Dizenu Nsañu Yidi Mwizu Danzambi

Chumanyi Chikamwekana Hefuku daKusompesha?

Ichi chibaaba chinakuhosha hamalwihu imwadihulahu dehi nawa chinakushimuna himwatela kuwana ñakwilu muBayibolu yenu. A Yinsahu jaYehova anateli kuhanjeka nenu hakwakula awa malwihu.

1. Indi Ifuku daKusompesha hichumanyi?

Neyi chinamwekeshuwu hamwevulu wudi kuchidiilu, antu amavulu atoñojokaña nawu Hefuku Dakusompesha antu amavulu nankashi akemana kwitanda daNzambi nakuyisompesha kwesekeja nayuma yakoñeleñawu, amakwawu akayinka wuloku wawumi mwiwulu nawa amakwawu akayikabisha muhelu. Hela chochu, Bayibolu yahosha nawu nkeñelu Yefuku daKusompesha yidi yakukuula antu kuyuma yatama. (Masamu 96:13) Nzambi watonda Yesu kwikala nsompeshi wakafuntisha kuloña kudi antu.—Tañenu Isaya 11:1-5; Yililu 17:31.

2. Indi Ifuku daKusompesha dikafuntisha ñahi kuloña?

Chelili muntu watachi Adama yadikañi naNzambi mumushikila, waleñeleli anyanindi ejima kwikala nanshidi, kukabakana nikufwa. (Aroma 5:12) Hakwila yakafumishuhu iku kutama, Yesu wakasañula afu amavulu chikupu. Mukanda waChimwekeshu washimuna nawu chumichi chikazatika hampinji yachiyuulu chayaaka ikombakaji chaKristu Yesu.—Tañenu Chimwekeshu 20:4, 11, 12.

Bayi neyi afu akayisompesha hayuma yakoñeluwu henohu kanda afuku, ilaña akayisompeshela hayuma yakelawu neyi yuma ‘yamunyivuñilu’ yatenawu muChimwekeshu kapetulu 20 anayimwekeshi dehi. (Aroma 6:7) Kapostolu Pawulu wahosheli nindi, hakachi kawantu akasañulawu nawa akekala nakukooleka kwakudiza hadi Nzambi hiyantu ‘aloña niabula kuloña.’—Tañenu Yililu 24:15.

  3. Indi Ifuku daKusompesha dikakoña mudimwinyi?

Antu afwili chakadi kumwiluka Yehova Nzambi nikumukalakela akekala nakukooleka kwakuhimpa yililu yawu nikwila yuma yayiwahi. Neyi akela yuma yayiwahi dikwila nawu “akasañukila wumi.” Hela chochu, antu amakwawu akasañulawu, hiyakakeña kudiza nshimbi jaYehovaku. Antu wenawa “akasañukila kuyisompesha.”—Tañenu Yowanu 5:28, 29; Isaya 26:10; 65:20.

Hakumana kwayaaka ikombakaji Yefuku daKusompesha, Yehova wakelisha antu ovwahila kwikala awanina neyi chadiñawu hakusambila. (1 Akorinda 15:24-28) Antu ejima ovwahila akadiluñisha iyi nkisu yayiwahi. Hakweseka kwakukumisha, Nzambi wakamusubula Satana Diyabolu mwikela mwakamukasilawu hadi yaaka ikombakaji. Satana wakeseka cheñi kuhuñumuna antu kufuma kudi Yehova, ilaña antu akadikaña naSatana akadiluñisha wumi hamaseki haya nyaka.—Tañenu Isaya 25:8; Chimwekeshu 20:7-9.

4. Ifukwinyi dikwawu dakusompesha dikahetesha antu?

Bayibolu yazatisha cheñi nhoshelu yakwila nawu “ifuku dakusompesha” hakutena yuma yikaleta kukuma kwakaayi kamakonu. Idi ifuku dakusompesha dakenza mukukasumwisha neyi chenjili Dibaji damumafuku aNowa, dajilumwini antu ejima atama. Kafwampi, kujilumuka “kwawantu asekeshaña Nzambi” kudi kwakwihi kwakaleñela antu kushakama heseki dadiha ‘hakekala kuloña.’—Tañenu 2 Petulu 3:6, 7, 13.

Neyi munakukeña nsañu yikwawu, talenu mafu 213-215 muniwu mukanda waChumanyi Chacheni Chatañishaña Bayibolu?, wasonekawu kudi aYinsahu jaYehova.

[Mwevulu wudi hefu 16]

“Kusompesha Kwakukumishaku,” kudi Gustave Dorél, 1832-1883

[Mazu aKusakilila]

Egravings by Doré