Kuduhu Watiyaña Mwalombañawu Antu?

“Najinokeleña neyi chakwila Nzambi wekala kwoku. Hela chochu, nalombeleña mpinji yikwawu. Hinelukili neyi kudi muntu watiyileñaku, ilaña kuhosha hohu chalala, nakuhweleleli nami kudi muntu watiyileña. Hinadiña namuzañaluku nawa hinelukili chinatela kwila muwumuku. Najinokeleña kumukuhwelela Nzambi muloña natoñojokeleña nami antu azeya hohu diwu amukuhwelela Nzambi.”—PATRICIA, * IRELAND.

KOMANA mwatoñojokahu dehi neyi Patricia? Komana mwalombaña chili mwajinokaña neyi chakwila Nzambi wekala kwoku? Neyi dimu, hiyenu hohu mwatoñojokaña muniyi njilaku. Shinshikenu iyi nsañu yinalondeluhu.

◼ Chehujoleluwu antu akuBritain 2,200, mapesenti 22 hohu diwu ashimwini nawu akuhweleleli nawu kwekala Nzambi waleñeli iseki nawa watiyaña mwalombañawu antu. Hanawa antu ehujoleluwu mapesenti 55 diwu ahosheli nawu alombaña kudi Nzambi mpinji yikwawu.

◼ Akwakwihujola ehwili antu 10,000 akumatuña ashiyashana awanini nawu hakachi kawantu ehujoleluwu, mapesenti 30 akaanaña nawu hikwekala Nzambuku alombaña.

Ajinokelañadi?

Muntu wakwituña daEngland wejina daAllan wahosheli nindi: “Nahosheleña nami hinamukuhwelela Nzambuku muloña natoñojokeleña nami nsakililu yekalaku kulonda yiyuuleña antu hohu nikuleta mali. Nawa natoñojokeleña nami, neyi Nzambi wekala kwoku, yuma yatama yadi kusweja wanyi. Ilaña mpinji yikwawu nashakamineña nzo-o nakuhosha ‘nachuma.’ Nadihwileña cheñi nami, ‘Nekaliluku ñahi?’”

Muntu wejima watoñojokaña chamuchidiwu wukweti yuma yamuleñelaña yajinokeña neyi chakwila kulomba akwakulaña. Kakavulu malwihu abulaña kwakulawu adi neyi awa, diwu aleñelaña antu ajinokeña:

◼ Komana Nleñi wekala kwoku?

◼ Muloñadi nsakililu chiyelilaña yuma yatama kakavulu?

◼ Muloñadi Nzambi chetejelayi makabi?

Neyi mwiluka ñakwilu yanawa malwihu, komana mukutwalekahu kujinoka kutalisha hakulomba?

[Tumazu twaheshina]