Hinyi Watiyaña Mwalombañawu Antu?

NEYI kwekala Watiyaña mwalombañawu antu, chakadi nikujina watela kwikala Nleñi. Kwosi muntu mukwawu watela kwiluka yuma yimunakutoñojoka, chiña hohu Muntu waleñeli woñu. Kwosi muntu watela kwakula kulomba kwawantu nikuyinka yuma yakeñañawu. Ilaña munateli kudihula nenu, ‘Komana chachiwahi kukuhwelela mudi Nleñi?’

Antu amavulu atoñojokaña nawu hakwila muntu yakuhweleli mudi Nleñi, watela kukaana wunsahu wasayansi yamakonu. Ilaña yitoñojoka yakwila nawu kukuhwelela mudi Nzambi hikwaditejaña nasayansuku yakutwamba. Shinshikenu iwu wunsahu wunalondeluhu.

◼ Akwakusandujola chehwiluwu ankuluñaña 1,646 asayansi hajishikola jamuñoñi 21 jaya mpuhu muUnited States katataka, ankuluñaña akushika kwakwihi na 550 hohu diwu ahosheli nawu “Nakuhwelela wanyi mudi Nzambi” hakulumbulula yitoñojoka yawu.

Wunsahu wamwekesha nawu asayantisiti amavulu akuhwelela nawu Nzambi wekala kwoku.

Wunsahu Wamwekeshaña Nawu Kwekala Nleñi

Komana twatela kwiteja hohu chakadi wunsahu netu Mukwakutiya mwalombañawu antu wekala kwoku? Inehi. Yitoñojoka yakwila nawu chikuhwelelu mpinji yejima chalumbuluka kwiteja yuma chakadi wunsahu yakutwamba. Bayibolu yalumbulula chikuhwelelu nawu ‘hiwunsahu wamwekanaña wayuma yalala hela yakadi kumonewa.’ (Aheberu 11:1) Bayibolu yikwawu yalumbulula nawu chikuhwelelu ‘chatuleñelaña kukuhwelela yuma yalala yitwabulaña kumona.’ (The New English Bible) Chakutalilahu, himunateli kumona mpepela yahanwishaña mazu awayilesuku, ilaña wayilesi yenu yamwekeshaña hatooka to-o walala waniyi mpepela yahanwishaña mazu yabulaña kumwekana; dichi mweteja nenu mpepela  yeniyi yekala kwoku. Chochimu, hela chakwila hitunateli kumona Mukwakutiya mwalombañawu antuku, tunateli kushinshika wunsahu wutukweti wunateli kutuleja chikupu nawu wekala kwoku.

Kudihi kutwatela kuwana wunsahu wakwila nawu Nzambi wekala kwoku? Twatela kushinshika hohu hayuma yitwamonaña. Bayibolu yalumbulula ñane: “Muloña matala ejima akweti ayituñili; hakwinza watuñili yuma yejima diyi Nzambi.” (Aheberu 3:4) Komana mweteja awa mazu alala chikupu? Hadaha neyi mutoñojoka hayuma yaleñawu chiwahi, nsulu yawumi hela chaleñawu chuma chasweja kukala hayuma yejima yekala hamaseki, woñu wamuntu, mwatoñojokaña nenu kwekala chuma chabadika antu.

Ilaña yileñeleña hiyinateli kutudizisha nsañu yejima kutalisha hadi Nzambuku. Kushinshika wunsahu wakwila nawu Nzambi wekala kwoku kuhitila muyuma yaleñayi chidi neyi kutiya nshindu yamuntu wunakwinza kwakwihi nachenzelu chakwenzela. Muneluki nenu kuchenzelu kudi muntu, hanu dinu muneluki muntu wuduku? Hakwila mumwiluki mwatela kwenzulula chenzelu. Twatela kwila chuma chochimu kulonda tumwiluki Muntu waleñeli yuma yejima.

Bayibolu dichenzelu chatulejaña nsañu yaNzambi. Neyi mwenzulula chenzelu chenichi nikushinshika nsañu yikwawu yahosha hawuprofwetu nichiwashikijewaña, mukuwana wunsahu wamwekeshaña nawu Nzambi wekala kwoku. * Kubombelahu, nsañu yasonekawu kutalisha hadi Nzambi chazatañayi nawantu yamwekeshaña chikupu yililu yaMuntu watiyaña mwalombañawu antu.

 Indi Muntu Watiyaña Mwalombañawu Antu Wekala Ñahi?

Bayibolu yashimuna Muntu watiyaña mwalombañawu antu nawu himuntu imunateli kwiluka. Chalala muntu hohu diyi watela kutiyishisha. Dichi chatukundejaña hakutaña nawu: “Yeyi watiyaña mwalombañawu antu, antu ejima akwinza kudeyi.” (Masamu 65:2) Watiyaña antu amulombaña nachikuhwelelu. Nawa wukweti ijina. Bayibolu yahosha nawu: ‘Yehova wekala kwakulehi nawantu atama; ilaña yena watiyaña kulomba kwalombañawu akwakuloña.’—Yishimu 15:29.

Yehova ‘hiNzambi wakukeña’ nawa amutenaña nawu ‘Nzambi wamuzañalu.’ (2 Akorinda 13:11; 1 Timotewu 1:11) Bayibolu yahosha chatiyiliyi hampinji yaswejeli kutama hamaseki nawu: ‘Chamutiyishili kumuchima bwi-i.’ (Kutachika 6:5, 6) Yitoñojoka yakwila nawu Nzambi waletaña makabi kulonda yeseki antu yakutwamba. Bayibolu yahosha nawu: “Nzambi kwila chatama kwakulehi!” (Yoba 34:10) Hela chochu, munateli kudihula nenu, ‘Neyi Nzambi diyi Nleñi watwesha yejima, muloñadi chetejelayi makabi kutwalekahu?’

Yehova wayinka antu wuswa wakudifuukwila, chumichi chatulejaña chekalayi Nzambi. Komana twalemesha wanyi wuswa wutukweti wakufuukulahu chitwatela kushakama? Chawushona antu amavulu azatishaña wuswa wawu wakudifuukwila chatama nawa adiletelaña makabi nikukabishilamu akwawu. Ilu dilwihu lumwatela kutoñojokahu chikupu: Indi Nzambi nateli kufumishahu ñahi makabi chakadi kuyitambula antu wuswa wakudifuukwila wukwetuwu? Tukushinshika hanilu lwihu muchibaaba chinalondeluhu.

[Tumazu twaheshina]

[Chikasha chidi hefu 5]

Komana Nsakililu Yayileñelaña Kujinoka?

Chawushona, nsakililu yakojejaña antu amavulu kujinoka nawu kwosi muntu wukweti wushona Watiyaña mwalombañawu antu. Muloña wakwila nsakililu yadiñijaña munjita, kujahañana nikubula kubabesha antu akabishaña anyana, yumiyi yaleñelaña antu ashinshika kuhosha nawu, “Hinamukuhwelela Nzambuku.”

Muloñadi nsakililu chiyavula kukoña yuma yatama? Tukuhosha hohu netu: Antu atama anakukoña yuma yatama mwijina dansakililu. Bayibolu yashimwineñahu dehi nawu kwamba kekala antu akalukuka chipompelu chawakwaKristu nakuchizatisha munjila yatama. Kapostolu Pawulu walejeli aeluda akwaKristu nindi: “Mukachi kenwenu aweni mwakanyamuka antu akuhosha yuma yaheña, akadikokela atumbanji awenawu.”—Yililu 20:29, 30.

Nzambi wahela nsakililu yakutwamba. Kafwampi Bayibolu Izu daNzambi yashimuna nawu nsakililu yakutwamba yikweti muloña ‘wamashi . . . awantu ejima ajahawu hanu hamaseki.’ (Chimwekeshu 18:24) Muloña wakwila nsakililu yakutwamba yinakañanyi kutañisha antu nsañu yahosha hadi Nzambi walala wukweti kukeña, nsakililu yeniyi yikweti muloña wamashi kumesu aNzambi.—1 Yowanu 4:8.

Mukwakutiya mwalombañawu antu watiyilaña wushona antu anakukabishawu kudi nsakililu yalukambu. Muloña wakwila Nzambi wakeña antu, keña yasompeshi nsakililu yejima yawunfwikiji kuhitila mudi Yesu. Yesu wahosheli nindi: “Amavulu amba kañila hefuku odu nawu, Mwanta, Mwanta, hitwaprofweteli mwijina deyuku? . . . Henohu nakayakula nami, Hinayilukili hela ifuku nidimuku; fumenu kudami enu mwakoñaña yakuluwa.”—Matewu 7:22, 23.