. Kwesekeja naBayibolu iji nfulumendi jemenañaku kanyama, nawa nsakililu yakutwamba yamukaayi yemenañaku mumbanda wendelaña hanyima yakanyama. (Chimwekeshu 17:3, 15-18) Iwu kanyama wachifwikija wakakoña chuma chakeñañayi Nzambi kuhitila mukujilumuna nsakililu yatwambaña kumwimenaku Nzambi.

Kapostolu Yowanu wamulumbulwili iwu kanyama wachifwikija ñane: ‘Nseñu ikumi jiwamona, ninaka kanyama, akamuhela chivumbi, akamubalumuna kwikala chihembi hohu, akamuleka nzekesi, akadya mujimba windi, akamushita nakesi shati. Muloña Nzambi nashi munyichima yawu jakwila mwafuukulayi.’—Chimwekeshu 17:16, 17.

Wuprofwetu 3. Chakakumishayi kulukuka nsakililu yakutwamba, Satana wakapompesha nyunza kulonda yakalukuki antu adifukulaña kudi Yehova Nzambi.—Chimwekeshu 7:14; Matewu 24:21.

Chumanyi Chimwatela Kwila?

Chinateli kuyikalila kukuhwelela nenu yuma yinalumbululuwu hewulu yikamwekana neyi kanda mudizeñahu dehi Bayibolu nakanañachima. Kudi yuma yayiwahi yikuyileñela kukuhwelela nenu yuma yejimiyi yikashikijewa nawa keña yimwekani. Wuprofwetu wamuBayibolu wakunyaka washikijeweli dehi wamwekeshaña nawu iyi yuma yikamwekana. *

Komana kwila mwikala nampinji yakukeña kwiluka aYinsahu jaYehova chakuhwelelawu nawu “njita yefuku odu deneni daNzambi Watwesha Yejima” yidi kwakwihi nimuloña wumwatela kubula kuchiina njita yeniyi nehi? Yilejenu kulonda muhanjeki nawu chahosha Bayibolu kutalisha hayuma yimwatela kwila hakwila nawu mwikali hakachi kawantu akiñañayi Yehova Nzambi. (Chimwekeshu 16:14) Yuma yimukudiza yikuyileñela muhimpi yitoñojokaña yenu kutalisha hayuma yakumbidi.

[Tumazu twaheshina]

[Mazu ekoku adi hefu 8]

Komana mudimu wawaYinsahu jaYehova wunakushikija wuprofwetu wamuBayibolu?