Malwihu Ehulañawu Antañi . . .

Komana Nzambi watiyaña kutama neyi ninwa makanya?

▪ Muntu washinshika nateli kwihula ilu lwihu, chineli muBayibolu himwekala nshimbi yahosha hamakanyaku. Komana ichi chinayi mukwila nawu chakala kwiluka chatoñojokañayi Nzambi haniyi nsañu? Inehi.

Bayibolu yahosha nawu “Nyikanda yajila yejima ayonena dehi kudi Nzambi.” (2 Timotewu 3:16) MuNyikanda yajila mwekala yishina ninsañu yamwekeshaña chakeñañayi Nzambi nindi tuhembeña nyijimba yetu. Tusambilenu kuhituluka muyuma yawanawu akwakusandujola kutalisha hachuma chamwekenaña antu anwaña makanya. Kufumahu tukuhanjeka hayishina yamuBayibolu chiyakundama haniyi yuma yawanawu.

Makanya akisañanaña mujimba nawa akojejaña muntu kufwa swayi. MuUnited States, hakachi kawantu atanu afwaña, wumu wafwaña muloña wakunwa makanya. Chileji chimu chaNational Institute on Drug Abuse chahosheli nawu, mwituña denidi, makanya ajahaña antu amavulu chaaka nichaaka kubadika antu afwaña “nawalwa, yitumbu yashetana, ajahañawu chakujaha, adijahaña aweni, kushilahu niAIDS.

Antu anwaña makanya ashaña wumi wawakwawu hakatoña. Wishi wamakanya hela tuhu wantesha wafwana chikupu. Antu abulaña kunwa makanya onañaku hohu wishi wamakanya ekalaña muwubanji wakukata kansa yakumapwapwa nichikatu chamuchima namapasenti 30. Muyaaka yamakonu, andotolu awana cheñi kukala kukwawu kwatenaña nawu “wishi washalaña hananwinuwu makanya.” Iyi nhoshelu yatalisha kuwulembi washalaña kuyakuvwala, hakapeti, nikuyuma yikwawu hampinji yayilehi hanyima yakwila wushi wunajimañani dehi. Wulembi weniwu wakatishaña anyana nawa hiyekalaña nawuswa wakudiza yuma chiwahuku.

Makanya ateñwishaña. Makanya aleñelaña muntu kwikala nduñu wanichi chaaku chakisañana mujimba. Kafwampi, akwakusandujola eteja nawu kuteñuka nanicotine, wulembi wekala mumakanya, dichuma chasweja kukala nankashi kuleka.

Indi yishina yamuBayibolu yakundama ñahi kuniyi yikuma? Shinshikenu iyi yishina yinalondeluhu:

Nzambi wakeñaña nindi tulemesheña wumi. Nzambi washimwini muNshimbi jenkeliyi munza waIsarela nindi antu akeñaña kumuzañalesha atela kulemesha wumi wawantu. (Kuhituluka 5:17) A Isarela ateleli kukoleka ikoli hela mbañu yayihi kunsa yewulu damatala awu. Muloñadi? Mawulu atuñileñawu adiña esekana nawa dihahanjikilileñawu. Mbañu yadiñi nakukiña chisaka niantu amakwawu kubula kuholoka nakudikatisha hela kufwa. (Kuhituluka 22:8) Kubombelahu, aIsarela ateleleli kwiluka chikupu nawu yimuna yawu hiyateleleli kukatisha antuku. (Kwidika 21:28, 29) Muntu wanwaña makanya wafumpaña yishina yashindamena haniji nshimbi. Wadikeñelaña kusha wumi windi hakatoña. Muntu wanwaña makanya washaña cheñi wumi wawakwawu adiyi nawu hakatoña.

Nzambi wakeñaña nindi tumukeñi nikukeña antuñi netu. Yesu wahosheli nindi atumbanji twindi atela kwovwahila iji nshimbi jiyedi jalema. Atela kukeña Nzambi yawu namuchima wawu wejima, nawumi wawu wejima, namaanawu ejima, nañovu jawu jejima nikukeña antuñi nawu neyi chadikeñawu aweni. (Maku 12:28-31) Chineli wumi hichawana chatwinkayi Nzambi, muntu wanwaña makanya wamwekeshaña hatooka to-o nindi halemesha ichi chawanaku, dikwila nawu hamukeña Nzambuku. (Yililu 17:26-28) Chaaku chamuntu yeniwu chaletaña wubanji waweni kudi akwawu, dichi neyi yahosha nindi wakeña antuñi nindi watwambaña.

Nzambi watulejaña nindi tuleki yaaku yamajilu. Bayibolu yayifumbaña akwaKristu nawu aditookeshi aweni “kutama kwamujimba nikwaspiritu.” (2 Akorinda 7:1) Mwamweni kunwa makanya kwatamishaña muntu. Antu afwilaña kuleka kunwa makanya muloña wakukeña kumuzañalesha Nzambi amonaña kukala kweneni. Ilaña nawukwashu waNzambi anateli kuleka ichi chaaku chatama chateñwishaña.