Bayibolu Yahimpaña Yihandilu Yawantu

MULOÑANYI waletesheli muntu wakulilili muchisaka chetiyili chikupu muchechi yaKatolika nawa wadiña namudimu wawuwahi wawunsompeshi yekali Chinsahu chaYehova? Chumanyi chasañumwini mbanji kuleka madombu nikwikala nkoñi wamuchipompelu? Tañenu yuma yinahoshiwu awa antu.

“Nelukili chikupu yuma yayiwahi niyatama.”—SEBASTIÃO ALVES JUNQUEIRA

CHAAKA CHAKUVWALIKA: 1946

ITUÑA KWAFUMAYI: BRAZIL

KUHANDA KWINDI: NSOMPESHI

CHIHANDILU CHAMI CHAKUNYIMA: Kutwashakamineña nachisaka chami hadiña jikilomita 6, kufuma mumbaka yaPiquete. Anvwali jami adiña nafwamu yanyanya nawa yadiña nakutukwasha muyuma yakeñekeleña. Shikola yinatañilileña yadiña muPiquete, dichi nakombweli nkinga yayikulu yankwashileña hakuya mumbaka. Antu amwiluña detu adiña atuzweñi, ilaña mumbaka mwadiña mwawunyonji nawa himwadiñi wubanji nankashuku. Amayala amavulu muniyi mbaka adiña nakuzatila kufakitoli yatuñileña yitwa yawamashidika.

Nadiña namaana nankashi nawa nayili haShikola yawaMashidika yaKutuña jiNdeki mumusumba wakwakwihi hampinji yinamanishili kudiza mu 1966 nawa nekalili sajenti. Kuhiñahu nayili nakudiza nshimbi nawa natambwili digili. Mukuhita kwamafuku nakeñeli mudimu wakwikala mukulumpi wawatupokola. Mu 1976 nahitili kweseka kwanfulumendi nawa antondeli kuzata iwu mudimu. Mpinji yikwawu nazatileña neyi mukulumpi wamudimu wakaleya. Haniyi mpinji, aYinsahu jaYehova enjileña kakavulu nakulomba lusesa kulonda ashimwini atuyili. Mpinji yejima anshimwinineña nsañu yamuBayibolu. Namulemeshileña Nzambi chikupu. Nazañaleli nankashi hakwiluka nami ijina daNzambi diyi Yehova nawa tunateli kwikala ibwambu dindi.

Nayilileñaku hambidi mumudimu wami chovu-chovu. Muchaaka cha 1981, nahitili kweseka kukwawu kwanfulumendi nawa nekalili nsompeshi wetuña. Mu 2005, antondeli kwikala nsompeshi muchota chelilañawu apilu nyiloña muchota chanyiloña chaSão Paulo.

BAYIBOLU CHIYAHIMPILI CHIHANDILU CHAMI: Hashimbwili wanyi kufuma hinamanishili shikola yakudiza nshimbi, natachikili kutaña Bayibolu, chumichi chanleñeleli kuhimpa chikupu chinatoñojokeleña. Nadiña netiya chikupu muchechi yaKatolika. Antaña jami amakwawu adiñi atupristu nawa wumu wadiñi bishopu, nawa namukwashileñaku kapristu hampinji yaKupompa. Henohu kanda yatachiki kuhosha nsañu, natañileña nsañu yakutaña hefuku denodu mumukanda mwasonekawu kulomba. Antu amuchechi yaKatolika hiyadiña nachaaku chakutaña Bayiboluku. Amama ahilili chikupu chelukiluwu nawu  natañaña Bayibolu. Esekeli kunlekesha nawu nikamba kaluwankana muyitoñojoka. Hela chochu, natwalekeluhu kutaña; kwosi chuma chatama chinamwenuku.

Namoni kufwila kwiluka yuma dikwaleñeleli kukeña kutaña Bayibolu. Nakeñeleña kwiluka nsañu yayivulu kutalisha hadi atupristu nimudimu wazatañawu muchechi. Natachikili kutaña hansañu yezanvu damuchechi yaKatolika yawaRoma dahoshaña nawu nsakililu yatela kuzata kulonda amanishi kukala kwawantu, kwajipolitiki nikwamali, ilaña nsañu yahosheleñawu anlomboli jawu yadiña yaheña nawa yanlumbulukilileña wanyi.

Hampinji yoyimu, ndotolu wami wamazewu, wadiña kaBuddha wanyikeli mukanda wamwinkeluwu. Iwu mukanda wadiña namutu wakwila nawu Did Man Get Here by Evolution or by Creation? * Natambwili mukanda weniwu nakutoñojoka nami nukutiya kuwaha kuwutaña hamu namukanda wasonekeluwu kudi Charles Darwin wakwila nawu The Origin of Species. Nsañu yalumbululawu muDid Man Get Here by Evolution or by Creation? yadiñi yatiyakana, yalala nawa yanshikili hamuchima. Nelukili chikupu nami yitoñojoka yakwila nawu yuma yadinjilili yayeni yadiña yakutwamba.

Chinatañili iwu mukanda hansañu yahoshaña hayileñaleña chanleñeleli kukeña kwilukilahu nsañu yayivulu. Nakeñeleña kwikala nanyikanda yayivulu yasonekawu kudi aYinsahu jaYehova. Anlejeli nawu muntu waloñeshaña nyotoka wadiña Chinsahu chaYehova. Nahanjekeli nindi nawa wanyikeli nyikanda yikwawu yakutaña. Hayina mpinji netejeli wanyi kudiza Bayibolu nawaYinsahu. Natoñojokeleña nami nateli kudiza Bayibolu nkawami.

Chinatachikili kutaña Bayibolu, nafuukwiluhu nami chikuwaha kutañila hamu nachisaka chami chineli nadiña nasumbula dehi. Twadiña nakudiza kwachisaka mulungu nimulungu nawa twatañileña Bayibolu hamu. Hakwikala aKatolika, chisaka chami chejima cheñijili mutu mudi atupristu niabishopu. Dichi nsañu yinatañili haYowanu 14:6 yanleñeleli kutoñojoka chikupu: “Yesu hakumwila nindi [kambanji Tomasi], Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” Hanyima yakusandujola chikupu haniyi nsañu, nelukili nami wamwinu wetu wafumaña kudi Yehova kuhitila mudi Yesu. Atukojejeli kukuhwelela nawu wamwinu wetu wafumaña kudi atupristu.

Nsona jikwawu jiyedi jamuBayibolu janleñeleli kuhimpa yililu yami kutalisha haChechi yaKatolika nintañishilu yawu. Nsona yatachi yaYishimu 1:7 yahosha nawu: “Kwakama Yehova diku kwiluka kwakutachika; hakwila asupa adiwulaña maana nikufumbika.” Yikwawu yekala haYakoba 1:5 yahosha nawu: “Mwinenu nabuli maana, alombi kudi Nzambi, wahanaña kudi antu ejima makasa ayedi, hahosholañaku; akumwinkawu.” Nadiña nampwila yakamanaña yakukeña kwiluka yuma nikuheta maana, mpwila yeniyi hiyamanineñaku hela chakwila nayileña kuchechi. Dichi nalekeli kuyaku.

Mu 1980 ñodami watachikili kudiza Bayibolu nawaYinsahu. Neyi nidi hetala nashakamineñahu nakutiyilila yuma yinakudizayi. Chimwahitili mpinji netejeli kudiza Bayibolu. Hela chochu, hahitili mpinji yeneni hakwila nawu tufuukuluhu kupapatishewa neyi aYinsahu jaYehova. Ñodami wapapatisheweli mu 1994, ami mu 1998.

CHINAHETELUMU: Anyanami awana anahetelumu hakukula nakwovwahila nshimbi jaYehova. (Aefwesesa 6:4) Nikweti anyana awamayala ayedi azataña nañovu muchipompelu mwekalawu. Anyanami awambanda ayedi niwena adikitaña nañovu mumudimu wakushimwina antu. Ñodami wazataña maora amavulu kakweji nikakweji hakukwasha antu kudiza Bayibolu, ami nawa natiyaña kuwaha kukalakala neyi eluda muchipompelu.

Chinekalili Chinsahu chaYehova nelukili chikupu yuma yayiwahi niyatama. Hakwikala nsompeshi, nafwilaña kuzatisha njila jazatishañayi  Yehova muyuma yashiyashana neyi inakusompa nyiloña muchota, kushinshika chidi yuma yejima, kutoñojokelaku antu, nawa neyi kudi yuma yinateli kuleñela kuyanakena antu, nayitiyilaña wushona.

Nasompa nyiloña yayivulu yamadombu, wubanji, kukabakesha anyana ninyiloña yamaneni yawubanji. Hela chochu, natiyaña kutama hayuma yatama. Neyi nitala nsañu yinakumwekana, natiyaña kutama hayililu yatama yinasweji mukanu kaayi. Namusakililaña Yehova muloña neluka yuma yinakuleñela wubanji kusweja nawa neluka kuchiñeja kutukweti kwakwila nawu kumbidi kukekala yuma yayiwahi.

“Kaleya hikahimpili yililu yamuku.”—KEITH WOODS

CHAAKA CHAKUVWALIKA: 1961

ITUÑA KWAFUMAYI: NORTHERN IRELAND

KUHANDA KWINDI: MBANJI

CHIHANDILU CHAMI CHAKUNYIMA: Navwalikili mu 1961 muPortadown mumbaka yasweja antu muNorthern Ireland. Anvwali jami adiña aProtesitanti nawa nakulilili hamu nawatuñi netu aKatolika niaProtesitanti. Yisaka yayivulu yadiña yahutwa. Himwadiña mali amavuluku, ilaña twashakamineña chiwahi nawatuñi netu.

Hinatiyaña kuwaha hachihandilu chami chakunyimaku. Mu 1974 nadiñijili “Mukukala,” hela mundombu yadiña hakachi kansakililu nawakwajipolitiki muNorthern Ireland. Hayina mpinji yuma yatamini hama muchituñilu chetu. Chakutalilahu, ifuku dimu nampinji yawufuku tata wadiña mukulumpi waFakitoli yatuñaña maKapeti muUlster wadiña kumudimu nakudizisha anyikwenzi ayedi atuñi netu amuKatolika. Yeniyi mpinji muntu wumu wanatilili mutendanzumbu hanjanina yakapeka kakuhanjikila mwitala mwashakamineña ana anyikwenzi aKatolika, nawa wajahili tata yawu, mama yawu nimwanyikawu weyala.

Kukala kwatwalekeluhu nawa njita yatachikili. Matala awaProtesitanti ashakamineña mwiluña dawaKatolika ayocheli nawa aKatolika ashakamineña mwiluña dawaProtesitanti ayikabishileña. Akwetu amavulu mutwashakaminineña adiña aProtesitanti. Hashimbwili wanyi ankwatili nakuñusha mukaleya hayaaka yisatu hamuloña wakulukuka antu nanyitendanzumbu.

Hampinji yinadiñi mukaleya, nakwatili wubwambu nakayili waya mpuhu muchipompelu chapolitiki chakeñaña kunuñañana hakachi kaNorthern Ireland naUnited Kingdom, antu wenawa avula kwikala aProtesitanti. Twadiña neyi anyana evumu dimu, nawa ifuku dasumbwiliyi yami nadiña kasonsweli kindi. Kaleya hikahimpili yililu yami hela yebwambu dimuku. Chiyatumbiluku, twafuntili cheñi kunyidimu yetu yapolitiki nawa haniyi mpinji twaswejeleluku. Chumichi chaleñeleli mukwetu amufuntishi cheñi mukaleya. Amujahilili mukaleya.

Anami nawa afunyikilileña nawu anjahi, ifuku dimu motoka yami ayasili mutendanzumbu.  Ilaña yumiyi yanleñeleli kwikala neyena chikupu munsañu japolitiki.

Haniyi mpinji anzatishili hakushimuna nsañu yahosheleña “haKukala,” nsañu yeniyi ayimwekesheli hachisanji chanyivwimbimbi chakuBritain. Iyi nsañu yanleteleli kukala kukwawu. Chakutalilahu, ifuku dimu nawufuku chinafuntili kwitala nawanini ñodami nantemuki. Hashimbwili wanyi kufuma hampinji yamwekesheluwu iyi progiramu hachisanji chanyivwimbimbi, antambwili mwanami. Inakwanuka mpinji yinatalileña muchibanjilu nakuhosha nami, “Neyi Nzambi wekala kwoku, nkwashi.”

Ifuku daMposu dalondeleluhu, nadimweni namukwetu wejina daPaul, wekalili Chinsahu chaYehova. Watachikili kunleja nsañu yamuBayibolu. Chimwahitili mafuku ayedi Paul wantemesheleli Kaposhi Kakutalila. Muniyi magazini mwadiña chibaaba chahosheleña hamazu aYesu asonekawu haYowanu 18:36. Wahosheli nindi: “Wanta wami hiwampata yamunu mwishinaku; neyi wanta wami wadiñi wampata yamunu mwishina, ambuñami adi kulwa, kulonda abuli kunhana kudi aYudeya; wanta wami hiwamunuku.” Awa mazu antapili kumuchima. Didu ifuku dinatachikili kuhimpa chihandilu chami.

BAYIBOLU CHIYAHIMPILI CHIHANDILU CHAMI: Paul watachikili kundizisha Bayibolu. Nkumininaku Bill Chinsahu mukwawu watwelekeluhu kundizisha. Neluka nami nadiña kadizi wakala chikupu; nehwileña malwihu amavulu. Naleteleña cheñi antañishi amunsakililu amavulu kulonda amukonkololi Bill nansañu yatañishileñayi. Ilaña namweneña nsañu yalala yaMwizu daNzambi.

Inakwanuka ifuku dimu namulejeli Bill nami bayi winza kwitala nakundizishaku muloña mukala wejima awukuchikili nawa chakadi nikujina adi kumutambula motoka nakuwocha. Hela chochu, Bill wenjili nakundizisha neyi chelileñayi dikalu. Washili motoka yindi kwitala nawa wenjili nankinga. Hinyi watela kutambula nkinga? Ifuku dikwawu, twadiña mwitala nakudiza Bayibolu naBill henjiluwu atupokola niamashidika nakunkwata. Chantwalileñawu, Bill wabidikili nakunleja nindi nikuhweleli mudi Yehova. Yumiyi yankwashili chikupu.

A Yinsahu jaYehova amakwawu atela ahayamini chinapompeli nawu katachi Hetala daWanta. Nadiñi nansuki jajilehi nawa navwalili chingelingeli kwitu nikahuma kachitembi kamwekesheleña izanvu dapolitiki munadiña. Hela chochu, nahayamini chantambwililuwu chiwahi kudi aYinsahu. Yililu yawu yayiwahi yanzañalesheli.

Hela chakwila nadizileña Bayibolu, nachidiña kudikunda nawamabwambu jami amakulu. Nkumininaku, natachikili kutiyishisha chikupu nsañu yalala yamuBayibolu yinadizileña. Nelukili nami neyi inakukeña kumukalakela Yehova, hinatela kutwalekahu munsañu japolitiki nikwikala namabwambu wowamuku. Chumichi chadiña chakala. Ilaña chinadizili yuma yayivulu muBayibolu, Yehova wankwashili nawa nahimpili. Natewili nsuki, nalekeli kuvwala chingelingeli kwitu nawa nalandili suti. Yuma yinadizileña yankwashiluku cheñi kumona antu amakwawu munjila yayiwahi.

CHINAHETELUMU: Chihandilu chami chadiña chawubanji. Mazanvu awakapokola añilukili muloña wanyidimu yami yawubanji. Ichi yuma yahimpika. Chakutalilahu, chinayili kukupompa kwankambi kwawaYinsahu jaYehova katachi kwadiñi mumbaka yaNavan, atupokola anshinjikijili kufuma kuIreland nakushika kuNorthern Ireland. Chayinu mpinji, nayaña kukupompa kwankambi chakubula atupokola. Cheñi nekala wakasunuka hakuya mumudimu wakushimwina nawakwetu aYinsahu aPaul naBill nichipompelu chejima.

Chinahimpili chikupu chihandilu, nelukili nami nekali dehi muchipompelu. Dimunawanini Chinsahu wejina daLouise nawa twadisumbwili. Kubombelahu twadimweni cheñi namwanami.

Neyi nanuka chihandilu chami chakunyima, naditoñeshaña chinakabishileña antu. Ilaña neteji chikupu nami Bayibolu yakwashaña antu adi neyi ami kuleka yuma yatama muchihandilu nikwikala nakuchiñeja.

[Tumazu twaheshina]

[Mazu ekoku adi hefu 12]

Amama ahilili chikupu chelukiluwu nawu natañaña Bayibolu