Kupanda Kwataminadi?

Kufuma tuhu kuwansi, Barbara * wamweneña nyijimu, watiyileña mazu awantu nawa welukili chikupu nindi nakuhanjeka nawantaña jindi afwa dehi. Yena ninfumwindi Joachim, atañileña nyikanda yahosheleña hakupanda nawa akulukili yitembi mukutaña makaadi atarot. Makaadi wenawa amwekesheli nawu akekala namali amavulu, nawa aheteli mali amavulu mumudimu wawu wakuselujola. Ifuku dimu makaadi ayisoñamishili nawu antu atama akwinza hetala dawu nawa ayilejeli chakudikiña.

HELA chakwila kukuhwelela munsañu yakupanda kwamwekanaña neyi kwanyaka, antu akeña nankashi nsañu yakupanda. Antu amavulu avwalaña yijimba, kuzatisha Ouija board, nikuhanjeka nawakwakuzakuka akishi kulonda ayileji yuma yikamwekana kumbidi hela chakudikiña kuyuma yatama. Muchibaaba chidi namutu wunakwila nawu “Laptop and Lucifer,” magazini yakuGerman Focus yahosheli nawu: “Intaneti yinakuleñela antu amavulu kukeña kwiluka nsañu yejima yahosha hawuloji.”

Komana mweluka Bayibolu chiyahosha kutalisha hakupanda? Munateli kuhayama chiyahosha haniyi nsañu.

Chahosha Bayibolu Hansañu Yakupanda

Nshimbi yayinkeliyi Nzambi antu jindi muIsarela wakushankulu yahosha nawu: “Kudeyi bayi kwakamwekana . . . mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya, hela mukwakupesha, hela katepa, hela kadañuku. Muloña antu ejima elaña yumiyi Yehova wayimona nindi hiyakwakushimana.” (Kuhituluka 18:10-12) Muloñadi nshimbi yaYehova chiyakaanisha chikupu kupanda?

Neyi chinamwekeshi chakutalilahu chidi kumatachikilu, antu amavulu akuhwelela nawu antu amomi anateli kuhanjeka nawafu nawa ninsañu yazatishañawu mukupanda yafumaña kudi afu. Yuma yatañishañawu munsakililu jajivulu nawu muntu neyi nafwi wayaña muwanta wawaspiritu diyaleñelaña antu kukuhwelela yumiyi. Kwambukaku naniyi ntañishilu, Bayibolu yahosha hatooka to-o nawu: “Hakwila afu hiyeluka chumaku.” (Mukwakutaŋisha 9:5) Yayilumbulula afu neyi adi  mutulu twatweni, chakadi kwiluka yuma yinakumwekana. * (Matewu 9:18, 24; Yowanu 11:11-14) Nsañu iyi yinateli kuyileñela kwihula nenu, Tunateli kulumbulula ñahi nsañu yahoshañawu antu nawu ahanjekaña nawafu? Hanu dinu ahanjekaña nawanyi?

Kuhanjeka nawaSpiritu

Nsañu Yayiwahi yashimuna nawu Yesu wahanjekeli nawaspiritu hampinji yadiñiyi hamaseki. Maku 1:23, 24 yahosha nawu ‘spiritu wazonda’ wamulejeli Yesu nindi: “Nakwiluki.” Chakadi kujina aspiritu ayiluka. Indi enu mwayiluka?

Henohu Nzambi kanda yaleñi antu, waleñeli anyana amavulu akuspiritu, hela añelu. (Yoba 38:4-7) Antu ekala akuminamu nankashi mudi añelu. (Aheberu 2:6, 7) Añelu akweti ñovu nimaana nankashi, nawa ayileñeli kulonda eleña mwaya muchima waNzambi. Ñimbi yamasamu wembili nindi: “Mukiswilenu Yehova nkisu, enu añelu jindi, enu mwasweja ñovu, mwelaña mwahoshañayi, mwatiyililaña izu dindi dahoshañayi.”—Masamu 103:20.

Bayibolu yashimuna nawu chimwahitili mpinji añelu amakwawu atachikili kuhanjeka nawantu munjila yabuliliyi kwitejayi Nzambi. Muloñadi? Watachi kwila mwenimu watwambili hakwila ahuñumuni antu atachi, Adama niEvu kudi Nzambi nawa Nleñi. Chumichi chamuleñeleli kwikala Satana Diyabolu, mukwakutwamba nawa mukwakudimbulula Nzambi.—Kutachika 3:1-6.

Kuhiñahu, añelu amakwawu ‘afumini mwaawu mwashakaminañawu’ mwiwulu, nakuvwala nyijimba yawuntu nawa asumbwili ambanda alubanji hamaseki. (Yuda 6; Kutachika 6:1, 2) Ana añelu adikañili nianyanawu aswejeli kutaluka achiinishileña antu chakwila iseki dejima “dawaninini kwamadombu hohu.” Chakadi nikujina mweluka nsañu yamuBayibolu yashimunaña nawu Nzambi wajilumwini chisaka chatama nawa chamadombu naDibaji damumafuku aNowa.—Kutachika 6:3, 4, 11-13.

Menji adibaji aleñeleli añelu kusubula nyijimba yawuntu nakufunta muwanta wawaspiritu. Ilaña Nleñi hayitejeli kufunta ‘mwaawu mwashakaminañawuku.’ Ilaña wayihembeleli mwiluña datama dadifwana ‘namena amwidima wabwi-i.’ (2 Petulu 2:4, 5) Bayibolu yayitena awa añelu adikañili nawu ‘andemoni.’ (Yakoba 2:19) Diwu aleñelaña antu kupanda.

Yuma Yakeñañawu Andemoni

Chuma chatachi chakeñañawu aspiritu atama ahanjekaña nawantu, hikuyilekesha kudifukula kudi Nzambi walala, Yehova. Yawaana hela ñovu jashimunañawu antu apanda nawu akweti jakuluwañeshelamu hohu antu kubula kudiza hadi Nzambi nikwikala nawulunda wawuwahi nindi.

Chuma chamuchiyedi chakeñañawu andemoni chamwekenaña muchuma chafwililiyi Satana, nlomboli yawu kumweseka Yesu. Satana wamwinkeli Yesu “mawanta ampata yamunu mwishina ejima.” Chumanyi chakeñeleñayi Satana? Wamwilili nindi, ‘Dinati heseki wudifukuli kudami.’ Eña, Satana niandemoni afwilaña nawu antu adifukuleña kudi wena. Ilaña Yesu hetejeli kumufutalela Nzambi nikudifukula kwalalaku.—Matewu 4:8-10.

 Makonu aspiritu atama hiyavula kuhanjeka nawantu neyi chahanjekeluwu naYesuku. Ilaña afwilaña kuhuñumuna antu abula kubabala nayuma yamwekanaña neyi yatama wanyi yidi neyi kuhoña, kushimuna yuma yikamwekena muntu kumbidi niyuma yikwawu. Bayi ayidimba nayumiyuku. Yumiyi bayi neyi hinjila yakuhanjekelamu nawaspiritu abulaña kumwekanaku. Aspiritu atama azatishaña yipandapanda yaletaña ikoku kudi antu kulonda kuyihuñumuna abuleña kudifukula kudi Yehova. Neyi iyi njila kuzatika chiwahi nehi, aspiritu atama avula kuyandisha antu afwaña mumuhetu wawu. Neyi ayiyandishaña, chumanyi chimwatela kwila kulonda musubuki mumpompa yawu?

Chakuleka Kupanda

Bayi muhanjekaña nawuku, aspiritu ahanjekaña nawantu ekala ayilumbu jaNzambi, nawa akayijilumuna. (Yuda 6) Hiyakwakutwamba adifwikijaña neyi afu. Munateli kutiya ñahi neyi mwiluka nenu ibwambu denu himukwakutwamba, wakeñaña kuyikañesha kwila yuma yimunakukeña? Munateli kwila ñahi neyi mwiluka nenu munakwati wubwambu nachivumbi kuzatisha Intaneti chakubula kwiluka? Kufwa mumuhetu wawandemoni hichuma chafwana nankashi. Mwatela kuzata nañovu kulonda muleki kuhanjeka nawu. Yumanyi yimwatela kwila?

Hanyima yakudiza yuma yatañishaña Nsona kutalisha hakupanda, antu amakwawu amuEfwesesa wakushankulu atondeluhu kwocha nyikanda yawu yahosheleña hakupanda hela chakwila yadiña yalema wuseya. ‘Ayocheleli hatooka.’ (Yililu 19:19, 20) Makonu, nsañu yahoshaña hakupanda yekala hohu munyikanda wanyi, yijimba, Ouija boards niyuma yadifwana niyozelu yahamakina. Lekenu kwila yuma yejima yamwekanaña neyi yakundama kukupanda.

Anukenu antu adisumbula atenawu kumatachikilu achinu chibaaba. Kuhitila mukutala makaadi awu atarot, elukili nawu antu afwana akwinza kwitala dawu, nawa nawu bayi ayitiyilila hela kwiteja chuma chidi chejima chikuyinkawuku. Hela chochu, aYinsahu jaYehova ayedi aConnie niGudrun enzi kwitala dawu nakuyileja nawu anakushimwina nsañu yayiwahi yaNzambi, Joachim niBarbara etejeli kuhanjeka nawu. Ahanjekeli hansañu yakupanda nawa aConnie niGudrun ayilejeli nsañu yalala yamuNsona yahosha hakupanda. Atachikili kudiza Bayibolu mpinji yejima.

Chakadi nikumba mpinji Joachim niBarbara alekeli kuhanjeka nawandemoni. Kafwampi Joachim niBarbara ayandili chikupu muloña andemoni ayilukukileña nakuyichiinisha. Ashakamineña nakuchiina mafuku ejima nawufuku hakapinji kantesha sampu nichabuukililuwu mwitala dacheñi. Mukukala kwawu kwejima kwamwenuwu, awantu adisumbula atwalekeluhu kukuhwelela mazu ekala haAfwilipi 4:13 akwila nawu: “Natweshi kwila yuma yejima mudi Kristu wankoleshaña.” Yehova wayikiswilili nawa chimwahitili mpinji aspiritu alekeli kuyikabisha. Makonu Joachim niBarbara adi namuzañalu hakudifukula kudi Nzambi walala, Yehova.

Nsona yakonkomwena ejima akekala nankisu yaYehova nawu: ‘Mwovwahilenu Nzambi, hakwinza Diyabolu dikañenu nindi, niyena wukuyitemuka. Kundamenu kwakwihi naNzambi, niyena wukukundama kwakwihi nanenu.’ (Yakoba 4:7, 8) Neyi munakukeña kusubuka kudi andemoni Yehova Nzambi wukuyikwasha. Chashinshikañawu hakulubuka kukupanda Joachim niBarbara eteja namuchima wawu wejima mazu ekala haMasamu 121:2 akwila nawu: “Kunkwasha akunkwashaku kudi Yehova.”

[Tumazu twaheshina]

[Mazu ekoku adi hefu 11]

Kupanda kwakañeshaña antu kwikala nawulunda wawuwahi naNzambi

[Mazu ekoku adi hefu 12]

“Kundamenu kwakwihi naNzambi, niyena wukukundama kwakwihi nanenu.”—YAKOBA 4:8