Dizenu Nsañu Yidi Mwizu Danzambi

Komana Bayibolu Yashimunañahu Dehi Yuma Yikamwekana Kumbidi?

Ichi chibaaba chinakuhosha hamalwihu imwadihulahu dehi nawa chinakushimuna himwatela kuwana ñakwilu muBayibolu yenu. A Yinsahu jaYehova anateli kuhanjeka nenu hakwakula awa malwihu.

1. Komana wuprofwetu waBayibolu washimuna jiika?

Nzambi Wabadika ñovu diyi hohu watela kwiluka chadimu yuma yakumbidi. (Amosa 3:7) Chakutalilahu, kushankulu kwakweni, washimwineñahu dehi kwinza kwamuntu atenañawu nawu Mesiya hela Kristu. Mesiya wukafuma kumutaña waAbarahama muntu washinshika. Wakekala mwanta wukaleñela antu ovwahila kwikala cheñi nankisu yakwikala nawumi wawanina wakubula kukata. (Kutachika 22:18; Isaya 53:4, 5) Iwu Akaninuwu wafumini kuBetelemi.—Tañenu Mika 5:2.

Yesu wekalili Mesiya. Bayibolu yashimwineñahu dehi henohu kuchidi yaaka kubadika 700 nawu, Mesiya wakavwalika kudi mumbanda wabulahu dehi kuhumañana neyala nawa akamudiwula. Wakahana wumi windi kukoola nshidi yawantu amavulu, nawa akamujiikila hamu nawakwamaheta. (Isaya 7:14; 53:3, 9, 12) Bayibolu yashimwineñahu dehi cheñi henohu kuchidi yaaka yakubadika 500 nawu wakeñila muYerusalema hachimbulu nawa akamufukejela namali asiliva 30. Wuprofwetu wejima washikijeweli.—Tañenu Zekariya 9:9; 11:12.

2. Komana Nzambi washimunañahu dehi mafuku hakamwekana yuma?

Bayibolu yashimwineñahu dehi chaaka chikamwekanayi Mesiya henohu kuchidi yaaka kubadika 500. Kufuma hayina mpinji kushika nihampinji yamwekeniyi, mpinji ayichindileña nanyilungu yayaaka, dikwila nawu “mulungu wumu” wemeneneñaku yaaka yitanu nayiyedi. Nyilungu 7 kushilahu nyilungu yikwawu 62, yejima hamu hinyilungu 69 yayaaka. Iyi nyilungu hiyaaka 483. Indi iyi yaaka yatachikili mpinjinyi? Kwesekeja naBayibolu, iyi yaaka yatachikili hampinji yayiliyi Nehemiya kambuña Nzambi muYerusalema nakutachika kutuñulula musumba. Nsañu yanyaka yakuPeresi yashimuna ichi chaaka nawu 455 B.C.E. (Nehemiya 2:1-5) Chimwahitili yaaka 483, Yesu wapapatisheweli nakwikala Mesiya muchaaka cha 29 C.E., mpinji yatelela.—Tañenu Danyeli 9:25.

  3. Komana wuprofwetu wamuBayibolu wunakushikijewa makonu?

Yesu waprofweteli hayuma yalema yinakumwekana makonu. Wuprofwetu windi wahosha hansañu yayiwahi yaWanta waNzambi wukaleta kuwunda mukaayi kejima kudi antu amukeña Nzambi. Iwu Wanta wukafumishahu yuma yatama yejima mukanu kaayi kamakonu.—Tañenu Matewu 24:14, 21, 22.

Wuprofwetu wamuBayibolu walumbulula jiika kutalisha hayuma yikamwekana hakukuma kwakanu kaayi kamakonu. Bayibolu yashimuna nawu kwambukaku nayuma yitunateli kumona mukaayi kanakuyilaku hambidi, antu akakisañanaña iseki. Makabi enzaña hamuloña wanjita, nzala, nyitentanshi niyipupu akasweja. (Luka 21:11; Chimwekeshu 11:18) Antu akekala nayililu yatama. Munanu mafuku akala, atumbanji twaYesu akashimwinaña nsañu yayiwahi yaWanta waNzambi munyunza yejima.—Tañenu Matewu 24:3, 7, 8; 2 Timotewu 3:1-5.

4. Yumanyi yikayimwekena antu kumbidi?

Nzambi Watwesha Yejima wahembela antu ashinshika yuma yayiwahi. Yesu Kristu, Mesiya hamu niantu atondawu, akekala mwiwulu nakuyuula antu hanu heseki. Atuña nfulumendi yaWanta yikayuula yaaka ikombakaji. Afu akayisañula nawa akekala nakukooleka kwakuheta wumi wahaya nyaka. Kuhiñahu, Wanta wukooka antu ejima akashakama hamaseki. Hikwakekala cheñi kukata hela kufwaku.—Tañenu Chimwekeshu 5:10; 20:6, 12; 21:4, 5.

Neyi munakukeña nsañu yikwawu, talenu mafu 23-25 nimafu 197-201 mumukanda Chumanyi Chacheni Chatañishaña Bayibolu? wunamwekeshuwu hanu.