Munateli Kutonda Mbidi Yayiwahi Munjilanyi?

MUNATELI kwikala ñahi nachihandilu chachiwahi? Njila yimu hikuzatisha wuswa wabadika kuwaha wumukweti kulonda mushinshiki hayuma yatama yinateli kumwekana kumbidi hayuma yimunakufuukulahu makonu.

Eñañi, chakala kufuukulahu yuma yinateli kuyikwasha muchihandilu chenu chejima. Muloñadi? Muloña antu amavulu makonu akeñaña yuma yakudiluñisha hampinji yenoyu. Chakutalilahu, munateli kwiluka nenu kuzatisha kufumba kwamuBayibolu kunateli kuyikwasha kwikala nawulunda wawuwahi muchisaka. (Aefwesesa 5:22–6:4) Hakwila mwili mwenimu, mwatela kwikala nampinji yakuhanjeka nachisaka chenu, iku munakushinda ikakeja dakwiñija mutu mumudimu, kunooka hela kuhema. Neyi chochichekala muyuma yikwawu yamuchihandilu, mwatela kutonda hakachi kayuma yinateli kuyizañalesha hakapinji kantesha nayuma yayiwahi yakumbidi. Munateli kwiladi hakwila mwikali nañovu yakutondahu yuma yayiwahi? Zatishenu iji njila jiwana.

1 Fwikijenu Yuma Yikamwekana Hayuma Yimunafuukuluhu

Neyi kudi yuma yimunakukeña kufuukulahu, fwikijenu yuma yayeni yinateli kumwekana. Bayibolu yatufumbaña nawu: “Muntu wadihoñeshaña mumuchima wamonaña katama, hakubatama.” (Yishimu 22:3) Neyi mushinshika chikupu yuma yatama yafumaña muyuma yimukufuukulahu, himukufuukula kwila yuma yinateli kuyiletela kukalaku. Ilaña neyi mutoñojoka hayuma yayiwahi yikamwekana kumbidi hachuma chimunakufuukulahu, munateli kwikala nawuswa wakufuukulahu chiwahi.

Dihulenu nenu: ‘Chumanyi chikafuma muchuma chinukufuukulahu neyi munahiti chaaka, hela yaaka 10, chili yaaka 20? Komana nakekala wakola kumujimba nawa hinakayandaña muyitoñojokaku? Indi chuma chinukutondahu chikukuma ñahi chisaka chami niantu amakwawu inakeña?’ Sweje-e, dihulenu nenu: ‘Komana yuma yinukufuukulahu yikumuzañalesha Nzambi? Indi wulunda wami nayena wukwikala ñahi?’ Chineli Bayibolu ayonena kudi Nzambi, yinateli kuyikwasha kwiluka yuma yamuzañaleshaña nikuyisoñamisha kunyihetu yimwatela kudiwula.—Yishimu 14:12; 2 Timotewu 3:16.

2 Shinshikenu Njila Jimunateli Kutondahu

Chatela afuukuluhu awenawu, antu amavulu embujolaña antu ashakamañawu nawu. Chuma chimukutondahu hichikuyikwasha kuhanda chiwahi hamuloña wakwila dichelañawu antu amavuluku. Shinshikenu njila jimunateli kutondahu. Shinshikenu chakutalilahu chaNatalie. * Walumbulwili nindi: “Nakeñeleña maluwi amawahi. Ilaña nelukili nami hinateli kwikala namaluwi amawahuku muloña wachihandilu chami. Akwetu ejima hakoleji adiña namaana. Ilaña atwalekeluhu kwila yuma yatama muyihandilu yawu. Ahimpileña ambanda hela amayala neyi yakuvwala. Anami nawa nadiña nawatujila twami amavulu. Ichi chihandilu chaneñesheleña nankashi.”

Natalie watachikili kudiza Bayibolu nawaYinsahu jaYehova. Wahosheli nindi, “Hakachi kawaYinsahu namweni atwansi akweti muzañalu niantu adiña namaluwi amawahi. Hela chakwila  chadiña chakala, nahimpileña yililu nichihandilu chami chovu-chovu.” Chumanyi chafuminimu? Natalie wahosheli nindi, “Nakeñeleña nankashi kusumbuka namuntu inakeña. Chimwahitili mpinji nasumbukili namuntu wakuhwelela yuma yinakuhwelela. Neluka nami Nzambi wanyinka chihandilu chachiwahi kubadika chinatoñojokeleña.”

3 Shinshikenu Yuma Yikamwekana Kumbidi

Hakwila nawu mukañeshi yitoñojoka yakukeña kudiluñisha hakapinji kantesha, mwatela kufwikija yuma yakumbidi yimunakukeña nikufuukulahu chakuyizata. (Yishimu 21:5) Bayi mutoñojokaña nenu mwakahanda hohu yaaka 70 hela 80 yahandañawu antuku. Ilaña, fwikijenu munakudiluñisha wumi wahaya nyaka washimunawu muBayibolu.

Bayibolu yalumbulula nawu kuhitila mumulambu wefutu daKristu Yesu, Nzambi waloñeshela njila yakukwashilamu antu kuheta wumi wahaya nyaka. (Matewu 20:28; Aroma 6:23) Nzambi wakana nindi keña yashikiji chuma chafuukwililiyi antu niiseki hakusambila. Antu amukeña Nzambi akekala nakukooleka kwakudiluñisha wumi wahaya nyaka heseki hakawahishawu. (Masamu 37:11; Chimwekeshu 21:3-5) Munateli kudiluñisha ichi chihandilu neyi mufwikijaña yuma yikamwekana kumbidi.

4 Fwilenu Kushikija Yikonkwanyi Yenu

Chumanyi chimwatela kwila kulonda mwakadiluñishi ichi chihandilu? Sambilenu kudiza hadi Nzambi. (Yowanu 17:3) Nsañu yalala yamuBayibolu yikuleñela kukuhwelela nenu yuma yakanayi Nzambi kumbidi yikashikijewa. Chikuhwelelu chamuchidiwu chikuyikwasha kuhimpa yuma yinakukeñeka kulonda mwikali nawuselewa waNzambi.

Shinshikenu chuma chamweniyi Michael. Washimwini nindi: “Natachikili kunwa walwa niyitumbu yashetana henohu nidi nayaaka 12. Nadiña mwizanvu dawayiluwañimbi nawa natoñojokeleña nami nakafwa henohu kanda nishikiji yaaka 30. Nakeñeleña kudijaha kapampa kakavulu muloña wakuzuwa nichikela. Nakuhweleleli nami kwekala yuma yayiwahi muchihandilu, ilaña hinayiwanineñaku.” Hampinji yadiñayi Michael kushikola yakusekondali, mukwawu wamwizanvu dawayiluwañimbi watachikili kudiza Bayibolu nawaYinsahu jaYehova. Michael niyena wetejeli kudiza.

Yuma yadiziliyi Michael muBayibolu yamukwashili kuhimpa chamweneñayi chihandilu chindi chakumbidi. “Nadizili nami kumbidi iseki dikekala paradisa nawa antu akashakama mukuwunda chakubula kwakamena. Natachikili kufwikija nami nakashakamaña munidi ituña. Nemikili chikonkwanyi chakukolesha wulunda wami naYehova. Ilaña hinamuzañalesheleña Yehova mpinji yejimaku. Nihampinji yinadizileña Bayibolu nasheteleña mpinji yikwawu. Nawa nadiñi nakuluwa namumbanda.”

Indi Michael watwesheli ñahi kushinda kukala kwindi nakuhimpa chihandilu chindi? Wahosheli nindi: “Muntu wandizishileña Bayibolu wankolesheli kutañaña Bayibolu mafuku ejima nikudikunda nawantu akeña kumuzañalesha Nzambi. Nelukili nami akwetu ayiluwañimbi achidiña nakunluwañesha. Hela chakwila adiña neyi chisaka chami, nalekeli kudikunda nawu.”

Michael wemikili yikonkwanyi yakushikija mukapinji kantesha, niyuma yamukwashili kushikija chikonkwanyi chindi cheneni chakwovwahila nshimbi jaNzambi muchihandilu chindi. Ninenu munateli kwila chochimu. Sonekenu yikonkwanyi yimwakashikija kumbidi niyuma yikuyikwasha kuyishikija mukapinji kantesha. Shimunenu yikonkwanyi yenu kudi antu anateli kuyikwasha nawa yilenu ayitaleña chimunakuyishikija.

Bayi mulabajala kudiza hadi Nzambi nikuzatisha nshimbi jindi muchihandilu chenuku. Yinu diyi mpinji yimwatela kuzata yuma yikuyikwasha kumukeña Nzambi Niizu dindi Bayibolu. Hakulumbulula muntu wazatishaña yishina yamuBayibolu, Izu daNzambi dahosha nawu: “Yejima yakwilayi yikulumbuluka hohu.”—Masamu 1:1-3.

[Tumazu twaheshina]