Nsañu Yalala Yahosha Haamagedoni

‘Hiyaspiritu awandemoni . . . enda aya kudi anyanta ankanu ampata yamunu mwishina yejima . . . akayipompeshela kwiluña dimu datenañawu muHeberu nawu Amagedoni.’—CHIMWEKESHU 16:14, 16.

AMAGEDONI, hiijina deluña. Hela chochu, iluña denidi hidadiñi kwiluña didi dejima ahanu hamasekuku.

Hanu dinu, izu dakwila nawu “Amagedoni” dalumbulukadi? Muloñadi kakavulu chadesekejelañawu kuchuma chidi neyi njita?

Kuyipompesha Heluña Datenañawu Nawu Amagedoni

MuchiHeberu chacheni izu dakwila nawu Amagedoni dalumbuluka nawu “Mpidi yaMegido.” Hela chakwila, mpidi yeniyi yadiñaku wanyi, iluña datenañawu nawu Megido dekala kwoku. Dekala heluña dalema hamasaña anyikwakwa yiyedi yakukabeta kaluwunda nakabeta kamujika mwiluña mwashakamineña munza waIsarela wakushankulu. Njita jamaneni ajizuñililili kwakwihi neluña denidi. Dichi, ijina daMegido adesekejaña nanjita. *

Hela chochu, iluña daMegido dalemena bayi neyi hanjita yazuñilileñawu kunidi iluñaku, ilaña muloña wazuñilileñawu. Iluña daMegido dadiña hakachi Ketuña daChikaninu dayinkeluwu aIsarela kudi Yehova Nzambi. (Kwidika 33:1; Yoshuwa 12: 7, 21) Wayikanini ana antu nindi wakayamwina kudi ayilumbu jawu nawa wayamwinini. (Kuhituluka 6:18, 19) Chakutalilahu, Yehova wayikwashili aIsarela muchihayamisha haMegido chayilukukiluwu kudi amashidika aMwanta wawaKenani Yabini nimukulumpi windi wawamashidika Sisera.—Ansompeshi 4:14-16.

Dichi, izu ‘daAmagedoni’ demenañaku chuma chalema. Adesekejaña nanjita yazuñaña nyunza yiyedi yikweti ñovu.

Wuprofwetu wamuChimwekeshu washimuna yuma yikamwekana kumbidi hakelayi Satana niandemoni akaswadikiji nfulumendi yawantu kulonda akapompeshi amashidika awu, akalukuka antu jaNzambi nimudimu wawu. Kulukuka kweniku kwakaleñela antu amavulu nankashi kufwa hampinji yakashindayi Nzambi ayilumbu.—Chimwekeshu 19:11-18.

Muloñadi Nzambi atenawu muBayibolu nawu ‘waluwi, wenzala wushona, hazuwaña swayuku, wasweja luwi’ chamba kajilumwinayi antu amavulu? (Nehemiya 9:17) Hakwila nawu tutiyishishi Nzambi chakajilumwinayi antu, twatela kwakula malwihu asatu: (1) Hinyi wakatachika njita? (2) Muloñadi Nzambi chakalwilayi antu jindi? (3) Yumanyi yikadiluñishawu antu hanu hamaseki hakumana kwaniyi njita?

1. HINYI WAKATACHIKA NJITA?

Bayi neyi Nzambi wakazatisha njita yaAmagedoni muloña wukweti nduluku. Ilaña Nzambi wakamwina antu aloña kudi antu akakeña kuyijaha. Akwandulu amuniyi njita ‘hiyanyanta ankanu ampata yamunu mwishina yejima,’ anlomboli amukaayi. Muloñadi wakalukukilawu? Muloña Satana wakasañumuna nfulumendi niamashidika kulonda akalukuki antu adifukulaña kudi Yehova Nzambi.—Chimwekeshu 16:13, 14; 19:17, 18.

Mumatuña amakwawu makonu antu akweti wuswa wakuhosha yuma yinakeñuwu nikutonda nsakililu yakeñawu, yitoñojoka yakwila nawu jinfulumendi jinateli kukañesha antu hela kulekesha kwikala naniwu wuswa yamwekanaña neyi kaanu hohu. Hela chochu, muyaaka yamuma 1900 jinfulumendi jalukukili antu muniyi njila nichayinu mpinji jinakulukuka antu. * Hela chochu, hekala yaambu  yiyedi yamaneni hakachi kaniku kulukuka kutwatena hakusambila nikulukuka kwesekejawu naAmagedoni. Chatachi, iku kulukuka kwakekala kwamukaayi kejima. Chamuchiyedi, Yehova Nzambi wakela chuma cheneni chikupu kubadika cheliliyi kunyima. (Yeremiya 25:32, 33) Bayibolu yalumbulula iyi ndombu nawu ‘njita yefuku odu deneni daNzambi Watwesha Yejima.’

2. MULOÑADI NZAMBI CHAKALWILAYI ANTU JINDI?

Yehova wadizishaña antu adifukulaña kudi yena nindi ashakameña chawunda nikukeña ayilumbu jawu. (Mika 4:1-3; Matewu 5:43, 44; 26:52) Dichi hiyakanyamuna yitwa kulonda akatweshi kudamwina aweni hampinji yakayilukukawu kudi ayilumbu jawuku. Neyi chakwila Nzambi kulwa nakwamwina antu jindi nehi anateli kuyijilumuna. Dichi anateli kusawula ijina daYehova Nzambi. Neyi chakwila ayilumbu awantu jaNzambi akisañana antu jindi, chikumwekana neyi Yehova haloñaku, hakweti kukeñaku hela hakweti ñovuku. Chumichi kwila chitwesheka nehi!—Masamu 37:28, 29.

Nzambi hakeñaña kukisañana antuku, dichi wayibabeshelaña chadimu kutalisha hachuma chakelayi. (2 Petulu 3:9) Kuhitila munsañu yasonekawu muBayibolu wayilejaña antu ejima nindi kushankulu wadiña nakulwila antu jindi neyi ayilukuka. (2 Anyanta 19:35) Bayibolu yatusoñamishaña cheñi nawu kumbidi neyi Satana niantu jindi alukuka antu jaNzambi, Yehova wakalwa nakukisañana ejima akakabisha antu jindi. Kafwampi, Izu daNzambi dashimwineñahu dehi nawu Yehova wukajilumuna antu atama. (Yishimu 2:21, 22; 2 Atesalonika 1:6-9) Chakadi nikujina, hayina mpinji akwakulukuka akeluka nawu anakulwa naNzambi Watwesha Yejima.—Ezekeli 38:21-23.

3. YUMANYI YIKADILUÑISHAWU ANTU HAKUMANA KWANIYI NJITA?

Njita yaAmagedoni yikapulwisha antu amavulu nankashi. Kafwampi yikekala mpinji yakuleta kuwunda hamaseki.—Chimwekeshu 21:3, 4.

Mukanda waChimwekeshu wahosha ‘hezaza deneni’ dakadi kuchinda dikapuluka iyi njita. (Chimwekeshu 7:9, 14) Kuhitila muwunlomboli waNzambi, idi izaza dikazatila hamu hakufuntisha Paradisa hamaseki neyi chafuukwiliyi Yehova hatachi.

Komana tweluka mpinji yakalukukawu antu jaNzambi?

[Tumazu twaheshina]

[Mwevulu wudi hefu 6]

Yehova Nzambi wamwinini antu jindi kumafuku akunyima

[Mwevulu wudi hefu 7]

Yehova wakamwina cheñi antu jindi hanjita yaAmagedoni