Yehova Nantoneshi

Washimwini Patrice Oyeka

Yadiña mpinji yamelela. Chineli nashakamini nkawami ifuku damukuma nachineñi hamuloña wakwikala mputamesu, iku inakutiyilila maprogiramu ejima ahosheleñawu hachisanji nafuukwiluhu kudijaha. Nashili wulembi wakuvuba namenji mulupasa nitenteka nihamesa. Nakeñeleña kuwela kakukumishaku nikuvwala chiwahi henohu kanda ninwi awuna wulembi nakudijaha. Nakeñeleleñadi kudijaha? Hanu dinu chumanyi chaletesheli nishiki nikulelu hakwila nitweshi kushimuna iyi nsañu?

N AVWALIKILI haFebruary 2, 1958 kukabeta kaKasaï Oriental, muDemocratic Republic of Congo. Atata afwili henohu nidi nayaaka yitanu nayiwana yakuvwalika, nawa manakwami diyi wankulishili.

Chinamanishili shikola, neñilili mudimu kwitempa dandundu. Ifuku dimu nantetemena mu 1989, henohu inakusoneka chileji mukasanji kami, nakasumukili hamesu bwi-i. Hakusambila, natoñojokeli nami kesi kawuneñu kanajimi, ilaña natiyileña ikina denda divuma nawa yadiña mpinji yantetemena. Natiyili woma, hinatwesheli kumona chuma chidi chejimaku, kushilahu ninsañu yinasonekeleña.

Hohenohu natambikili chinlonda chami kulonda yantwali kudi muntu wazatilileña kuchipatela. Ona muntu wahosheli nindi atela kuntwala kudi ndotolu wakuluka yitembi mumusumba. Ndotolu wamweni nindi tuntu twamesu tunakisiki nawa nakatili nankashi, dichi wanlejeli kuya kumusumba weneni waKinshasa.

Chinahandili muKinshasa

MuKinshasa, nadimweni nawandotolu amavulu akuluka yitembi muyikatu yamesu, ilaña kwosi niwumu wankwashili. Hanyima yakushakama mafuku 43 muchipatela, andotolu anlejeli nawu nukwikala mputamesu muchihandilu chami chejima. Antaña jami atwalili kumachaachi amavulu kulonda anñuki muchihayamisha, ilaña hiyanñukiluku.

Nkumininaku, nelukili nami hinamba kamonaku. Yuma yejima yatamini muchihandilu chami. Nalekeli kumona nawa mudimu wamanini. Ñodami niyena watemukili, nawa wasendeli yuma yejima yamwitala yitwadiña nayu. Natiyileña nsonyi kwidika hanzi hela kuhanjeka nawantu amakwawu. Nashakamineña nkawami mwitala nawa nadimweneña neyi nidi wamukunkulwayi hohu.

Nakeñeleña kudijaha kapampa kayedi. Kapampa kamuchiyedi dikinashimuni kumatachikilu aniyi nsañu. Mwana wanyanya wamuchisaka diyi wampulwishili. Henohu inakuwela, wamwañili yuma yadiña mulupasa chakubula kwiluka nindi hiwulembi. Natiyili kuwaha muloña wanwini wanyi. Ilaña natiyili kutama chelili niwani lupasa hosi. Dichi nalejeli chisaka chami muloña wunakeñeleleña lupasa nichuma chinakeñeleña kwila.

Namusakililaña Nzambi nichisaka chami hakunhemba. Nafuukwiluhu kudijaha ilaña ankañesheli.

 Nekala Cheñi naMuzañalu Muchihandilu

Hefuku daMulungu mu 1992, nadiña nashakama hetala nakunwa makanya, dichi aYinsahu jaYehova ayedi ashimwinineña kwitala nikwitala anhempwili. Chamwenuwu nawu nidi mputamesu, antañilili nsona yaIsaya 35:5 yahosha nawu: “Henohu dihu hakatoneshawu mesu awamputamesu, dihu hakajikulawu matu awajika matu.” Nazañaleli nankashi hakutiya ana mazu. Kwambukaku, nayuma yinatiyili kumachaachi, aYinsahu hiyanlejeli nawu akunñuka muchihayamishaku. Ilaña alumbulwili nawu nakatona mwituña dadiha dakanayi Nzambi, neyi nimwiluka Nzambi. (Yowanu 17:3) Hohenohu, natachikili kudiza Bayibolu nawaYinsahu kuzatisha mukanda waYou Can Live Forever in Paradise on Earth. Natachikili cheñi kuya kukupompa kwawakwaKristu Hetala daWanta damwiluña detu nawa nahimpili chihandilu chami. Nalekeli kunwa makanya.

Nakañenyi kuyilaku hambidi kuspiritu muloña wawumputamesu. Dichi nayili kushikola yawamputamesu kulonda niluki kutaña nikusoneka nsona jawamputamesu. Chumichi chankwashili kusonekesha mushikola yaloñeshawu Hetala daWanta. Natachikili kushimwina antu amuchituñilu. Nekalili cheñi namuzañalu muchihandilu. Natwalekeluhu kuyilaku hambidi nawa nadihanini kudi Yehova. Napapatisheweli haMay 7, 1994.

Chinaswejeli kumukeña Yehova niantu, nakeñeli kutachika mudimu wampinji yejima. Natachikili kuzata wupayiniya wampinji yejima, mukwakushimwina wampinji yejima haDecember 1, 1995. Nekala cheñi nakukooleka kwakuzata neyi eluda muchipompelu, kufuma tuhu muFebruary 2004. Mpinji yikwawu atambikaña kuyipompelu yikwawu yekala mwiluña detu nakuhana mpanji neyi nhoshi mwenyi. Nkisu jejimiji janzañaleshaña nankashi nawa janleñelaña kwiluka nami kwosi wufwayi wudi wejima wunateli kutukañesha kumuzatila Yehova Nzambi neyi chitwakeñaña kumuzatila.

Yehova Nanyinki “Mesu”

Neyi chinashimuna dehi, ñodami wantemukili muloña wakwikala mputamesu. Ilaña natambwili nkisu yikwawu kufuma kudi Yehova. Munjila yikwawu, wanyinka mesu akumona nachu. Anny Mavambu wetejeli kusumbuka kudami hela chakwila nekala mputamesu, wekala mesu ami. Chineli niyena himukwakushimwina wampinji yejima, twayaña hamu mumudimu wakushimwina mpinji yejima. Wantañilaña cheñi munyikanda mwafumaña mpanji jami kulonda nisoneki munsona yawamputamesu. Wankwashaña mwamuvulu nankashi. Muloña wayena, namoni nami mazu ekala haYishimu 19:14 alala, ahosha nawu: “Itala namaheta hiwuswana wakudi atata; ilaña mumbanda welaña mwamaana wakudi Yehova.”

Yehova watukiswila naAnny hakutwinka anyana ayedi, weyala niwamumbanda. Inakufwila nami nakayimoni kumesu muParadisa. Natiyaña cheñi kuwaha muloña manakwami watwinka itala dindi nindi tushakameñamu, wadiza chalala chamuBayibolu nawa wapapatisheweli. Wejima wetu twekala muchipompelu chimu.

Hela chakwila nekala mputamesu, nakeñaña kumuzatila Nzambi chikupu muloña nankiswili nankashi. (Malaki 3:10) Nalombaña mafuku ejima nami Wanta windi winzi kulonda wufumishuhu makabi ejima hamaseki. Chineli namwiluki Yehova, nateli kuhosha mwalala nami: “Nkisu yaYehova yaheteshaña muntu, habombelañaku kukalaku.”—Yishimu 10:22.

[Nyevulu yidi hefu 15]

Kuhana mpanji yaBayibolu; chisaka chami nimana kwami